Samuwele Wa Wumbirhi 2:1-32
2 Davhida a gama a vutisa Yehovha+ a ku: “Ni nga famba ka lin’we la madoropa ya Yuda?” Yehovha a mu hlamula a ku: “Famba.” Davhida a tlhela a mu vutisa a ku: “Ni nga ya ka doropa lini?” A mu hlamula a ku: “Famba aHebroni.”+
2 Se Davhida a famba ni vasati va yena vavambirhi, ku nga Ahinowami+ wa le Yezreyeli na Abigayili+ wa le Karmeli lweyi a a li nsati wa Nabali lweyi a nga fa.
3 Davhida a fambe ni vavanuna lava a a li na vona,+ hinkwavu a va ni mindjangu ya vona, va fika va tshama ka madoropa lama nga Hebroni.
4 Kutani vavanuna va Yuda va fika va chela Davhida mafurha swaku a va hosi ya lixaka la vona.+
Va gama va byela Davhida va ku: “Phela lava nga lahla Sawulo i vavanuna va Yabexi-Jiliyadi.”
5 Se Davhida a rhuma vanhu va ya ka vavanuna va Yabexi-Jiliyadi va fika va ku: “Yehovha a a mi katekisi hikusa mi swi kombisile swaku ma yi rhandza hosi ya n’wina hi ku yi lahla.+
6 Yehovha a a mi rhandzi minkama hinkwayu. Na mina ni ta va ni timpsalu ka n’wina hi mhaka ya leswi mi nga swi yendla.+
7 Tiyani mi nga chavi. Hambileswi hosi ya n’wina Sawulo a nga fa, lixaka la Yuda li ni langile leswaku ni va hosi ya lona.”
8 Kambe Abineri+ n’wana wa Neri, murhangeli wa masonchwa ya Sawulo, a teka Ixiboxeti+ n’wana wa Sawulo a famba na yena aMahanayimi+
9 a ya mu veka swaku a va hosi ya Jiliyadi,+ ya Vaaxuri, ya Yezreyeli,+ ya Efrayimi,+ ya Benjamini ni ya tiko hinkwalu la Israyele.
10 Ixiboxeti n’wana wa Sawulo a a ni 40 wa malembe nkama a nga va hosi ya Israyele naswona a fume malembe mambirhi kambe va lixaka la Yuda a va nyima na Davhida.+
11 Davhida a fume va lixaka la Yuda aHebroni 7 wa malembe ni 6 wa tiwheti.+
12 Siku lin’wani Abineri n’wana wa Neri ni vatirhi va Ixiboxeti n’wana wa Sawulo va suka Mahanayimi+ va ya Gibiyoni.+
13 Yowabu+ n’wana wa Zeruya+ ni vatirhi va Davhida na vona va humile va ya tlhangana na vona aGibiyoni akusuhi ni ndhawu leyi nga ni mati;* ntlawa wun’we a wu li ka tlhelo lin’we, ntlawa lowun’wani a wu li ka tlhelo lelin’wani.
14 Hi wugamu Abineri a byela Yowabu a ku: “A hi tshiki madjaha ma lwa, hi ta vona swaku ku ta hlula mani.” Yowabu a ku: “A ma lwi.”
15 Kutani ka ntlawa wa Ixiboxeti va langa 12 wa vavanuna va lixaka la Benjamini, va tlhela va langa 12 ka ntlawa wa vatirhi va Davhida swaku va lwa.
16 Se va sungula ku lwa, va tlhavana hi swipada, hinkwavu va gama va wa va fa. Hi leswo swi nga yendla swaku ndhawu liyani ya Gibiyoni yi vitaniwa Elkati-Azurimi.
17 Nyimpi leyi nga va kona hi siku lolelo a yi li yikulu hintamu, se Abineri ni vavanuna va Israyele va gama va hluliwa hi vatirhi va Davhida.
18 Vana vanharhu va Zeruya,+ ku nga Yowabu,+ Abixayi+ na Azayeli+ a va li kona kolanu; Azayeli a a tsutsuma ku fana ni mhala* anhoveni.
19 Azayeli a hlongolisa Abineri, na a mu landza hi ndzhaku a nga tlheli.
20 Nkama Abineri a nga txuvuka ndzhaku, a vutisa a ku: “Hi wena Azayeli?” A hlamula a ku: “Hi mina.”
21 Kutani Abineri a mu byela a ku: “Tshika ku ni hlongolisa, khoma mun’we ka madjaha u teka lexi u xi lavaka ka yena.” Kambe Azayeli a nga tshikanga ku mu hlongolisa.
22 Abineri a tlhela a ku: “Tshika ku ni hlongolisa, hikusa ni ta za ni ku dlaya. Phela loko wena se u file, swi ta ni danisa hambi hi ku mu txuvuka makwenu wa wena Yowabu.”
23 Kambe Azayeli a yala ku tlhela, se Abineri a mu tlhava ka khwirhi hi tlharhi+ li huma hi le ka nhlana; a vhela a wela kolanu a fa. Hinkwavu lava a va fika ka ndhawu leyi Azayeli a nga wa a tlhela a fela ka yona, a va fika va nyimanyana.
24 Kutani Yowabu na Abixayi va hlongolisa Abineri. Nkama dlambu a li ya ku peleni, va fika ka ganga la Ama, leli a li txuvukane ni ndhawu leyi vitaniwaka Jiya ka ndlela leyi yi yaka amananga ya Gibiyoni.
25 Kolanu va ka Benjamini va tlhangana ndzhaku ka Abineri, va va ntlawa wun’we va fika va nyima henhla ka ganga lin’wani.
26 Se Abineri a vutisa Yowabu hi rito lalikulu a ku: “Kasi hi ta dlayana anze siku muni? A wu swi tivi swaku magamu ya kona ma ta vava? Kasi u ta va byela siku muni vanhu swaku va tshika ku hlongolisa vamakwavu va vona?”
27 Yowabu a mu hlamula a ku: “Na funga hi vito la Xikwembu xa ntiyiso lexi hanyaka swaku loko a wu nga vulavulanga, vanhu lava a va ta hlongolisa vamakwavu va vona anze mundzuku nimixo.”
28 Kutani Yowabu a chaya limhondzo, vanhu va yena va tshika ku hlongolisa Israyele, se nyimpi ya kona yi helisa swoleswo.
29 Abineri ni vavanuna lava a a li na vona va fambe wusiku lolelo hinkwalu va hundza hi Araba,+ va tsemakanya Nambu wa Yordani va famba ka nkova wolowo anze va ya fika aMahanayimi.+
30 A nkama Yowabu a nga tshika ku hlongolisa Abineri, a hlengelete vanhu hinkwavu. Kutani ka vatirhi va Davhida a ku fe 19 wa vona na ku nga kontiwi na Azayeli.
31 Kambe vatirhi va Davhida va hlule va ka Benjamini ni vanhu va Abineri, naswona va dlaye 360 wa vavanuna.
32 Va teke Azayeli+ va ya mu lahla ka sirha la papayi wa yena leli nga Betlehema.+ Se Yowabu ni vanhu va yena va famba wusiku hinkwalu, va ya fika Hebroni+ nkama a li ya kuxeni.
