Samuwele Wa Wumbirhi 24:1-25
24 Yehovha a tlhela a kwatela Vayisrayele,+ nkama ku nga humelela munhu a xengetela Davhida, a ku: “Famba u ya konta+ vanhu hinkwavu va Israyele ni va Yuda.”+
2 Se hosi Davhida a byela Yowabu+ murhangeli wa masonchwa, lweyi a a li na yena a ku: “Ni kombela u famba ka tinxaka hinkwatu ta Israyele, ku sukela Dani ku ya fika aBerxeba,+ u ya konta vanhu swaku ni ta tiva swaku i vangani.”
3 Kambe Yowabu a byela hosi a ku: “Yehovha Xikwembu xa wena a a yengeseli vanhu va Israyele ka 100, naswona leswo a a swi yendle na wena hosi ya mina u swi vona. Kambe hi mhaka muni wena hosi u lava ku yendla leswo?”
4 Kambe hosi yi yalile ku yendla leswi Yowabu ni varhangeli va masonchwa va nga swi hlaya. Kutani Yowabu ni varhangeli va masonchwa va suka lani hosi a yi li kona va ya konta vanhu va Israyele.+
5 Va tsemakanya Yordani va ya gwimba matende aArowa+ ka tlhelo la xinene* la doropa leli nga xikarhi ka nkova, va famba va ya ka tlhelo la va ka Gadi ni la Yazeri.+
6 Va game va ya Jiliyadi+ ni ka tiko la Tatimi-Hodixi. Loko va sukile lanu, va ye Dani-Yani va gama va djika va ya Sidoni.+
7 Va game va ya Tiru+ ku nga doropa leli li nga ni mimuru ya ku tiya ni ka madoropa hinkwawu ya Vahivhi+ ni ya Vakanana, va ya gamela Berxeba ku nga Negebi+ wa Yuda.+
8 Va hete 9 wa tiwheti ni 20 wa masiku na va famba ka tiko hinkwalu, va gama va tlhela va ya Yerusalema.
9 Se Yowabu a byela hosi swaku lava a nga va konta a va li vangani. A Israyele a ku ni 800.000 wa tinhenha leti a ti ni swipada, kasi aYuda a ku ni 500.000 wa vavanuna.+
10 Se Davhida a sungula ku biwa hi lipfalu+ a nkama a nga gama ku konta vanhu. A gama a byela Yehovha a ku: “Ni djohe hintamu+ hi ku yendla leswi. Wena Yehovha, ni kombela u ni rivalela+ hikusa leswi ni nga swi yendla i wuphunta lalikulu.”+
11 A nkama Davhida a nga pfuka nimixo, Yehovha a byele muprofeta Gadi,+ lweyi a a vona minchumu ya ku hlamalisa hi ndlela ya singita* a gama a yi byela Davhida, a ku:
12 “Famba u ya byela Davhida u ku: ‘Yehovha a li: “Ku ni minchumu yinharhu ni nga ta ku khatisa hi yona. Langa swaku u lava ku khatisiwa hi xini xa kona.”’”+
13 Gadi a gama a famba a fika ka Davhida a ku: “Ka minchumu yinharhu leyi Xikwembu xi lavaka ku ku khatisa hi yona, u langa yini? U lava swaku ku va ni 7 wa malembe ya ndlala ka tiko la wena?+ Kumbe tiwheti tinharhu na u hlongolisiwa hi valala va wena?+ Kumbe masiku manharhu na tiko la wena li biwa hi mavabyi?+ Pimisa kahle hi mhaka leyi swaku ni ta kota ku hlamula Lweyi a nga ni rhuma.”
14 Se Davhida a hlamula Gadi a ku: “Swi ni vava hintamu. Ni kombela u nga ni tshiki ni khatisiwa hi vanhu.+ Swa yampsa hi khatisiwa hi Yehovha,+ hikusa a ni timpsalu tatikulu.”+
15 Kutani Yehovha a yendla swaku ku va ni mavabyi+ aIsrayele ku sukela nimixo anze ka nkama lowu a a wu vekile. Ku fe+ 70.000 wa vanhu ku sukela Dani anze Berxeba.+
16 Nkama ntsumi yi nga tlakusa voko swaku yi helisa Yerusalema, Yehovha a twa ku vava hi mhaka ya khombo leli,+ se a byela ntsumi leyi a yi helisa vanhu a ku: “Nyima! Xixa voko la wena.” Ntsumi ya Yehovha a yi li kusuhi ni ndhawu leyi ku phepheriwaka minchumu ka yona; ndhawu leyi a yi li ya Arawuna+ wa Muyebusi.+
17 Nkama Davhida a nga vona ntsumi leyi a yi dlayetela vanhu a byela Yehovha, a ku: “Hi mina ni nga djoha, hi mina ni nga ni nandzu; se vanhu*+ lava va fela yini? Ni kombela u khatisa mina ni ndjangu wa papayi.”+
18 Hi siku lolelo Gadi a fika ka Davhida a mu byela a ku: “Famba ka ndhawu ya Arawuna wa Muyebusi ya ku phepherela ka yona minchumu u ya yakela Yehovha altari.”+
19 Davhida a gama a yendla leswi Yehovha a nga rhuma Gadi swaku a ya mu byela swona.
20 Nkama Arawuna a nga vona hosi ni vatirhi va yona na va ta ka yena, a tekela ku huma a khizama phambheni ka hosi a txuvuka hansi.
21 Arawuna a vutisa hosi a ku: “Hi mhaka muni wena hosi u ta ka mina mutirhi wa wena?” Davhida a hlamula a ku: “Ni tele ku ta xava ndhawu ya wena ya ku phephera ka yona minchumu. Ni lava ku yakela Yehovha altari swaku mavabyi lama nga kona ma hela.”+
22 Kambe Arawuna a byela Davhida a ku: “Hosi ya mina yi teki u yendla leswi u swi lavaka, ni tihomu swaku u nyikela gandzelo la ku hisiwa hi tona hi leti, ni xileyi* xa ku hula hi xona ni makange* ya tihomu, swaku u ta tshivela hi swona ndzilu.
23 Hinkwaswu leswi wena hosi, teka swi va swa wena.” Arawuna a tlhela a byela hosi a ku: “Yehovha Xikwembu xa wena a a ku katekisi.”
24 Kambe hosi yi hlamula Arawuna yi ku: “Ihim, ni xaviseli. A ni nge yendli magandzelo ni yendlela Yehovha Xikwembu xa mina hi minchumu ya ku nyikiwa.” Kutani Davhida a xava ndhawu liyani ya ku phepherela ka yona minchumu ni tihomu hi 50 wa swikhemu* swa prata.+
25 Davhida a gama a yakela Yehovha altari+ kolanu, a yendla magandzelo ya ku hisiwa ni magandzelo ya ku kombela ku rhula. Yehovha a yamukela magandzelo wolawo,+ a rivalela tiko se mavabyi ma hela aIsrayele.
Tinhlamunselu ta le hansi
^ Kumbe: “sul”.
^ Hi Xiheberu: “muvoni wa swivono”.
^ Hi Xiheberu: “tinyempfu”.
^ Ku nga nchumu xa ku yendliwa hi xigodo lexi va pakelaka ka xona minchumu, lexi kokiwaka hi swiharhi.
^ Kumbe: “djoko; jugos”.
^ Hi Xiheberu: “50 wa tixikele”. Xikele yin’we a yi peza 11,4 wa magrama. Vona Xiyengetelo B14.