Samuwele Wa Wumbirhi 4:1-12
4 Nkama Ixiboxeti n’wana wa Sawulo+ a nga twa swaku Abineri a file aHebroni,+ a hela ntamu se Vayisrayele hinkwavu na vona va hela ntamu.
2 A ku li ni vavanuna vambirhi, lava a va li varhangeli va masonchwa ya n’wana wa Sawulo lawa a ma famba ma teketela swilo swa valala. Mavito ya vona a ku li Bahana na Rekabi. A va li vana va Rimoni wa le Beroti, wa lixaka la ka Benjamini. (Hikusa doropa la Beroti+ na lona a li kontiwa ka lixaka la ka Benjamini.
3 Vanhu va le Beroti va balekile va ya Jitayimi,+ va fika va tshama kona anze namuntlha.)
4 Yonatani+ n’wana wa Sawulo a a ni n’wana wa ku limala minenge.+ A a ni 5 wa malembe nkama ku nga tiviwa swaku Sawulo na Yonatani va file aYezreyeli,+ se lweyi a a mu hlayisa a mu tlakula a baleka na yena, kambe nkama lowu a a li ku balekeni a a chava hintamu, a gama a mu wisa a limala. Vito la n’wana lweyi a ku li Mefiboxeti.+
5 Vana va Rimoni wa le Beroti, ku nga Rekabi na Bahana, va ye kaya ka Ixiboxeti hi nkama lowu a a li ku humuleni hileswi dlambu a li hisa.
6 Va fika va nghena ndlwini ingaku va ya ku tekeni ka trigu, se va fika va tlhava Ixiboxeti hi tlharhi ka khwirhi; kutani Rekabi ni makwavu wa yena Bahana+ va baleka.
7 A nkama va nga nghena ndlwini, a a yo yetlela ka kwartu la yena, se va fika va mu tlhava va mu dlaya, va gama va mu tsema nhloko. Se va teka nhloko ya yena va famba na yona wusiku hinkwalu hi ndlela leyi yi yaka aAraba.
8 Va teka nhloko ya Ixiboxeti+ va famba na yona ka Davhida aHebroni, va fika va ku: “Hi leyi nhloko ya Ixiboxeti n’wana wa Sawulo nala wa wena,+ lweyi a a lava ku ku dlaya.+ Namuntlha Yehovha a ku hakeliselile ka Sawulo ni vana va yena.”
9 Kambe Davhida a hlamula Rekabi ni makwavu wa yena Bahana, lava a va li vana va Rimoni wa le Beroti, a ku: “Na funga hi Yehovha Xikwembu lexi hanyaka, lweyi a nga ni ponisa ka swikarhatu swa mina hinkwaswu,+
10 swaku a nkama ku nga ta munhu a ta ni byela swaku Sawulo a file,+ yena a a pimisa swaku a ni tisela mahungu ya ku tsakisa, kambe ni mu khomile ni mu dlaya+ aZikilagi. Hi leswo ni nga mu hakela hi swona.
11 Hi swoleswo ni nga ta mi yendla swona n’wina vanhu va timbilu ta ku biha hikusa mi dlaye munhu wa ku lulama na a yetlele ndlwini ka yena. Ngati ya yena ni ta yi lava ka mavoko ya n’wina;+ na n’wina ni ta mi dlaya.”
12 Kutani Davhida a byela madjaha ya yena swaku ma va dlaya.+ Ma va tsema mavoko ni minenge, ma gama ma va hayeka+ kusuhi ni ndhawu leyi nga ni mati* aHebroni. Kambe ma teka nhloko ya Ixiboxeti ma yi lahla ka sirha la Abineri aHebroni.
Tinhlamunselu ta le hansi
^ Kumbe: “lago; tiva”.
