Samuwele Wa Wumbirhi 9:1-13
-
Davhida a kombisa timpsalu ka Mefiboxeti (1-13)
9 Davhida a ku: “Ka ha ni lweyi a nga sala ka ndjangu wa Sawulo swaku ni ta mu komba timpsalu hi mhaka ya Yonatani?”+
2 A ku ni munhu lweyi a a tirha ka ndjangu wa Sawulo lweyi vito la yena a ku li Ziba.+ Se va mu teka va famba na yena ka Davhida, Davhida a mu vutisa a ku: “Hi wena Ziba?” Yena a hlamula a ku: “Ina, hi mina wena hosi.”
3 Hosi yi tlhela yi mu vutisa yi ku: “Ka ha ni munhu mun’wani lweyi a nga sala ka ndjangu wa Sawulo swaku ni ta mu komba timpsalu ta Xikwembu?” Ziba a hlamula hosi a ku: “Ku sale n’wana mun’we wa Yonatani; kambe a limale minenge.”+
4 Hosi yi mu vutisa yi ku: “A kwini?” Ziba a hlamula hosi a ku: “A tshama aLo-Debari akaya ka Makiri+ n’wana wa Amiyeli.”
5 Kutani hi ku hantlisa Hosi Davhida a rhuma vanhu swaku va ya mu teka aLo-Debari akaya ka Makiri n’wana wa Amiyeli.
6 A nkama Mefiboxeti n’wana wa Yonatani, n’wana wa Sawulo a nga fika ka Davhida, a fike a khizama, a txuvuka hansi. Se Davhida a ku: “Mefiboxeti,” yena a hlamula a ku: “Hi mina lweyi hosi ya mina.”
7 Kutani Davhida a ku: “U nga chavi, hikusa ni ta ku komba timpsalu+ hi mhaka ya Yonatani papayi wa wena, ni ta ku tlhelisela masimu hinkwawu ya vhovho wa wena Sawulo, naswona u ta hamba u dla* ka meza wa mina.”+
8 Mefiboxeti a khizama a ku: “No va mani mina, mbyana ya ku fa+ ya ku fana na mina swaku u nga za u ni komba timpsalu?”
9 Se hosi yi vitana Ziba lweyi a a li mutirhi wa Sawulo yi ku: “Hinkwaswu leswi a swi li swa Sawulo ni ndjangu wa yena ni swi nyika ntukulu wa yena Mefiboxeti.+
10 U ta mu rimela masimu, wena ni vana va wena ni vatirhi va wena, naswona hinkwaswu leswi mi nga ta swi tshovela mi ta swi hlengeleta swaku swi va swakudla swa ndjangu wa Mefiboxeti. Kambe Mefiboxeti ntukulu wa Sawulo a ta hamba a dla ka meza wa mina.”+
Ziba a a ni 15 wa vana ni 20 wa vatirhi.+
11 Kutani Ziba a byela hosi a ku: “Ni ta yendla hinkwaswu leswi wena hosi u ni byelaka swona.” Kambe Mefiboxeti a a dla ka meza wa Davhida* ku fana ni vana va Davhida.
12 Mefiboxeti a a ni n’wana wa djaha lweyi vito la yena a ku li Mika,+ naswona hinkwavu lava a va tshama kaya ka Ziba va ve vatirhi va Mefiboxeti.
13 Mefiboxeti a a tshama Yerusalema, hikusa a a hamba a dla ka meza wa hosi;+ naswona a a limale minenge.+
