Tihosi Ta Wumbirhi 1:1-18
-
Eliya a profeta hi ku fa ka Akaziya (1-18)
1 Nkama Akabu a nga fa, Vamowabu+ va sungula ku djikela Vayisrayele.
2 Ku ve hi nkama wolowo Akaziya a nga wa a tivavisa na a li ka kwartu la yena la le henhla ka yindlo ya yena leyi nga Samariya. Se a rhuma vanhu a ku: “Fambani mi ya ni vutisela ka Bali-Zebuli xikwembu xa Ekroni+ swaku lani ni nga tivavisa ku ta hola kumbe a ku nga ta hola.”+
3 Kambe ntsumi ya Yehovha yi byela Eliya+ wa le Tixibi yi ku: “Famba u ya kumana ni vanhu lava hosi ya Samariya yi nga va rhuma, u fika u va vutisa u ku: ‘Ko kala ku nga na Xikwembu aIsrayele leswi mi yaka mi ya vutisa Bali-Zebuli xikwembu xa Ekroni?+
4 Kutani Yehovha a li: “A wu nga ta pfuka ka mubedu lowu u nga yetlela ka wona, hikusa u ta fa.”’” Eliya a gama a suka a famba.
5 Nkama lava nga rhumiwa va nga tlhela va ya ka Akaziya, a tekele ku va vutisa a ku: “Mi tlhela hi mhaka muni?”
6 Se va mu hlamula va ku: “Ku ni munhu lweyi a nga ta a ta kumana na hina, a gama a hi byela a ku: ‘Tlhelani mi ya ka hosi leyi yi nga mi rhuma, mi fika mi ku: “Yehovha a li: ‘Ko kala ku nga na Xikwembu aIsrayele leswi u rhumaka vanhu va ya ku vutisela ka Bali-Zebuli xikwembu xa Ekroni? Kutani a wu nga ta pfuka ka mubedu lowu u nga yetlela ka wona, hikusa u ta fa.’”’”+
7 Nkama a nga twa leswo a va vutisa a ku: “Munhu lweyi a nga ta a ta kumana na n’wina a tlhela a mi byela marito lawa a a tshamise ku yini?”
8 Va mu hlamula va ku: “A ku li wanuna lweyi a a yambale mpahla leyi nga yendliwa hi mavoya+ a tlhela a boha ni bandhi leli nga yendliwa hi xikhumba.”+ Se hosi yi vhela yi ku: “I Eliya wa Mutixibi.”
9 Hosi yi rhuma murhangeli wa 50 wa masonchwa a ya ka Eliya na a ni 50 wa masonchwa ya yena. A nkama a nga fika, Eliya a a tshame henhla ka ntshava. Kutani a byela Eliya a ku: “Munhu wa Xikwembu xa ntiyiso,+ a hosi yi li: ‘Xika.’”
10 Kambe Eliya a hlamula murhangeli wa 50 wa masonchwa a ku: “Loko ni li munhu wa Xikwembu, a ku xike ndzilu hi le tilweni+ wu ku helisa, wena ni 50 wa masonchwa lawa u nga na wona.” Ku gama ku xika ndzilu hi le tilweni, wu helisa murhangeli wa masonchwa ni 50 wa masonchwa lawa a ma li na yena.
11 Se hosi yi tlhela yi rhuma murhangeli mun’wani wa 50 wa masonchwa swaku a ya ka Eliya na a ni 50 wa masonchwa lawa a a ma rhangela. A fika ka Eliya a ku: “Munhu wa Xikwembu xa ntiyiso, a hosi yi li: ‘Kahlula u xika.’”
12 Kambe Eliya a va hlamula a ku: “Loko ni li munhu wa Xikwembu xa ntiyiso, a ku xike ndzilu hi le tilweni wu ku helisa, wena ni 50 wa masonchwa lawa u nga na wona.” Ku gama ku xika ndzilu wa Xikwembu hi le tilweni, wu helisa murhangeli wa masonchwa ni 50 wa masonchwa lawa a ma li na yena.
13 A hosi yi tlhela yi rhuma murhangeli mun’wani wa wunharhu lweyi a a rhangela 50 wa masonchwa swaku a ya ka Eliya na a ni 50 wa masonchwa lawa a a ma rhangela. Kambe murhangeli lweyi wa wunharhu a khwela ka ntshava a fika a khizama phambheni ka Eliya, a sungula ku mu kombela a ku: “Munhu wa Xikwembu xa ntiyiso, ni kombela u ni tsetselela swaku ni nga fi, mina ni 50 wa vatirhi lava va wena lava ni nga na vona.
14 Na swi tiva swaku se ku xike ndzilu hi le tilweni wu helisa varhangeli vambirhi va 50 wa masonchwa ni mintlawa ya vona leyi a va yi rhangela leyi a yi ni 50 wa masonchwa, kambe swoswi ni kombela u ni tsetselela swaku ni nga dlayiwi.”
15 Ntsumi ya Yehovha yi byela Eliya yi ku: “Famba na yena. U nga mu chavi.” A gama a xika a famba na yena ka hosi.
16 Eliya a byela hosi a ku: “Yehovha a li: ‘U rhume vanhu swaku va ya vutisa ka Bali-Zebuli xikwembu xa Ekroni.+ Ko kala ku nga na Xikwembu aIsrayele ke?+ Hi mhaka muni u nga xi vutisanga? Se a wu nga ta pfuka ka mubedu lowu u nga yetlela ka wona, hikusa u ta fa.’”
17 Kutani Akaziya a fa, hi ku ya hi leswi Yehovha a nga swi hlaya hi ku tirhisa Eliya; kambe leswi a a nga na n’wana wa djaha, makwavu wa yena Yehorama+ a ve hosi. Leswo swi yendleke hi lembe la wumbirhi la ku fuma ka Yehorama+ n’wana wa Yehoxafati hosi ya Yuda.
18 Timhaka hinkwatu ta wutomi la Akaziya+ ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
