Tihosi Ta Wumbirhi 10:1-36
10 Akabu+ a a ni 70 wa vana aSamariya. Se Yewu a tsala makarta a ma rhumela Samariya ka varhangeli va Yezreyeli ni madoda+ ni lava a va hlayisa* vana va Akabu a ku:
2 “A nkama karta leli li nga ta fika ka n’wina, vana va hosi ya n’wina va ta va na va li na n’wina koseno ni tinyolo* ta nyimpi, makavhalu, doropa leli nga ni mimuru ya ku tiya ni matlharhi.
3 Ka vana va hosi ya n’wina langani lweyi a faneliwaka hi ku va hosi mi gama mi mu veka ka xitshamu xa wuhosi xa papayi wa yena. Se mi lwa swaku mi vhikela ndjangu wa hosi ya n’wina.”
4 Kambe va sungula ku chava, va gama va ku: “A hlule tihosi timbirhi,+ se hina hi nga swi kotisa ku yini ku lwa na yena?”
5 Lweyi a a vonelela yindlo ya wuhosi, govhernadori wa doropa, madoda ni lava a va hlayisa vana va Akabu va rhuma vanhu va ya byela Yewu va ku: “Hi vatirhi va wena naswona hi ta yendla hinkwaswu leswi u hi byelaka swona. A ku na munhu lweyi hi nga ta mu veka swaku a va hosi. Yendla hinkwaswu leswi u swi lavaka.”
6 Yewu a tlhela a va tsalela karta la wumbirhi, a ku: “Loko mi li vatirhi va mina naswona mi lava ku ni yingisa, tisani tinhloko ta vana va hosi ya n’wina, a mundzuku hi nkama lowu aYezreyeli.”
Hi nkama wolowo 70 wa vana va hosi a va hlayisiwa hi vavanuna lava hloniphiwaka ka doropa.
7 Nkama karta li nga fika ka vona, va hantlisa va teka vana va hosi va va dlaya, a ku li 70 wa vavanuna,+ va gama va teka tinhloko ta vona va ti peta ka mindzhava, va ti rhumela aYezreyeli.
8 Ku rhumiwa munhu a ya ka Yewu a fika a mu byela a ku: “Va tise tinhloko ta vana va hosi.” Se Yewu a ku: “Ti vekeni ti va swidulu swimbirhi ka nyanghwa wa doropa anze nimixo.”
9 Nkama a nga huma nimixo, a fika a nyima phambheni ka vanhu hinkwavu a ku: “N’wina a mi na nandzu. Hi mina ni nga yendla planu* la ku djikela hosi ya mina ni tlhela ni yi dlaya,+ kambe i mani lweyi a nga dlaya vanhu lava hinkwavu?
10 Se swi tiveni swaku a xi kona ni xin’we lexi taka hi ka Yehovha, lexi Yehovha a nga xi hlaya ka mhaka ya ku yavanyisa ndjangu wa Akabu lexi nga ta kala xi nga yendleki,+ naswona Yehovha a yendle leswi a nga swi hlaya hi ku tirhisa Eliya mutirheli wa yena.”+
11 Se Yewu a tlhela a dlaya hinkwavu lava nga sala ka ndjangu wa Akabu aYezreyeli ku patsa ni vavanuna va ku hlonipheka lava a va nyima na yena, vanghanu va yena ni vaprista va yena,+ naswona a nga siyanga munhu ni wa mun’we ka vona.+
12 Nkama a nga suka kolanu a famba a ya Samariya. A hundze hi ka yindlo leyi a ku tsemetiwa ka yona mavoya ya tinyempfu.
13 Se kolanu Yewu a tlhangana ni vamakwavu va Akaziya+ hosi ya Yuda, a gama a va vutisa a ku: “Hi n’wina vamani?” Se vona va hlamula va ku: “Hi vamakwavu va Akaziya hi ya hi ya vutisa swaku a vana va hosi ni vana va mamani wa hosi vo yini.”
14 A vhela a ku: “Va khomeni!” Kutani va va khoma va va dlaya ka xihlovo lexi a xi li ka yindlo leyi a ku tsemetiwa ka yona mavoya ya tinyempfu, a ku li 42 wa vavanuna. A nga siyanga ni wa mun’we wa vona.+
15 Nkama na a famba, a tlhangane na Yonadabi+ n’wana wa Rekabi,+ lweyi a a ta swaku a mu tlhangaveta. Nkama a nga gama ku mu pfuxela a te: “U nyima na mina hi mbilu hinkwayu ku fana ni leswi na mina ni nyimaka na wena?”
Yonadabi a mu hlamula a ku: “Ni nyima na wena.”
Se Yewu a ku: “Loko ku li leswo tisa voko la wena.”
A gama a mu nyika voko la yena, se Yewu a mu koka a khwela ka nyolo ya yena.
16 Kutani a ku: “A hi fambi, u ta vona leswi ni nga ta swi yendla ka lava va lwaka na Yehovha.”+ Va gama va famba xikan’we hi nyolo ya yena ya nyimpi.
17 A fika aSamariya a dlaya hinkwavu lava va nga sala ka ndjangu wa Akabu anze a va heta,+ hi ku ya hi leswi Yehovha a nga swi hlaya hi ku tirhisa Eliya.+
18 Yewu a gama a hlengeleta vanhu hinkwavu, a va byela a ku: “Akabu a gandzele Bali ka kutsongo+ kambe mina ni ta mu gandzela ku tlula yena.
19 Swoswi ni vitaneleni vaprofeta hinkwavu va Bali,+ vanhu hinkwavu lava va mu gandzelaka ni vaprista va yena hinkwavu.+ Ku nga sali munhu hikusa ni lava ku yendlela Bali gandzelo lalikulu. Lweyi a nga ta kala a nga ti a ta dlayiwa.” Kambe Yewu a yendle leswi swaku a helisa vagandzeli va Bali.
20 Se Yewu a ku: “Byelani vanhu swaku ku ta va ni ntlhanganu wa ku hlawuleka wa Bali.” Va gama va byela vanhu.
21 Yewu a gama a rhuma vanhu swaku va famba ka tiko hinkwalu la Israyele, va ya vitana vagandzeli va Bali se vagandzeli hinkwavu va Bali+ va ta. A nga kona lweyi a kalaka a nga tanga. Va fike va nghena ka tempele ya Bali yi gama yi tala hintamu.
22 Kutani Yewu a byela lweyi a a hlayisa mpahla a ku: “Humesa mpahla u nyika vagandzeli hinkwavu va Bali.” Se a va humesela yona.
23 Yewu na Yonadabi+ n’wana wa Rekabi va nghena ka tempele ya Bali. Yewu a gama a byela vagandzeli va Bali a ku: “Lavetelani kahle mi tlhela mi tiyiseka swaku a ku na vagandzeli va Yehovha lani, ko va ni vagandzeli va Bali ntsena.”
24 Hi wugamu va game va famba va ya nyikela mangandzelo ni magandzelo ya ku hisiwa. Yewu a a veke 80 wa vavanuna ahandle, a tlhela a va byela a ku: “Loko mo tshuka mi tshika mun’we ka vavanuna lava a baleka, ku ta dlayiwa n’wina.”
25 Nkama Yewu a nga heta ku nyikela gandzelo la ku hisiwa, a byele lava a va mu vonelela ni vapfunisi va yena a ku: “Nghenani mi va dlaya! Mi nga tshikeni munhu ni mun’we a baleka!”+ Se lava a va mu vonelela ni vapfunisi va yena va va dlaya hi xipada va tlhela va va txukumeta handle; va tame va va dlaya ku ya fika ka ndhawu leyi kwetsimaka* leyi a yi li xikarhi ka tempele ya Bali.
26 Va gama va teka mapilari+ lawa a va ma yendle swikwembu ka tempele ya Bali va ma hisa hinkwawu.+
27 Va gama va tshova pilari+ la Bali va tlhela va dilizela tempele ya kona,+ va yi yendla xikoti, ni namuntlha swa ha tshame hi ndlela yoleyo.
28 Yewu a yendle leswo, swaku a helisa a wugandzeli la Bali aIsrayele.
29 Kambe Yewu a tame a yendla swidjoho swa ku fana ni swa Yerobuwamu n’wana wa Nebati, leswi a nga djohisa Vayisrayele hi swona, a tame a tshika swihon’wani swa woru, leswi a swi li Betele ni le Dani.+
30 Se Yehovha a byela Yewu a ku: “Leswi u nga yendla minchumu yayinene hi ku ni yendlela hinkwaswu leswi a ni lava swaku swi yendleka ka ndjangu wa Akabu,+ ni ta nyika mfumu vana va wena, vatukulu va wena, vana va vatukulu va wena ni vana va vana va vatukulu va wena swaku va fuma aIsrayele.”+
31 Kambe Yewu a nga wu yingisanga hi mbilu hinkwayu Nawu wa Yehovha Xikwembu xa Israyele.+ A tame a yendla swidjoho swa ku fana ni leswi Yerobuwamu a nga djohisa Vayisrayele hi swona.+
32 Hi masiku wolawo, Yehovha a tshike Vayisrayele va tekeliwa tindhawu ta vona hi kutsongokutsongo hi valala va vona. Azayele a tame a lwa ni Vayisrayele ka tiko la vona hinkwalu,+
33 ku sukela awuxeni ka Yordani, tiko hinkwalu la Jiliyadi, ku nga tiko la lixaka la Gadi, tiko la lixaka la Rubeni ni la Manasi,+ ni ku sukela ka tiko la Arowa, leli nga kusuhi ni Nkova wa Arinoni anze Jiliyadi ni le Baxani.+
34 Timhaka hinkwatu ta wutomi la Yewu, hinkwaswu leswi a nga swi yendla ni mintirho ya yena, swi tsaliwile ka buku leli vulavulaka hi wutomi la tihosi ta Israyele.
35 Se Yewu a fa, a gama a lahliwa lani vavhovho va yena va nga lahliwa kona aSamariya; kutani Yehowazi+ n’wana wa yena a va hosi.
36 Yewu a fume Israyele na a li Samariya 28 wa malembe.
Tinhlamunselu ta le hansi
^ Hi Xiheberu: “lava a va hlayisa Akabu”.
^ Kumbe: “tin’qolo; makalichi”.
^ Kumbe: “kungu”.
^ Hi Xiheberu: “doropa”. Kumbexana ndhawu leyi a yi fana ni yindlo ya ku tumbela ka yona.
