Tihosi Ta Wumbirhi 12:1-21
12 Yehowaxi+ a ve hosi hi lembe la wu 7 la ku fuma ka Yewu+ naswona a fume 40 wa malembe aYerusalema. Vito la mamani wa yena a ku li Zibiya lweyi a nga psaliwa aBerxeba.+
2 Yehowaxi a tame a tirhela Yehovha hi ku tshembeka ka masiku hinkwawu lawa muprista Yoyada a nga mu djondzisa hi wona.
3 Kambe tindhawu ta ku tlakuka+ leti a ku gandzeliwa ka tona a ti susiwanga naswona vanhu a va yendla magandzelo va tlhela va yendla swaku ximusi xa magandzelo wolawo xi ya ka swikwembu swa vona.
4 Yehowaxi a byela vaprista a ku: “Tekani male hinkwayu ya magandzelo ya ku kwetsima+ leyi tisiwaka ka yindlo ya Yehovha, ni male ya rhesa* leyi vanhu va yi hakelaka,+ ni male leyi nyikeliwaka hi lava va nga tshembisa ku yi nyikela ni male hinkwayu leyi vanhu va yi nyikelaka hi ku swi rhandza ka yindlo ya Yehovha.+
5 Mi ta yi teka ka lava va nga ta yi nyikela, mi yi tirhisela ku lunghisa yindlo, hinkwaku lani yi nga ta va na yi wonheke kona.”+
6 Hi lembe la wu 23 la ku fuma ka Hosi Yehowaxi, vaprista a va nge se yi lunghisa yindlo.+
7 Se Hosi Yehowaxi a vitana muprista Yoyada+ ni vaprista lavan’wani a va vutisa a ku: “Hi mhaka muni mi nga lunghisi yindlo? Mi nga ha teki male ka lava va yi humesaka loko mi nga lavi ku yi tirhisela ku lunghisa yindlo.”+
8 Se vaprista va pfumela swaku a va nga ha ta teka male ka lava va yi humesaka ni leswaku a ku nga ha ta va vona lava a va ta lunghisa yindlo.
9 Se muprista Yoyada a teka kaxa+ a boxa mbhovo ka lona, a gama a li veka tlhelweni ka altari hi ka tlhelo la xinene loko munhu a nghena ka yindlo ya Yehovha. Vaprista lava a va vonelela tinyanghwa a va teka male hinkwayu leyi a yi humesiwa ka yindlo ya Yehovha va ya yi peta kolomuyani.+
10 Loko va vona swaku kaxa li tale hi male, sekretariyu* wa hosi ni muprista wamukulu a va fika va humesa male leyi nga nyikeliwa ka yindlo ya Yehovha va gama va yi konta.+
11 Male leyi a va yi konta a va yi nyika lava va nga langiwa swaku va vonelela ntirho ka yindlo ya Yehovha. Se vona va hakela vakarpinteru ni lava a va yaka ka yindlo ya Yehovha+
12 ni lava a va kota ku yaka hi maribye ni lava a va tsemelela maribye. A va tlhela va xava timhandzi ni maribye lawa a ma tsemeleliwile swaku va lunghisa yindlo ya Yehovha ni ku tlhela va hakela hinkwaswu leswi a swi laveka swaku yindlo yi lunghisiwa.
13 Kambe male leyi a yi humesiwa ka yindlo ya Yehovha a yi tirhiseliwanga ku yendla mabaziya ya prata, swa ku tima ndzilu, switijelana, timhalamhala,*+ kumbe minchumu yin’wani ya prata kumbe woru leswi a swi tirhisiwa ka yindlo ya Yehovha.+
14 A va nyika male lava a va vonelela ntirho swaku va lunghisa yindlo ya Yehovha.
15 A va nga va vutisi nchumu vavanuna lava a va nyikiwa male ya ku hakela vatirhi, hikusa a va li vanhu va ku tshembeka.+
16 Kambe male ya magandzelo ya nandzu+ ni male ya magandzelo ya xidjoho, a yi nga tisiwi ka yindlo ya Yehovha; a yi li ya vaprista.+
17 Ku ve hi nkama wolowo Azayele+ hosi ya Siriya a nga ya lwa ni doropa la Gati+ a li teka, a tlhele a hamba planu* la ku ya hlasela doropa la Yerusalema.+
18 Se Yehowaxi hosi ya Yuda a teka minchumu hinkwayu leyi vavhovho va yena ku nga Yehoxafati, Yehorama na Akaziya lava a va li tihosi ta Yuda, va nga yi nyikela ka Xikwembu, a tlhele a teka minchumu hinkwayu leyi a nga yi nyikela ni woru hinkwalu leli a li li ka yindlo ya Yehovha ni ka yindlo ya wuhosi, a swi rhumela ka Azayele hosi ya Siriya.+ Kutani Azayele a tshika maplanu* lawa a a li na wona ya ku ya lwa ni doropa la Yerusalema.
19 Timhaka hinkwatu ta wutomi la Yehowaxi, ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.
20 Kambe vatirhi va yena va mu djikelile+ va mu dlaya ka yindlo leyi a yi yakiwe aBeti-Milu+ leyi a yi kumeka ka ndlela leyi yaka Sila.
21 A dlayiwe hi Yozakari n’wana wa Ximeyati na Yehozabadi n’wana wa Xomeri lava a va li vatirhi va yena.+ Va game va ya mu lahla lani ku nga lahliwa vavhovho va yena ka Doropa la Davhida, se Amaziya n’wana wa yena a va hosi.+
Tinhlamunselu ta le hansi
^ Kumbe: “impoxtu; tinemba”.
^ Kumbe: “matsalana; mabalani”.
^ Ku nga nchumu xa ku yendliwa hi limhondzo kumbe nsimbi. Xi chaya ku fananyana ni vhuvhuzela.
^ Kumbe: “kungu”.
^ Kumbe: “makungu”.