Tihosi Ta Wumbirhi 13:1-25
13 Hi lembe la wu 23 la ku fuma ka Yehowaxi+ n’wana wa Akaziya+ hosi ya Yuda, Yehowazi n’wana wa Yewu+ a ve hosi ya Israyele na a tshama Samariya naswona a fume 17 wa malembe.
2 A tame a yendlela Yehovha swilo swa ku biha naswona a nga swi tshikanga swidjoho leswi Yerobuwamu n’wana wa Nebati a nga djohisa Vayisrayele hi swona.+ A tame a swi yendla.
3 Se Yehovha a va kwatela+ hintamu Vayisrayele,+ a za a va nyikela ka mavoko ya Azayele+ hosi ya Siriya ni ya Benadadi+ n’wana wa Azayele hi nkama wolowo hinkwawu.
4 Hi ku famba ka nkama, Yehowazi a khongele ka Yehovha a kombela swaku a mu twela wusiwana, kutani Yehovha a mu yingisile, hikusa a a vona leswi Vayisrayele a va hluphisiwa swona hi hosi ya Siriya.+
5 Se Yehovha a nyika Vayisrayele munhu lweyi a a ta va ponisa+ swaku a va chunsa ka hosi ya Siriya va tlhela va tshamiseka ka makaya ya vona ku fana ni ku sunguleni.
6 (Kambe a va swi tshikanga swidjoho swa ndjangu wa Yerobuwamu leswi a nga djohisa Vayisrayele hi swona.+ Va tame va swi yendla naswona a va yi susanga mhandzi ya Axera*+ leyi a yi li Samariya.)
7 Yehowazi a a yo sala ni 50 wa vanhu lava a va famba hi makavhalu, 10 wa tinyolo* ta nyimpi ni 10.000 wa masonchwa, hikusa hosi ya Siriya a yi ma helisile,+ yi ma psanyetela ma fana ni wuthulu leli vaka kona hi nkama wa ku phephera.+
8 Timhaka hinkwatu ta wutomi la Yehowazi, hinkwaswu leswi a nga swi yendla ni mintirho ya yena, swi tsaliwile ka buku leli vulavulaka hi wutomi la tihosi ta Israyele.
9 Kutani Yehowazi a fa a gama a lahliwa lani vavhovho va yena va nga lahliwa kona aSamariya;+ se Yehowaxi n’wana wa yena a va hosi.
10 Hi lembe la wu 37 la ku fuma ka Yehowaxi hosi ya Yuda, Yehowaxi+ n’wana wa Yehowazi a ve hosi ya Israyele na a tshama Samariya naswona a fume 16 wa malembe.
11 A tame a yendlela Yehovha swa ku biha. A nga swi tshikanga swidjoho hinkwaswu leswi Yerobuwamu n’wana wa Nebati a nga djohisa Vayisrayele hi swona.+ A tame a swi yendla.
12 Timhaka hinkwatu ta wutomi la Yehowaxi, hinkwaswu leswi a nga swi yendla ni mintirho ya yena ni leswi a nga lwisa swona na Amaziya hosi ya Yuda,+ swi tsaliwile ka buku leli vulavulaka hi wutomi la tihosi ta Israyele.
13 Yehowaxi a game a fa a tlhela a lahliwa lani vavhovho va yena va nga lahliwa kona, se Yerobuwamu*+ a sungula ku fuma. Yehowaxi a lahliwe Samariya lani ku nga lahliwa tihosi ta Israyele.+
14 Hi nkama lowu Elixa+ a a vabya hi mavabyi lawa ma nga gama ma mu dlaya, Yehowaxi hosi ya Israyele a mu yelile a fika a mu rilela a ku: “Hosi ya mina, hosi ya mina!* Ni vona nyolo ya nyimpi ya Israyele ni vafambisi va yona va makavhalu!”+
15 Elixa a mu byela a ku: “Teka ligubu ni mimpaxwa.”* Se a swi teka.
16 Se a byela hosi ya Israyele a ku: “Khoma ligubu hi voko.” A li khoma, Elixa a gama a tlhateka mavoko ya yena henhla ka mavoko ya hosi.
17 Kutani a ku: “Pfula janela leli nga ka tlhelo la wuxeni.” Se a li pfula. Elixa a tlhela a ku: “Txopa!” Kutani a txopa. A gama a ku: “Mpaxwa wa Yehovha wa ku ponisa, mpaxwa lowu nga ta hlula Vasiriya! U ta hlula Vasiriya aAfeki+ anze u va heta.”
18 Elixa a tlhela a ku: “Teka mimpaxwa,” a gama a yi teka. A tlhela a mu byela a ku: “Tlhava hansi.” Se a tlhava kanharhu a gama a nyima.
19 Mutirheli wa Xikwembu xa ntiyiso a mu kwatela a ku: “A wu fanele u tlhave ka 5 kumbe ka 6! Loko a wu yendle leswo a wu ta hlula Vasiriya anze u va heta kambe swoswi u ta va hlula kanharhu ntsena.”+
20 Elixa a gama a fa se va ya mu lahla. A ku ni masonchwa ya Vamowabu lawa a ma famba ma teketela minchumu ya vanhu van’wani.+ Masonchwa lawa a ma tolovela ku ya ka tiko la Vayisrayele a ku sunguleni ka lembe.*
21 Siku lin’wani a nkama vanhu a va ya lahla munhu, va vone masonchwa lawa a ma teketela minchumu ya vanhu, se va hantlisa va txukumetela ntsumbu wa kona ka sirha la Elixa va gama va baleka. Nkama munhu lwiyani a nga khumba marhambu ya Elixa, a hanya+ a sekeleka a nyima hi minenge.
22 Azayele+ hosi ya Siriya a hluphe Vayisrayele+ masiku hinkwawu ya ku fuma ka Yehowazi.
23 Kambe Yehovha a va twele wusiwana a tlhela a va ni timpsalu+ hi mhaka ya ntwananu lowu a nga wu yendla na Abrahamu,+ Izaki+ na Yakobe.+ A a nga swi lavi ku va helisa naswona a nga va kohlwanga anze namuntlha.
24 Nkama Azayele hosi ya Siriya a nga fa, Benadadi n’wana wa yena a ve hosi.
25 Se Yehowaxi n’wana wa Yehowazi a teka madoropa lawa Benadadi n’wana wa Azayele a nga ma teka nkama a nga hlula Yehowazi papayi wa yena. Yehowaxi a mu hlule kanharhu+ a tlhela a teka madoropa ya Israyele lawa a va ma tekile.
Tinhlamunselu ta le hansi
^ Vona Ntlhamuselo.
^ Kumbe: “tin’qolo; makalichi”.
^ Ku nga Yerobuwamu wa wumbirhi.
^ Hi Xiheberu: “Papayi, papayi!”
^ Kumbe: “maflexa.”
^ Swi tikomba ku li wheti ya Abibi (Kumbe Nisani ya Kalendariyu la Xiyuda). Vona Xiyengetelo B15.