Tihosi Ta Wumbirhi 14:1-29
14 Hi lembe la wumbirhi la ku fuma ka Yehowaxi+ n’wana wa Yehowazi hosi ya Israyele, Amaziya n’wana wa Yehowaxi hosi ya Yuda a ve hosi.
2 A a ni 25 wa malembe nkama a nga va hosi naswona a fume 29 wa malembe aYerusalema. Vito la mamani wa yena a ku li Yehodini lweyi a a psaliwe Yerusalema.+
3 A tame a yendlela Yehovha minchumu yayinene, kambe a a nga fani na Davhida+ vhovho wa yena. A yendle hinkwaswu leswi papayi wa yena Yehowaxi a nga swi yendla.+
4 Kambe tindhawu ta ku tlakuka leti a ku gandzeliwa ka tona a ti susiwanga+ naswona vanhu a va yendla magandzelo ka tona va tlhela va yendla swaku ximusi xa magandzelo wolawo xi ya ka swikwembu swa vona.+
5 Hi ku hantlisa nkama mfumu wa yena wu nga sungula ku tiya, a dlaye vatirhi va yena lava va nga dlaya papayi wa yena lweyi a a li hosi.+
6 Kambe a nga va dlayanga vana va vona, hi ku ya hi leswi Yehovha a nga swi hlaya ka buku la Nawu wa Moxe loko a ku: “Vapapayi a va fanelanga va dlayiwa hi mhaka ya swidjoho swa vana va vona na vona vana a va fanelanga va dlayiwa hi mhaka ya swidjoho swa vapapayi va vona; mun’wani ni mun’wani a ta fela xidjoho xa yena.”+
7 A dlaye Vaedomu+ ka Nkova wa Munyu,+ a ku li 10.000 wa vavanuna. A tlhele a teka doropa la Sela+ li gama li chuliwa swaku i Yokiteli anze namuntlha.
8 Se Amaziya a rhuma vanhu swaku va ya ka Yehowaxi n’wana wa Yehowazi n’wana wa Yewu hosi ya Israyele va ya ku: “Tani, a hi tlhangane swaku hi ta lwa.”+
9 Yehowaxi hosi ya Israyele a rhuma vanhu swaku va ya ka Amaziya hosi ya Yuda va ya ku: “Xinsinyani xa mimintwa xa le Lebanoni xi rhumele rito ka nsinya wa mukedari wa le Lebanoni xi ku: ‘Tshika n’wana wa wena swaku a va nsati wa n’wana wa mina.’ Kambe xiharhi xa nhova xa le Lebanoni xi hundza xi psanyetela xinsinyani xa mimintwa.
10 I ntiyiso swaku u hlule Edomu+ naswona leswo swi ku yendle u tibyela. Tsaka hi swona, kambe tshama ka yindlo ya wena. Hi mhaka muni u lava ku tivitanela khombo u wa, u tlhela u wisa ni Yuda?”
11 Kambe Amaziya a nga yingisanga.+
Kutani Yehowaxi hosi ya Israyele a ya kumana na Amaziya hosi ya Yuda aBeti-Xemexi+ ku nga doropa la Yuda, va gama va sungula ku lwa.+
12 Tiko la Israyele li hlula tiko la Yuda, se va gama va baleka mun’wani ni mun’wani a ya kaya* ka yena.
13 Yehowaxi hosi ya Israyele a khoma Amaziya hosi ya Yuda, n’wana wa Yehowaxi, n’wana wa Akaziya aBeti-Xemexi. Va game va ya Yerusalema va fika va diliza muru wa Yerusalema, ka ndhawu leyi ringanaka kolomuyani ka 178 wa mametru* ku sukela ka nyanghwa lowu vitaniwaka Nyanghwa wa Efrayimi,+ ku ya fika ka nyanghwa lowu vitaniwaka Nyanghwa wa le ka Ponta.+
14 A teke woru hinkwalu, prata ni xuma hinkwaxu lexi a xi li ka yindlo ya Yehovha ni lexi a xi li lani ku vekiwaka xuma ka yindlo ya wuhosi. A tlhele a teka ni vanhu lava a nga va khoma a gama a tlhela a ya Samariya.
15 Timhaka hinkwatu ta wutomi la Yehowaxi, leswi a nga swi yendla ni mintirho ya yena ni leswi a nga lwisa xiswona na Amaziya hosi ya Yuda, swi tsaliwile ka buku leli vulavulaka hi wutomi la tihosi ta Israyele.
16 Yehowaxi a lahliwe lani vavhovho va yena va nga lahliwa kona aSamariya+ lomu tihosi ta Israyele ti nga lahliwa kona; se Yerobuwamu*+ n’wana wa yena a va hosi.
17 Amaziya+ n’wana wa Yehowaxi hosi ya Yuda a hanye 15 wa malembe loko se Yehowaxi+ n’wana wa Yehowazi hosi ya Israyele a file.+
18 Timhaka hinkwatu ta wutomi la Amaziya, ti tsaliwile ka buku leli vulavulaka hi wutomi la tihosi ta Yuda.
19 Hi ku famba ka nkama, va mu hambela planu*+ la ku mu dlaya aYerusalema, se a baleka a ya Lakixi, kambe va rhuma vanhu swaku va mu landza, va fika va mu dlaya koseniya.
20 Kutani va vuya na yena na va mu pakele ka makavhalu naswona a lahliwe Yerusalema lani vavhovho va yena va nga lahliwa kona ka Doropa la Davhida.+
21 Vanhu hinkwavu va Yuda va gama va teka Azariya*+ lweyi a a ni 16 wa malembe,+ va mu veka swaku a va hosi, a pfaleta Amaziya papayi wa yena.+
22 A tlhele a yaka doropa la Elati+ a li tlhelisela aYuda loko hosi Amaziya se a lahliwile lani vavhovho va yena va nga lahliwa kona.+
23 Hi lembe la wu 15 la ku fuma ka Amaziya n’wana wa Yehowaxi hosi ya Yuda, Yerobuwamu+ n’wana wa Yehowaxi hosi ya Israyele a ve hosi aSamariya naswona a fume 41 wa malembe.
24 A tame a yendlela Yehovha swa ku biha. A nga swi tshikanga swidjoho leswi Yerobuwamu n’wana wa Nebati, a nga djohisa Israyele hi swona.+
25 A yendle swaku tiko la Israyele li gamela lani a li gamela kona khale ku sukela aLebo-Amati*+ ku ya ka Lwandle la Araba,*+ hi ku ya hi leswi Yehovha Xikwembu xa Israyele a nga swi hlaya hi ku tirhisa mutirheli wa yena Yonasi+ n’wana wa Amitayi, ku nga muprofeta lweyi a nga psaliwa aGati-Heferi.+
26 Hikusa Yehovha a vone leswi Vayisrayele a va xanisekisa swona.+ Phela a ku nga na munhu lweyi a a ta pfuna Vayisrayele, hambi xisiwana kumbe munhu wa ku kala a nga pfuni nchumu.
27 Kambe Yehovha a a tshembise swaku a nga ta li helisa vito la Israyele amisaveni.+ Se a va ponisa hi ku tirhisa Yerobuwamu n’wana wa Yehowaxi.+
28 Timhaka hinkwatu ta wutomi la Yerobuwamu, hinkwaswu leswi a nga swi yendla, mintirho ya yena, ni leswi a nga swi yendla swaku a tlhelisa doropa la Damaxka+ ni la Amati+ aYuda ni Israyele, swi tsaliwile ka buku leli vulavulaka hi wutomi la tihosi ta Israyele.
29 Yerobuwamu a lahliwe lani vavhovho va yena va nga lahliwa kona lomu tihosi ta Israyele ti nga lahliwa kona; se Zakariya+ n’wana wa yena a va hosi.
Tinhlamunselu ta le hansi
^ Hi Xiheberu: “tende”.
^ Hi Xiheberu: “400 wa swisungunu”. Vona Xiyengetelo B14.
^ Ku nga Yerobuwamu wa wumbirhi.
^ Kumbe: “kungu”.
^ Leswi vulaka “Yehovha A Pfunile”. A vitaniwa Uziya ka 2Tih 15:13; 2Tik 26:1-23; Esa 6:1 na Zak 14:5.
^ Ku nga Lwandle la Munyu kumbe Lwandle la Ku Fa.
^ Kumbe: “ka nyanghwa wa Amati”.
