Tihosi Ta Wumbirhi 15:1-38
15 Hi lembe la wu 27 la ku fuma ka Yerobuwamu* hosi ya Israyele Azariya*+ n’wana wa Amaziya+ hosi ya Yuda a ve hosi.+
2 Nkama a nga va hosi a a ni 16 wa malembe naswona a fume 52 wa malembe aYerusalema. Vito la mamani wa yena a ku li Yekoliya lweyi a a psaliwe Yerusalema.
3 A tame a yendlela Yehovha minchumu yayinene, ku fana ni leswi Amaziya papayi wa yena a nga yendlisa xiswona.+
4 Kambe tindhawu ta ku tlakuka leti a ku gandzeliwa ka tona a ti susiwanga+ naswona vanhu a va tama va yendla magandzelo ka tona va tlhela va yendla swaku ximusi xa magandzelo wolawo xi ya ka swikwembu swa vona.+
5 Yehovha a khatisa hosi yi va ni mavabyi ya nhlokonho*+ anze yi fa; naswona a yi tshama ka yindlo yin’wani+ kasi n’wana wa yona Yothamu+ a a tshama ka yindlo ya wuhosi, a yavanyisa vanhu va tiko.+
6 Timhaka hinkwatu ta wutomi la Azariya,+ ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.
7 Se Azariya a fa a ya lahliwa lani vavhovho va yena+ va nga lahliwa kona ka Doropa la Davhida; kutani Yothamu n’wana wa yena a va hosi.
8 Hi lembe la wu 38 la ku fuma ka Azariya+ hosi ya Yuda, Zakariya+ n’wana wa Yerobuwamu a ve hosi ya Israyele aSamariya naswona a fume 6 wa tiwheti.
9 A djohele Yehovha ku fana ni leswi vavhovho va yena va nga swi yendla. A nga swi tshikanga swidjoho swa Yerobuwamu n’wana wa Nebati, leswi a nga djohisa Vayisrayele hi swona.+
10 Kutani Xalumi n’wana wa Yabexi a mu djikela, a gama a mu dlaya+ aIbileyami.+ Loko se a mu dlayile yena a va hosi.
11 Timhaka hinkwatu ta wutomi la Zakariya, ti tsaliwile ka buku leli vulavulaka hi wutomi la tihosi ta Israyele.
12 Ku yendleke leswi Yehovha a nga swi byela Yewu a ku: “Vana va wena, vatukulu va wena, vana va vatukulu va wena ni vana va vana va vatukulu va wena+ va ta fuma aIsrayele hi mhaka ya wena.”+ Hi swoleswo swi nga yendleka.
13 Xalumi n’wana wa Yabexi, a ve hosi hi lembe la wu 39 la ku fuma ka Uziya+ hosi ya Yuda, naswona a fume wheti yin’we aSamariya.
14 Se Menahemi n’wana wa Gadi a ta hi le Tiraza+ a fika Samariya a dlaya Xalumi+ n’wana wa Yabexi. Loko se a mu dlayile, a va hosi.
15 Timhaka hinkwatu ta wutomi la Xalumi ni planu* leli a nga li yendla, swi tsaliwile ka buku leli vulavulaka hi wutomi la tihosi ta Israyele.
16 Ku ve hi nkama wolowo Menahemi a nga suka aTiraza a ya hlasela vanhu lava a va li ka doropa la Tifisa ni hinkwaswu leswi a swi li ka lona, hikusa va yale ku mu pfulela swipfalu swa doropa. A dumele doropa lolelo a tlhela a handzula makhwirhi ya vavasati lava a va ni tinyimba.
17 Hi lembe la wu 39 la ku fuma ka Azariya hosi ya Yuda, Menahemi n’wana wa Gadi a ve hosi ya Israyele naswona a fume 10 wa malembe aSamariya.
18 A tame a yendlela Yehovha swa ku biha wutomi la yena hinkwalu. A nga swi tshikanga swidjoho hinkwaswu swa Yerobuwamu n’wana wa Nebati, leswi a nga djohisa Vayisrayele hi swona.+
19 Ku te Puli+ hosi ya Asiriya ka tiko la Israyele se Menahemi a mu nyika 34.200 wa makilu* ya prata, swaku a ta mu pfuna leswaku mfumu wa yena wu ta tiya.+
20 A prata leli Menahemi a nga hakela hosi Puli hi lona, a li kume ka vavanuna va lisima ni va ku ganya+ lava a nga va hakelisa rhesa.* Wanuna mun’wani ni mun’wani a mu hakelise 50 wa swikhemu* swa prata swaku a ta kota ku hakela hosi ya Asiriya. Se hosi ya Asiriya yi tlhela funtshi a ya ha tshamanga tikweni.
21 Timhaka hinkwatu ta wutomi la Menahemi,+ ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
22 Menahemi a fa a gama a lahliwa lani ku nga lahliwa vavhovho va yena; se n’wana wa yena Pekayiya a va hosi.
23 Hi lembe la wu 50 la ku fuma ka Azariya hosi ya Yuda, Pekayiya n’wana wa Menahemi a ve hosi ya Israyele aSamariya, naswona a fume malembe mambirhi.
24 A tame a yendlela Yehovha swa ku biha. A yendle swidjoho leswi Yerobuwamu n’wana wa Nebati a nga djohisa Vayisrayele hi swona.+
25 Se mupfunisi wa yena Peka+ n’wana wa Remaliya a mu hambela planu, a gama a mu dlaya, a tlhela a dlaya na Argobi na Ariye* aSamariya ka prediyu* leli a li li ka yindlo ya wuhosi. A a li ni 50 wa vavanuna va Jiliyadi; loko se a mu dlayile a gama yena a va hosi.
26 Timhaka hinkwatu ta wutomi la Pekayiya, ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
27 Hi lembe la wu 52 la ku fuma ka Azariya hosi ya Yuda, Peka+ n’wana wa Remaliya a ve hosi ya Israyele aSamariya naswona a fume 20 wa malembe.
28 A tame a yendlela Yehovha swa ku biha. A nga swi tshikanga swidjoho leswi Yerobuwamu n’wana wa Nebati a nga djohisa Vayisrayele hi swona.+
29 Nkama a ku fuma Peka hosi ya Israyele, Tiglata-Pilizere+ hosi ya Asiriya a fike a hlasela a tlhela a teka madoropa ya Ijoni, Abel-Beti-Maka,+ Yanowa, Kedexi,+ Azora, Jiliyadi+ ni Galileya, ku nga tiko hinkwalu la vana va Naftali,+ a tlhele a teka lava a va tshama ka madoropa wolawo swaku va va swikarawa aAsiriya.+
30 Se Oxeya+ n’wana wa Elayi a djikela Peka n’wana wa Remaliya, a mu dlaya; a gama yena a va hosi hi lembe la wu 20 la ku fuma ka Yothamu+ n’wana wa Uziya.
31 Timhaka hinkwatu ta wutomi la Peka, ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Israyele.
32 Hi lembe la wumbirhi la ku fuma ka Peka n’wana wa Remaliya hosi ya Israyele, Yothamu+ n’wana wa Uziya+ hosi ya Yuda a ve hosi.
33 A a ni 25 wa malembe nkama a nga va hosi naswona a fume 16 wa malembe aYerusalema. Vito la mamani wa yena a ku li Yeruxa n’wana wa Zadoki.+
34 A tame a yendlela Yehovha minchumu yayinene ku fana ni leswi papayi wa yena Uziya a nga swi yendla.+
35 Kambe tindhawu ta ku tlakuka leti a ku gandzeliwa ka tona a ti susiwanga naswona vanhu a va yendla magandzelo ka tona va tlhela va yendla swaku ximusi xa magandzelo wolawo xi ya ka swikwembu swa vona.+ Yothamu hi yena a nga yaka nyanghwa wa le henhla wa yindlo ya Yehovha.+
36 Timhaka hinkwatu ta wutomi la Yothamu, ni leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.
37 Hi nkama wolowo Yehovha a sungula ku rhumela Rezini hosi ya Siriya na Peka+ n’wana wa Remaliya swaku va ya lwa na Yuda.+
38 Yothamu a fa a gama a lahliwa lani vavhovho va yena va nga lahliwa kona ka Doropa la Davhida vhovho wa yena. Se Akazi n’wana wa yena a va hosi.
Tinhlamunselu ta le hansi
^ Ku nga: “Yerobuwamu wa wumbirhi”.
^ Leswi vulaka: “Yehovha A Pfunile”. A vitaniwa Uziya ka 2Tih 15:13; 2Tik 26:1-23; Esa 6:1 na Zak 14:5.
^ Kumbe: “lepra”. Ku nga muxaka wa mavabyi ya ku bola xikhumba. Vona Ntlhamuselo.
^ Kumbe: “kungu”.
^ Kumbe: “1.000 wa titalenta”. Vona Xiyengetelo B14.
^ Kumbe: “impoxtu; tinemba.”
^ Hi Xiheberu: “50 wa tixikele”. Vona Xiyengetelo B14.
^ Kumbexana: “Peka n’wana wa Remaliya xikan’we na Argobi na Ariye va hambe planu la ku dlaya hosi”.
^ Kumbe: “xihondzo; xitezi”.
