Tihosi Ta Wumbirhi 2:1-25
2 A nkama Yehovha a a li kusuhi ni ku teka Eliya+ hi ku tirhisa xidzedze+ swaku a ya mpfhukeni, Eliya na Elixa+ va sukile aJiligali.+
2 Eliya a byela Elixa a ku: “Ni kombela u sala lani, hikusa Yehovha a ni rhume Betele.” Kambe Elixa a hlamula a ku: “Na funga hi vito la Yehovha Xikwembu lexi hanyaka ni tlhela ni funga hi wena swaku ni ta famba na wena.” Va gama va famba va ya Betele.+
3 Vana va vaprofeta* lava a va li Betele va ya ka Elixa, va fika va mu vutisa va ku: “Wa swi tiva swaku namuntlha Yehovha a ta teka Eliya naswona a nga ha ta va murhangeli wa wena?”+ Yena a va hlamula a ku: “Na swi tiva. Miyelani.”
4 Eliya a tlhela a mu byela a ku: “Elixa, ni kombela u sala lani, hikusa Yehovha a ni rhume Yeriko.”+ Kambe Elixa a mu hlamula a ku: “Na funga hi vito la Yehovha Xikwembu lexi hanyaka ni tlhela ni funga hi wena swaku ni ta famba na wena.” Va gama va famba va ya Yeriko.
5 Vana va vaprofeta lava a va li Yeriko va ya ka Elixa, va fika va mu vutisa va ku: “Wa swi tiva swaku namuntlha Yehovha a ta teka Eliya naswona a nga ha ta va murhangeli wa wena?” Yena a va hlamula a ku: “Na swi tiva. Miyelani.”
6 Eliya a byela Elixa a ku: “Ni kombela u sala lani, hikusa Yehovha a ni rhume Yordani.” Kambe Elixa a ku: “Na funga hi vito la Yehovha Xikwembu lexi hanyaka ni tlhela ni funga hi wena swaku ni ta famba na wena.” Va gama va famba hi vambirhi ka vona.
7 Se 50 wa vana va vaprofeta na vona va famba va fika va nyima hi kulenyana ka ndhawu leyi a va ta kota ku va vona hi vambirhi loko va nyime Yordani.
8 Eliya a teka nguvu*+ ya yena a yi petsa a gama a ba mati hi yona, mati ma yavana ma ya ka tlhelo la ximatsi ni tlhelo la xinene, a gama yena na Elixa va tsemakanya ka misava ya ku woma.+
9 Hi ku kahlula nkama va nga tsemakanya, Eliya a byela Elixa a ku: “Kombela lexi u lavaka ni ku yendlela xona na ni nge se tekiwa ni ku siya.” Kutani Elixa a ku: “Ni kombela u ni nyika matimba*+ ka lawa Xikwembu xi nga ku nyika wona.”+
10 A mu hlamula a ku: “U kombele nchumu xa ku karhata. Loko wo ni vona nkama ni nga ta tekiwa ni ku siya, swi ta yendleka leswi u nga swi kombela; kambe loko wo kala u nga ni voni, a swi nga ta yendleka.”
11 A nkama a va ha famba na va bula, ku humelela nyolo* leyi a yi pfurha ndzilu, na yi ni makavhalu lawa a ma pfurha ndzilu,+ swi fika swi va hambanisa, se Eliya a famba a ya mpfhukeni a tekiwa hi xidzedze.+
12 Nkama Elixa a nga vona leswo a huwelela a ku: “Hosi ya mina, hosi ya mina!* Ni vona nyolo ya nyimpi ya Israyele ni vafambisi va yona va makavhalu!”+ A nkama a a nga ha mu voni Eliya, a khoma mpahla ya yena leyi a a yi yambalile a yi handzula hi xikarhi.+
13 A gama a teka nguvu*+ ya Eliya leyi yi nga mu wela a famba a ya nyima kusuhi ni Nambu wa Yordani.
14 Kutani a teka nguvu ya Eliya leyi yi nga mu wela, a ba mati hi yona a gama a ku: “A kwini Yehovha Xikwembu xa Eliya?” Nkama a nga ba mati, mati ma yavanile ma ya ka tlhelo la xinene ni la ximatsi, Elixa a gama a tsemakanya.+
15 Nkama vana va vaprofeta lava a va li Yeriko va nga mu vona na a ha li kule va te: “Matimba ya Xikwembu lawa a ma li ka Eliya se ma ka Elixa.”+ Va gama va mu tlhangaveta, va fika va khizama phambheni ka yena,
16 va mu byela va ku: “Hi lava, 50 wa vavanuna lava nga ni matimba lava nga na hina. Hi kombela u va rhuma swaku va ya lava Eliya. Swi nga yendleka xidzedze lexi nga vangiwa hi Yehovha xi mu tekile xi gama xi ya mu txukumeta ka yin’we ya tintshava kumbe ka wun’we wa minkova.”+ Kambe yena a va hlamula a ku: “Mi nga va rhumi.”
17 Kambe va tama va mu kombela a za a dana a gama a ku: “Va rhumeni.” Se va rhuma 50 wa vavanuna lava nga lavetela Eliya masiku manharhu, kambe va nga mu kumi.
18 Nkama va nga tlhela aYeriko,+ lani Elixa a a tshama kona, a va vutisile a ku: “A ni mi byelanga swaku mi nga fambi mi lavetela Eliya?”
19 Hi ku famba ka nkama vavanuna va Yeriko va byela Elixa va ku: “Wa swi vona swaku doropa leli i linene,+ kambe mati ya kona a hi manene ni misava ya kona loko ku byaliwa a yi humesi nchumu.”*
20 Kutani yena a ku: “Ni tiseleni xitijelana xa nyuwani mi tlhela mi chela munyu ka xona.” Va gama va mu tisela xona.
21 Se a ya ka xihlovo, a fika a chela munyu+ a gama a ku: “Yehovha a li: ‘Ni ma basisile mati lawa. A ma nge he dlayi munhu kumbe ku yendla swaku vanhu va nga psali.’”*
22 Ku sukela siku lelo anze namuntlha, mati ya kona ma ha li manene hi ku ya hi leswi Elixa a nga swi hlaya.
23 Loko se a suke lanu a ye Betele. Nkama na a famba, swifanyatana swin’wani leswi a swi li ka doropa swi huma, swi gama swi mu poyilela+ hi ku phindhaphindha swi ku: “Khupuka wena mpandlani! Khupuka wena mpandlani!”
24 A gama a ndzuluka a swi txuvuka a swi rhuka hi vito la Yehovha. Ku gama ku huma mawursu* mambirhi+ lawa a ma li khwatini, ma fika ma phatlulela swivanani leswiyani; hinkwaswu a swi li 42.+
25 Nkama a nga suka lanu a tame a famba a ya ka Ntshava ya Karmeli,+ se nkama a nga suka ka Ntshava ya Karmeli a tlhele a ya Samariya.
Tinhlamunselu ta le hansi
^ “Vana va vaprofeta” swi tikomba ku li xikola xa ku djondzisa vaprofeta kumbe ntlhanganu wa vaprofeta.
^ A ku li nguvu leyi a yi yambaliwa hi vaprofeta.
^ Hi Xiheberu: “swiyenge swimbirhi”.
^ Kumbe: “n’qolo; kalichi”.
^ Hi Xiheberu: “Papayi, papayi!”
^ A ku li nguvu leyi a yi yambaliwa hi vaprofeta.
^ Kumbexana: “yi yendla swaku vavasati va humeliwa hi tinyimba.”
^ Kumbexana: “ku humeliwa hi tinyimba.”
^ Kumbe: “mawursu ya xisati; tibere”.
