Tihosi Ta Wumbirhi 20:1-21
20 Ka masiku wolawo Hezekiya a vabya hintamu a za a va kusuhi ni ku fa.+ Se muprofeta Esaya n’wana wa Amozi a mu yela a fika a mu byela a ku: “Yehovha a li: ‘Byela vandjangu wa wena leswi va faneleke va sala va swi yendla loko se u file hikusa a wu nga ta hanya, u ta fa.’”+
2 Nkama a nga twa leswo a ndzuluka a txuvuka ka khumbi a gama a sungula ku khongela ka Yehovha a ku:
3 “Yehovha Xikwembu xa mina, ni kombela u khumbuka leswi ni nga ku tirhelisa xiswona hi ku tshembeka ni hi mbilu hinkwayu naswona ni ku yendlele minchumu yayinene.”+ Se Hezekiya a sungula ku rila hintamu.
4 Na Esaya a nge se fika ka kintari lowu nga xikarhi ka yindlo ya wuhosi, Yehovha a mu byela a ku:+
5 “Tlhela u ya byela Hezekiya lweyi a rhangelaka vanhu va mina u ku: ‘Yehovha Xikwembu xa Davhida vhovho wa wena a li: “Ni xi twile xikhongelo xa wena. Naswona ni yi vonile mihloti ya wena.+ Hi mhaka leyo ni ta ku hanyisa.+ Hi siku la wunharhu u ta famba u ya nghena ka yindlo ya mina Yehovha.+
6 Ni ta yengesela 15 wa malembe ka wutomi la wena naswona ni ta ku ponisa wena ni doropa leli ka hosi ya Asiriya,+ ni ta vhikela doropa leli hi mhaka ya vito la mina ni hi mhaka ya mutirheli wa mina Davhida.”’”+
7 Kutani Esaya a ku: “Tisani bolu leli nga hambiwa hi makuwa ya ku woma.” Se va li tisa va li bohelela henhla ka rhumba, Hezekiya a gama a hanya hi kutsongokutsongo.+
8 Hezekiya a a mu vutisile Esaya a ku: “Ni ta swi tivisa ku yini+ swaku Yehovha a ta ni hanyisa ni swaku ni ta ya ndlwini ya yena Yehovha hi siku la wunharhu?”
9 Esaya a ku: “Hi lexi xikombiso lexi taka hi ka Yehovha lexi nga ta ku komba swaku Yehovha a ta swi yendla leswi a nga swi hlaya: U lava swaku xindzhuti lexi xi nga kona ka swikada* xi ya phambheni kumbe xi ya ndzhaku hi 10 wa magansu?”*+
10 Hezekiya a ku: “A swi karhati swaku xindzhuti xi ya phambheni hi 10 wa magansu, kambe swa karhata swaku xi ya ndzhaku hi 10 wa magansu ka swikada.”
11 Se muprofeta Esaya a khongela ka Yehovha, kutani A yendla swaku xindzhuti lexi a xi li ka swikada swa Akazi, xi tlhelela ndzhaku hi 10 wa magansu hambileswi se a xi hundzile ka swikada swoleswo.+
12 Hi nkama wolowo Berodaki-Baladani hosi ya Babilona, n’wana wa Baladani, a rhumela makarta ni minchumu swaku va ya nyika Hezekiya, hikusa a a swi twile swaku Hezekiya wa vabya.+
13 Hezekiya a va yamukela se a va komba lani a vekaka kona xuma,+ ku nga prata, woru, mafurha ya balsamu, mafurha man’wani ya lisima, matlharhi ya yena ni minchumu hinkwayu leyi a yi li kona ka ndhawu leyi a a veka kona xuma. A va kombe hinkwaswu leswi a swi li ka yindlo ya yena ya wuhosi ni ka mfumu wa yena hinkwawu.
14 Muprofeta Esaya a gama a ya ka Hosi Hezekiya a fika a mu vutisa a ku: “Vavanuna lava va hlaye swa ku yini naswona va ta hi kwini?” Se Hezekiya a mu hlamula a ku: “Va ta hi ka tiko la kule, aBabilona.”+
15 A tlhela a vutisa a ku: “I mpsini leswi va nga swi vona ka yindlo ya wena?” Hezekiya a mu hlamula a ku: “Va vone minchumu hinkwayu leyi nga ka yindlo ya mina ya wuhosi. A ku na nchumu ni kalaka ni nga va kombanga ka ndhawu leyi ni vekaka xuma.”
16 Esaya a byela Hezekiya a ku: “Twana leswi Yehovha a swi hlayaka:+
17 ‘Yingisa! Ku ta fika nkama lowu hinkwaswu leswi nga ka yindlo ya wena ya wuhosi ni hinkwaswu leswi vavhovho va wena va nga swi siya anze namuntlha, swi nga ta tekiwa swi yisiwa Babilona.+ A ku nga ta sala nchumu,’ ku vula Yehovha.
18 ‘Naswona van’wani va vana va wena, va ta tekiwa+ swaku va ya tirha ka yindlo ya wuhosi aBabilona.’”+
19 Kutani Hezekiya a byela Esaya a ku: “Leswi Yehovha a nga swi hlaya i swinene.”+ A tlhela a ku: “Swi ta va swinene hikusa ku ta va ni ku rhula ni ku tshamiseka na na ha hanya.”+
20 Timhaka hinkwatu ta wutomi la Hezekiya, hinkwaswu leswi a nga swi yendla, leswi a nga yi yendlisa xiswona ndhawu ya ku hlayisa mati+ ni leswi a nga swi yendla swaku mati ma za ma fika ka doropa,+ swi tsaliwile ka buku leli vulavulaka hi wutomi la tihosi ta Yuda.
21 Se Hezekiya a fa, a lahliwa lani ku nga lahliwa kona vavhovho va yena;+ Manasi+ n’wana wa yena a gama a va hosi.+
Tinhlamunselu ta le hansi
^ Swi nga yendleka swikada a swi tirhiseleliwa ku tiva nkama.
^ Kumbe: “mapasu.”
