Tihosi Ta Wumbirhi 23:1-37
23 Hosi yi rhuma vanhu swaku va ya vitana madoda hinkwawu ya Yuda ni ya Yerusalema.+
2 Hosi yi gama yi ya ka yindlo ya Yehovha ni vavanuna hinkwavu va Yuda, hinkwavu lava va tshamaka Yerusalema, vaprista ni vaprofeta ni vanhu hinkwavu, ku sukela ka wamutsongo ku ya ka wamukulu. Yi lerhela vanhu hinkwaswu leswi nga tsaliwa ka buku+ la ntwananu+ leli nga kumiwa ka yindlo ya Yehovha.+
3 A hosi yi nyima kusuhi ni pilari yi yendla ntwananu phambheni ka Yehovha+ yi tshembisa Yehovha swaku yi ta yingisa minawu ya yena hinkwayu, yi tlhela yi yendla hinkwaswu leswi a swi hlayaka hi mbilu hinkwayu ni hi wutomi la yona hinkwalu, hi ku yendla hinkwaswu* leswi yi nga swi tshembisa ka ntwananu lowu, leswi nga tsaliwa ka buku leli. Se vanhu hinkwavu va pfumelelana ni ntwananu lowu.+
4 Hosi yi byela muprista wamukulu Hilikiya,+ vaprista van’wani ni lava a va vonelela nyanghwa, swaku va humesa minchumu hinkwayu leyi a yi li ka tempele ya Yehovha, leyi a yi yendleliwe Bali, leyi a yi yendleliwe mhandzi ya Axera*+ ni leyi a yi yendleliwe ku gandzela dlambu, n’weti ni tinyeleti hinkwatu ta le tilweni. Kutani hosi yi swi hisa handle ka doropa la Yerusalema, ka masimu ya Kedroni yi gama yi teka nkuma wa kona yi wu yisa Betele.+
5 Yi hlongole vaprista va swikwembu swa mavunhwa, lava a va langiwe hi tihosi ta Yuda swaku va yendla magandzelo ka tindhawu ta ku tlakuka ta madoropa ya Yuda ni ka tindhawu ta le kusuhi ni Yerusalema; yi tlhele yi hlongola ni lava a va yendlela Bali magandzelo, va tlhela va gandzela dlambu, n’weti, ni tinyeleti hinkwatu ti nga matilweni.+
6 Yi humese mhandzi ya Axera*+ ka yindlo ya Yehovha yi ya yi veka handle ka doropa la Yerusalema, yi yi hisa+ ka Nkova wa Kedroni, yi tlhela yi yi sila yi va mpupu yi gama yi teka mpupu wa kona yi wu hlwanya henhla ka masirha ya vanhu lava va kalaka va nga li tihosi.+
7 Yi tlhele yi dilizela tiyindlo ta vavanuna lava a va yendla wunghwavani+ ka tempele, leti a ti li ka yindlo ya Yehovha ni ndhawu leyi vavasati a va lukela ka yona matende lawa a ma tirhiseliwa ku gandzela mhandzi ya Axera.*
8 Se yi vitana vaprista hinkwavu va doropa la Yuda, yi tlhela yi wonhetela tindhawu ta ku tlakuka leti vaprista a va yendlela ka tona magandzelo, ku sukela aJeba+ ku ya fika aBerxeba.+ Yi tlhela yi dilizela tindhawu ta ku tlakuka leti a ti li ka nyanghwa wa Yoxuwa lweyi a a li murhangeli wa doropa, leti a ti li ka tlhelo la ximatsi loko munhu a nghena ka doropa.
9 Vaprista lava a va gandzela ka tindhawu ta ku tlakuka a va nga gandzeli ka altari ya Yehovha aYerusalema,+ kambe a va dla mapawu lama kalaka ma nga na fermentu ni vamakwavu.
10 Hosi yi tlhele yi tshikisa vanhu ku yendla magandzelo aTofeti+ ku nga ndhawu leyi nga ka Nkova wa Vana va Hinomi,*+ swaku ku nga vi na munhu lweyi a hisaka n’wana wa yena wa djaha kumbe wa ntombhi hi ndzilu a yendlela Moleki+ magandzelo.
11 A hosi a yi pfumelanga swaku makavhalu lawa tihosi ta Yuda ti nga ma nyikela swaku ma tirhisiwa loko ku gandzeliwa dlambu, ma nghena ka yindlo ya Yehovha hi ka kwartu* la Natani-Meleki lweyi a a tirha ka yindlo ya wuhosi. Kwartu leli a li li kusuhi ni yindlo ya mapilari; yi tlhele yi helisa tinyolo* ta nyimpi leti a ti tirhisiwa ka ku gandzela dlambu.+
12 A hosi yi tlhele yi dilizela maaltari lawa tihosi ta Yuda a ti ma yakile ahenhla+ ka kwartu la le henhla la Akazi, ku patsa ni maaltari lama nga yakiwa hi Manasi ka mikintari yimbirhi ya yindlo ya Yehovha.+ Yi ma dilizela yi gama yi hlwanya mpupu wa wona ka Nkova wa Kedroni.
13 Yi tlhele yi wonhetela tindhawu ta ku tlakuka, leti a ku gandzeliwa ka tona leti a ti li phambheni ka Yerusalema, ka tlhelo la sul* la Ntshava ya Mawolivhera,* leti Solomoni hosi ya Israyele a nga ti yakela Axitoreti, ku nga xikwembu xa xisati xa ku nyenyentsa xa Vasidoni; na Kemoxi xikwembu xa ku nyenyentsa xa Vamowabu; na Milikomi+ xikwembu xa ku nyenyentsa xa Vaamoni.+
14 Yi wise mapilari lawa va nga ma hamba swikwembu, yi wisa ni timhandzi ta Axera*+ yi gama yi chela marhambu ya manyingi ya vanhu ka tindhawu toleto.
15 Yi tlhele yi dilizela altari leyi a yi li Betele, ni ndhawu ya ku tlakuka leyi Yerobuwamu n’wana wa Nebati a nga yi yendla swaku a djohisa Vayisrayele.+ Loko yi gamile ku dilizela altari yoleyo ni ndhawu leyi ya ku tlakuka, yi hise ndhawu ya ku tlakuka, yi yi sila yi va mpupu yi tlhela yi hisa mhandzi ya Axera.*+
16 A nkama Yosiya a nga ndzuluka a vona masirha lawa a ma li ka ntshava, a rhume vanhu swaku va teka marhambu lama nga ka wona ma gama ma hisiwa ka altari, swaku ku nga ha gandzeliwi ka yona, hi ku ya hi leswi Yehovha a nga swi hlaya hi ku tirhisa mutirheli wa yena, lweyi a nga profeta swaku swilo leswi a swi ta yendleka.+
17 A gama a vutisa a ku: “Sirha leli ni li vonaka lahayani i la mani?” Vavanuna va doropa va mu hlamula va ku: “I sirha la mutirheli wa Xikwembu xa ntiyiso lweyi a a li wa Yuda,+ lweyi a nga profeta leswi u nga swi yendla ka altari la le Betele.”
18 Se a ku: “Mu tshikeni a humula naswona mi nga tshikeni munhu a khumba marhambu ya yena.” A va ma khumbanga marhambu ya yena ni ya muprofeta lweyi a a li wa Samariya.+
19 Yosiya a tlhele a dilizela tiyindlo hinkwatu ta ku gandzela ka tona leti a ti li ka tindhawu ta ku tlakuka ka madoropa ya Samariya,+ leti tihosi ta Israyele ti nga ti yaka swaku ti kwatisa Xikwembu; a yendle swa ku fana ni leswi a nga swi yendla ka ndhawu ya ku tlakuka ya Betele.+
20 A tlhele a yendla gandzelo ka maaltari wolawo hi vaprista hinkwavu lava a va li kolanu lava a va gandzela ka tindhawu ta ku tlakuka, a tlhela a hisa ni marhambu ya vanhu ka wona.+ A gama a tlhela a ya Yerusalema.
21 Hosi yi byela vanhu hinkwavu yi ku: “Yendlelani Yehovha Xikwembu xa n’wina a Paxkwa,+ hi ku ya hi leswi nga tsaliwa ka buku leli la ntwananu.”+
22 A ku se tshama ku yendliwa Paxkwa la ku fana na lona ku sukela ka nkama wa vayavanyisi lava a va yavanyisa Israyele, kumbe ka masiku hinkwawu ya tihosi ta Israyele ni ta Yuda.+
23 Kambe hi lembe la wu 18 la ku fuma ka Hosi Yosiya, a Paxkwa leli, leli nga yendleliwa Yehovha li yendliwe aYerusalema.
24 Yosiya a tlhela a susa tinyanga, lava va ku femba,+ swifaniso swa terafimi,*+ swifaniso swa mavunhwa leswi nyenyentsaka ni minchumu hinkwayu ya ku nyenyentsa* leyi a yi li ka tiko la Yuda ni le Yerusalema, swaku a yendla leswi nga tsaliwa ka buku la Nawu+ leli nga kumiwa hi muprista Hilikiya ka yindlo ya Yehovha.+
25 A ku vanga ni hosi ya ku fana na yena ka tihosi leti nga va kona na yena a nge se fuma, leyi nga tirhela Yehovha hi mbilu ya yona hinkwayu, hi wutomi la yona hinkwalu+ ni hi matimba ya yona hinkwawu, hi ku landza Nawu hinkwawu wa Moxe; naswona a ku vanga ni hosi yin’wani ya ku fana na yena loko se a file.
26 Kambe Yehovha a nga tshikanga ku kwatela Yuda hi mhaka ya minchumu hinkwayu ya ku vavisa leyi Manasi a nga yi yendla swaku a mu kwatisa.+
27 Yehovha a ku: “Na yena Yuda ni ta mu susa phambheni ka mina,+ ku fana ni leswi ni nga swi yendla ka Israyele;+ naswona ni ta tshika doropa leli, leli ni nga li langa ku nga Yerusalema, ni yindlo leyi ni nga hlaya ni ku: ‘Vito la mina li ta tshama kona.’”+
28 Timhaka hinkwatu ta wutomi la Yosiya ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.
29 Ka masiku ya ku fuma ka yena, Faru Neko hosi ya Gibita a yile ka Nambu wa Ewufrata swaku a ya tlhangana ni hosi ya Asiriya, se Hosi Yosiya a huma swaku a ya lwa na yena; kambe nkama Neko a nga mu vona a mu dlayile aMejido.+
30 Vatirhi va yena va teka ntsumbu wa yena va wu pakela ka nyolo va suka Mejido va ya Yerusalema, va ya wu lahla ka sirha la yena. Kutani vanhu va tiko la Yuda va teka Yehowazi n’wana wa Yosiya va mu veka swaku a va hosi a pfaleta papayi wa yena.+
31 Yehowazi+ a a ni 23 wa malembe nkama a nga va hosi naswona a fume tiwheti tinharhu aYerusalema. Vito la mamani wa yena a ku li Amutala+ n’wana wa Yeremiya wa le Libina.
32 A sungule ku yendlela Yehovha swa ku biha, hi ku yendla hinkwaswu leswi vavhovho va yena va nga swi yendla.+
33 Faru Neko+ a mu pfalela Ribala,+ ka tiko la Amati leswaku a nga fumi Yerusalema, a gama a sindzisa vanhu va tiko la Yuda swaku va hakela 3.420 wa makilu* ya prata ni 34,2 wa makilu* ya woru.+
34 Faru Neko a gama a veka Eliyakimi n’wana wa Yosiya swaku a va hosi a pfaleta Yosiya papayi wa yena a tlhela a txintxa vito la yena li va Yoyakimi; kambe a teka Yehowazi a mu yisa Gibita,+ lani a nga gama a fela kona.+
35 Yoyakimi a nyike Faru woru ni prata, kambe a boheke ku hakelisa vanhu va tiko a rhesa* hi prata swaku a ta hakela Faru. A tlhele a byela vanhu hinkwavu va tiko swaku va humesa prata ni woru swaku swi ta nyikiwa Faru Neko.
36 Yoyakimi+ a a ni 25 wa malembe nkama a nga va hosi naswona a fume 11 wa malembe aYerusalema.+ Vito la mamani wa yena a ku li Zebida n’wana wa Pedaya lweyi a a tshama aRuma.
37 A tame a yendlela Yehovha swilo swa ku biha,+ hi ku yendla hinkwaswu leswi vavhovho va yena va nga swi yendla.+
Tinhlamunselu ta le hansi
^ Ku nga swiboho ni switsundzuxu swa Xikwembu.
^ Vona Ntlhamuselo.
^ Vona Ntlhamuselo.
^ Vona Ntlhamuselo.
^ Vona Ntlhamuselo ka rito “Gehena”.
^ Kumbe: “sala la ku dlela ka lona”.
^ Kumbe: “tin’qolo; makalichi”.
^ Kumbe: “dzongeni”.
^ Kumbe: “Ntshava ya Ku Helisa”.
^ Vona Ntlhamuselo.
^ Vona Ntlhamuselo.
^ Rito la Xiheberu li nga tirhisiwa lani, li nga ha fambisana ni rito leli vulaka “chaka la munhu kumbe la xiharhi,” funtshi li tirhiseliwa ku kombetela ka xiyeyiso.
^ Kumbe: “swikwembu swa ndjangu; swifaniso swa mavunhwa”.
^ Hi Xiheberu: “100 wa titalenta”. Vona Xiyengetelo B14.
^ Hi Xiheberu: “talenta yin’we”. Vona Xiyengetelo B14.
^ Kumbe: “impoxtu; tinemba”.
