Tihosi Ta Wumbirhi 24:1-20
24 A nkama a ku fuma Yoyakimi, Nebukadinazara+ hosi ya le Babilona a tile swaku a ta lwa na yena. Se Yoyakimi a tirhela hosi Nebukadinazara malembe manharhu, kambe a gama a mu djikela.
2 Kutani Yehovha a sungula ku rhumela mintlawa ya masonchwa lawa a ma teketela minchumu ya vanhu swaku ma lwa na Yoyakimi. A ku li masonchwa ya Vakalidiya,+ Vaasiriya, Vamowabu ni Vaamoni. A tame a ma rhumela swaku ma ya hlasela doropa la Yuda ma li helisa, hi ku ya hi leswi yena Yehovha a nga swi hlaya+ hi ku tirhisa vanhu va yena ku nga vaprofeta.
3 Ku yendleke leswi Yehovha a nga swi hlaya swaku a swi ta yendleka hi Yuda, swaku a a ta li susa doropa leli phambheni ka yena+ hi mhaka ya swidjoho leswi Manasi a nga swi yendla+
4 ni hi mhaka ya leswi a nga dlaya vanhu va ku kala va nga na nandzu+ a tlhela a tata Yerusalema hi ngati ya yinyingi naswona Yehovha a a nga lavi ku li rivalela tiko la Yuda.+
5 Timhaka hinkwatu ta wutomi la Yoyakimi, ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.+
6 Se Yoyakimi a fa a gama a lahliwa lani vavhovho va yena va nga lahliwa kona;+ Yoyakini n’wana wa yena a va hosi.
7 Hosi ya Gibita a ya ha tlhelanga yi huma ka tiko la yona yi ya lwa, hikusa hosi ya Babilona a yi teke minchumu hinkwayu ya hosi ya Gibita+ ku sukela ka Nkova wa Gibita+ ku ya fika ka Nambu wa Ewufrata.+
8 Yoyakini+ a a ni 18 wa malembe nkama a nga va hosi naswona a fume tiwheti tinharhu aYerusalema.+ Vito la mamani wa yena a ku li Nehuxita n’wana wa Elinatani wa le Yerusalema.
9 A tame a yendlela Yehovha swa ku biha hi ku yendla hinkwaswu leswi papayi wa yena a nga swi yendla.
10 Hi nkama wolowo, vatirhi va Nebukadinazara hosi ya Babilona va ye Yerusalema va fika va rhendzela doropa.+
11 Nebukadinazara hosi ya Babilona na yena a yile ka doropa la Yerusalema nkama vatirhi va yena a va li pfalile ka matlhelo hinkwawu.
12 Se Yoyakini hosi ya Yuda a tinyikela ka hosi ya Babilona+ na a li ni mamani wa yena, vatirhi va yena, varhangeli ni vanhu lava a va tirha ka yindlo ya wuhosi;+ kutani hi lembe la wu 8 la ku fuma ka yona, hosi ya Babilona yi mu khoma yi mu yisa awukaraweni.+
13 Yi teke minchumu hinkwayu ya lisima leyi a yi li ka yindlo ya Yehovha ni ka yindlo ya wuhosi.+ Yi tlhele yi fayetela swibya hinkwaswu swa ku yendliwa hi woru leswi Solomoni hosi ya Israyele a a swi yendlile swaku swi tirhisiwa ka tempele ya Yehovha.+ Leswi swi yendleke hi ku ya hi leswi Yehovha a nga swi hlaya.
14 Yi teke vanhu hinkwavu va le Yerusalema, varhangeli hinkwavu,+ masonchwa hinkwawu ya matimba, lava va kotaka ku yendla mintirho ya mavoko ni lava va kotaka ku yendla minchumu hi nsimbi,+ yi va yisa awukaraweni. Hinkwavu a va li 10.000. A ku siyiwanga munhu tikweni, ku yo siyiwa lava a va li swisiwana swa wugamu ntsena.+
15 Yi teka Yoyakini+ yi mu yisa awukaraweni aBabilona;+ yi tlhela yi teka mamani wa yena, vasati va yena, vanhu lava a va tirha ka yindlo ya wuhosi ni vavanuna lava a va tiviwa hintamu atikweni, yi va yisa awukaraweni va suka Yerusalema va ya Babilona.
16 Hosi ya Babilona yi tlhele yi teka 7.000 wa tinhenha ta matimba ni 1.000 wa vanhu lava tivaka ku yendla ntirho wa mavoko ni lava kotaka ku yendla minchumu hi nsimbi, yi va yisa awukaraweni aBabilona. Hinkwavu a va li vavanuna va ntamu lava a va djondzisiwe ku lwa nyimpi.
17 Hosi ya Babilona yi tlhele yi veka Mataniya makwavu wa papayi wa Yoyakini+ swaku a va hosi yi gama yi txintxa vito la yena yi mu chula swaku i Zedekiya.+
18 Zedekiya a a ni 21 wa malembe nkama a nga va hosi, naswona a fume 11 wa malembe aYerusalema. Vito la mamani wa yena a ku li Amutala+ n’wana wa Yeremiya wa le Libina.
19 A tame a yendlela Yehovha swa ku biha, hi ku yendla hinkwaswu leswi Yoyakimi a nga swi yendla.+
20 Leswi swi yendleke aYerusalema ni le Yuda hi mhaka ya leswi Yehovha a a kwatile hintamu, a za a va susa phambheni ka yena.+ Se Zedekiya a djikela hosi ya Babilona.+
