Tihosi Ta Wumbirhi 25:1-30
25 Hi lembe la wu 9 la ku fuma ka Zedekiya, hi siku la wu 10 ka wheti ya wu 10, Nebukadinazara+ hosi ya Babilona a te ni masonchwa ya yena hinkwawu swaku a ta lwa ni Yerusalema.+ A fike a gwimba matende a gama a sungula ku yaka muru a pfala matlhelo hinkwawu ya doropa.+
2 A pfale matlhelo hinkwawu ya doropa anze hi lembe la wu 11 la ku fuma ka Hosi Zedekiya.
3 Hi siku la wu 9 ka wheti ya wu 4, ku ve ni ndlala yayikulu hintamu+ ka doropa va za vanhu va sala va nga ha na swakudla atikweni.+
4 Se ku boxiwa muru wa doropa,+ masonchwa hinkwawu ma gama ma baleka niwusiku ma huma hi nyanghwa lowu nga xikarhi ka mimuru yimbirhi akusuhi ni jardim la hosi, leswo swi yendleke hi nkama lowu Vakalidiya a va pfale matlhelo hinkwawu ya doropa; se hosi yi famba hi ndlela leyi yi yaka aAraba.+
5 Kambe masonchwa ya Vakalidiya ma hlongolisa hosi, ma fika ma yi kuma amananga ya Yeriko, masonchwa ya yona hinkwawu ma gama ma baleka ma yi siya.
6 Se ma khoma hosi+ ma yi yisa ka hosi ya Babilona aRibala, yi fika yi yavanyisiwa.
7 Va dlaye vana va Zedekiya na a swi vona; kutani Nebukadinazara a mu dlaya matihlo Zedekiya, a gama a mu boha hi machini ya kobre, a mu yisa Babilona.+
8 Hi siku la wu 7 ka wheti ya wu 5, ku nga lembe la wu 19 la ku fuma ka Nebukadinazara hosi ya Babilona, Nebuzaradani+ murhangeli wa vagwardu, lweyi a a tirhela hosi ya Babilona a ye Yerusalema.+
9 A fike a hisa yindlo ya Yehovha,+ ni yindlo ya wuhosi+ ku patsa ni tiyindlo hinkwatu leti a ti li Yerusalema;+ a tlhele a hisa ni tiyindlo hinkwatu ta vavanuna lava a va tiviwa hintamu.+
10 Masonchwa hinkwawu ya Vakalidiya lawa a ma li ni murhangeli wa vagwardu ma dilize mimuru leyi a yi pfale matlhelo hinkwawu ya Yerusalema.+
11 Nebuzaradani lweyi a a li murhangeli wa vagwardu a teke vanhu hinkwavu lava a va salile ka doropa, lava va nga tinyikela ka hosi ya Babilona ni vanhu hinkwavu lava a va tshama ka doropa a va yisa awukaraweni.+
12 Kambe murhangeli wa vagwardu a siye swisiwana atikweni swaku swi sala swi rima masimu ya mawuvha swi tlhela swi va swikarawa.+
13 Vakalidiya va fayetele mapilari ya kobre+ ya yindlo ya Yehovha, swikarinyani+ swa kobre ni tanki la kobre+ leswi a swi li ka yindlo ya Yehovha, va gama va teka kobre la kona va famba na lona aBabilona.+
14 Va tlhele va teka swa ku wolela nkuma, mafoxolo, swa ku tima hi swona ndzilu, tikopo ni swibya hinkwaswu swa kobre leswi a swi tirhisiwa atempeleni.
15 Murhangeli wa vagwardu a teke swa ku chela ka swona ndzilu ni matijela lawa ma nga yendliwa hi woru la lisima+ ni prata la lisima.+
16 A kobre leli ku nga yendliwa hi lona mapilari mambirhi, tanki la mati, ni swikarinyani leswi Solomoni a nga swi yendla swaku swi tirhisiwa ka yindlo ya Yehovha, a li li linyingi hintamu naswona a swi nga koteki ku li peza.+
17 Pilari ha lin’we a li lehe 8 wa mametru,+ ahenhla ka wona a ku ni swa ku sasekisa hi swona leswi nga yendliwa hi kobre naswona a swi lehe 1,3 metru, a maredi ni swifaniso swa ma romã leswi a swi li ka swa ku sasekisa hi swona leswi a swi li henhla ka mapilari, na swona a swi yendliwe hi kobre.+ Pilari la wumbirhi ni maredi ya lona a swi fana ni leli la ku sungula.
18 Murhangeli wa vagwardu a tlhele a teka Seraya+ lweyi a a li muprista wamukulu, na Sofaniya+ lweyi a a li muprista wa wumbirhi ku patsa ni vagwardu vanharhu lava a va vonelela tinyanghwa.+
19 A teke munhu mun’we lweyi a a tirha ka yindlo ya wuhosi lweyi a a rhangela masonchwa, 5 wa vavanuna lava a va li vanghanu va hosi lava nga kumiwa ka doropa, a tlhela a teka ni sekretariyu* wa murhangeli wa masonchwa lweyi a a hlengeleta vanhu swaku va ya wusonchweni ni 60 wa vavanuna lava va nga kumiwa adoropeni.
20 Nebuzaradani+ lweyi a a li murhangeli wa vagwardu a va tekile a famba na vona ka hosi ya Babilona aRibala.+
21 Hosi ya Babilona yi fike yi va dlaya aRibala ka tiko la Amati.+ Se Vayuda va tekisiwe xiswoleswo va ya wukaraweni.+
22 Nebukadinazara hosi ya Babilona a veka Gedaliya+ n’wana wa Ayikami+ n’wana wa Xafani+ swaku a va murhangeli wa vanhu lava va nga sala aYuda.+
23 A nkama varhangeli hinkwavu va masonchwa ni vanhu va vona va nga twa swaku hosi ya Babilona yi veke Gedaliya swaku a va murhangeli aYuda, va vhele va suka va ya ka Gedaliya aMizpa. A ku li Ismayeli n’wana wa Netaniya, Yohanani n’wana wa Kareya, Seraya n’wana wa Tanumeti wa le Netofa na Yazaniya n’wana wa Mukati ni vavanuna lava a va li na vona.+
24 Se Gedaliya a funga ka varhangeli va masonchwa ni vanhu va vona a ku: “Mi nga chavi ku tirhela Vakalidiya. Tshamani ka tiko leli, mi tirhela hosi ya Babilona, swi ta mi fambela kahle.”+
25 Hi wheti ya wu 7, Ismayeli+ n’wana wa Netaniya n’wana wa Elixama lweyi a a li n’wana wa le wuhosini, a fambe ni 10 wa vavanuna, va fika va dlaya Gedaliya, ku patsa ni Vayuda ni Vakalidiya lava a va li na yena aMizpa.+
26 Se vanhu hinkwavu ku sukela ka wamutsongo ku ya ka wamukulu ku patsa ni varhangeli va masonchwa va baleka va ya Gibita,+ hikusa a va chava Vakalidiya.+
27 Hi siku la wu 27 ka wheti ya wu 12 ka lembe la wu 37 na Yoyakini+ hosi ya Yuda a li wukaraweni, Evhil-Merodaki a vekiwile swaku a va hosi ya Babilona, hi lembe lolelo a humese Yoyakini hosi ya Yuda adjele.+
28 A ve ni timpsalu ka yena se a mu tlakusa henhla ka tihosi letin’wani leti a ti li na yena aBabilona.
29 Kutani Yoyakini a nyikiwa mpahla ya nyuwani swaku a txintxa leyi a a yi yambala adjele naswona a a hamba a dla ka meza wa hosi anze a fa.
30 A a nyikiwa swakudla leswi taka hi ka hosi siku ni siku, wutomi la yena hinkwalu.
Tinhlamunselu ta le hansi
^ Kumbe: “matsalana; mabalani”.
