Tihosi Ta Wumbirhi 3:1-27
3 Yehorama+ n’wana wa Akabu, a ve hosi ya Israyele aSamariya hi lembe la wu 18 la ku fuma ka Yehoxafati hosi ya Yuda naswona a fume 12 wa malembe.
2 A a tshamela ku yendlela Yehovha swa ku biha, kambe a nga yendlanga swa ku fana ni swa papayi wa yena kumbe mamani wa yena, hikusa a suse pilari la Bali leli nga yendliwa hi papayi wa yena.+
3 Kambe a yendle swidjoho swa ku fana ni leswi nga yendliwa hi Yerobuwamu n’wana wa Nebati leswi a nga djohisa Vayisrayele hi swona.+ A nga swi tshikanga.
4 Mexa hosi ya Mowabu a a ni tinyempfu ta tinyingi ta xinuna naswona a a hamba a hakela rhesa* ka hosi ya Israyele hi 100.000 wa swinyempfani ni 100.000 wa tinyempfu leti kalaka ti nga tsemetiwanga mavoya.
5 A nkama ku nga fa Akabu,+ hosi ya Mowabu yi sungula ku djikela hosi ya Israyele.+
6 Kutani Hosi Yehorama a huma Samariya hi siku lolelo a hlengeleta Vayisrayele hinkwavu,
7 a tlhela a rhuma vanhu swaku va ya ka Yehoxafati hosi ya Yuda va fika va ku: “Hosi ya Mowabu yi ni djikelile. Se u ta famba na mina hi ya lwa ni tiko la Mowabu?” A gama a hlamula a ku: “Ni ta famba na wena.+ Mina na wena hi van’we. Vanhu va mina i vanhu va wena. Makavhalu ya mina i makavhalu ya wena.”+
8 Kutani a mu vutisa a ku: “Hi ta famba hi ndlela yini?” A gama a mu hlamula a ku: “Hi ta famba hi ndlela leyi yaka mananga ya Edomu.”
9 Hosi ya Israyele, yi famba ni hosi ya Yuda ni hosi ya Edomu.+ Loko tihosi leti se ti fambe 7 wa masiku, mati ya masonchwa ni ya swifuyu leswi a ti famba na swona ma hela.
10 Hosi ya Israyele yi ku: “Leswi nga yendleka i khombo hikakunene! Hikusa Yehovha a hi patsile hina tihosi tinharhu swaku hi ta hluliwa hi hosi ya Mowabu!”
11 Nkama Yehoxafati a nga twa leswo a vutisa a ku: “A ku na muprofeta wa Yehovha lani, lweyi a nga hi vutiselaka swaku Yehovha a li yini?”+ Se mun’we wa vatirhi va hosi ya Israyele a hlamula a ku: “Ku na Elixa+ n’wana wa Xafati, lweyi a a li mupfunisi wa Eliya.”*+
12 Yehoxafati a ku: “Yehovha a tirhisa yena swaku a vulavula.” Kutani hosi ya Israyele na Yehoxafati ni hosi ya Edomu va ya ka Elixa.
13 Elixa a byela hosi ya Israyele a ku: “U tela yini ka mina?+ Famba ka vaprofeta va papayi wa wena ni vaprofeta va mamani wa wena.”+ Kambe hosi ya Israyele yi ku: “Ihim, hikusa i Yehovha a nga hi vitana hina tihosi tinharhu swaku hi ta hluliwa hi hosi ya Mowabu.”
14 Elixa a ku: “Na funga hi vito la Yehovha Xikwembu lexi hanyaka, murhangeli wa tintsumi lweyi ni mu tirhelaka, swaku loko a ku nga li hi mhaka ya Yehoxafati+ hosi ya Yuda lweyi ni mu hloniphaka, a ni nga ta ku txuvuka kumbe ku ku yingisa.+
15 Ni laveleni munhu lweyi a chayaka haripa.”+ Nkama munhu lweyi a nga sungula ku chaya haripa moya wa ku kwetsima wa Yehovha wu va ka Elixa.+
16 Se a ku: “Yehovha a li: ‘Txelani swikhele swa swinyingi ka nkova lowu,
17 hikusa Yehovha a li: “A mi nga ta vona moya naswona a mi nga ta vona mpfula; kambe nkova wu ta tala hi mati,+ se n’wina ni mintlhambi ya n’wina ni swifuyu swa n’wina mi ta ma nwa.”’
18 Kambe leswo a hi swa nchumu ka Yehovha,+ hikusa a ta mi pfuna swaku mi hlula Vamowabu.+
19 Mi fanele mi hlasela madoropa hinkwawu lawa ma nga ni mimuru ya ku tiya+ ni madoropa hinkwawu ya lisima, mi tlhela mi tsema minsinya hinkwayu yayinene, mi pfala swihlovo hinkwaswu ni ku wonhetela masimu hinkwawu yamanene hi ku cheletela maribye ka wona.”+
20 Nimixo hi nkama wa ku nyikeliwa ka gandzelo la swakudla,+ mati ma suketana ma ta hi ka tlhelo la Edomu, se tiko hinkwalu li tala hi mati.
21 Vamowabu hinkwavu va swi twa swaku tihosi toleto ti tile swaku ti ta lwa na vona, se va hlengeleta vavanuna hinkwavu lava kotaka ku lwa, va gama va nyima lani tiko la vona li gamelaka kona.
22 Nkama va nga pfuka nimpundzu, a dlambu a li yendla swaku mati ma phatima naswona ka tlhelo la Vamowabu, mati a ma voneka ingaku i ngati.
23 Se Vamowabu va ku: “Leyi i ngati! Leswi swi vula swaku tihosi ti dlayanile hi xipada. A hi fambeni hi ya teketela minchumu ya tona+ leyi nga sala!”
24 A nkama va nga fika ka matende ya Vayisrayele, Vayisrayele va humile va sungula ku hlasela Vamowabu va va dlaya, se Vamowabu va baleka.+ Vayisrayele va va hlongolisile anze Mowabu na va va dlayetela.
25 Se va dilizela madoropa, vavanuna hinkwavu va txukumetela maribye ka masimu hinkwawu yamanene, ma za masimu ma tala hi maribye; va tlhela va seletela swihlovo hinkwaswu swa mati,+ va tsema ni minsinya hinkwayu yayinene.+ A ku yo sala muru wa doropa la Kiri-Areseti,+ lowu a wu yakiwe hi maribye, kambe lava a va txopa maribye hi swibalakatsa va rhendzela doropa va li helisa.
26 Nkama hosi ya Mowabu yi nga vona swaku yi hluliwile, yi teka 700 wa vavanuna lava a va ni swipada swaku va phondla va ya hlasela hosi ya Edomu;+ kambe a va swi kotanga.
27 Se yi teka n’wana wa yona wa ku sungula lweyi a a ta va hosi a yi pfaleta, yi yendla gandzelo la ku hisiwa+ hi yena ahenhla ka muru. Vayisrayele va gama va nyenyentseka hintamu, va tshika ku lwa na yona, va tlhela va ya ka tiko la vona.
Tinhlamunselu ta le hansi
^ Kumbe: “impoxtu; tinemba”.
^ Hi Xiheberu: “lweyi a a chela mati ka mavoko ya Eliya.”
