Tihosi Ta Wumbirhi 4:1-44
-
Elixa a yendla swaku mafurha ya wansati wa ku feliwa hi nuna ma va manyingi (1-7)
-
Wansati wa le Xunemi a yamukela Elixa (8-16)
-
Wansati a psala n’wana wa djaha; n’wana a fa (17-31)
-
Elixa a pfuxa n’wana lweyi a a file (32-37)
-
Elixa a yendla swaku sopa li nga ha vi ni vhenenu (38-41)
-
Elixa a yendla swaku mapawu ma va manyingi (42-44)
4 Mun’we wa vasati va vana va vaprofeta+ a rilela Elixa a ku: “Nuna wa mina lweyi a a li mutirhi wa wena a file naswona wena u swi tiva kahle swaku wutomi la yena hinkwalu a a hlonipha Yehovha.+ Se ku te munhu lweyi a hi mu devha, a fika a teka vana va mina vambirhi a va yendla swikarawa swa yena.”
2 Elixa a mu vutisa a ku: “Ni nga ku pfuna hi yini? U ni yini ndlwini ka wena?” Kutani wansati lweyi a ku: “A ni na nchumu, no va ni khuwani leli nga ni mafurha ntsena.”+
3 Se Elixa a ku: “Famba u ya lomba swibya leswi kalaka swi nga na nchumu ka vavhizinyu va wena hinkwavu. U lomba swa swinyingi.
4 U gama u nghena ndlwini, wena ni vana va wena, mi pfala xipfalu, se u chela mafurha ka swibya leswi hinkwaswu, loko swi talile u swi veka tlhelweni.”
5 Kutani wansati lweyi a famba.
Nkama na a li ndlwini ni vana va yena naswona na va pfale xipfalu, vana va yena va sungula ku mu nyiketa swibya se yena a cheletela mafurha ka swona.+
6 Nkama swibya swi nga tala, a byela mun’we wa vana va yena a ku: “Tisa xibya xin’wani.”+ Kambe n’wana wa yena a hlamula a ku: “Swibya swi helile.” Kutani mafurha na wona ma hela.+
7 Se a famba a ya byela mutirheli wa Xikwembu xa ntiyiso, yena a mu hlamula a ku: “Famba u ya xavisa mafurha lawo u hakela swikweneti swa wena, male leyi nga ta sala u ta tihlayisa hi yona wena ni vana va wena.”
8 Siku lin’wani Elixa a ya Xunemi+ lani a ku ni wansati lweyi a a tiviwa hintamu, se wansati lweyi a mu sindzisa swaku a dla swakudla.+ Minkama ya yinyingi loko Elixa a hundza hi kona, a a fika a dla swakudla.
9 Kutani wansati lweyi a byela nuna wa yena a ku: “Na swi tiva swaku munhu lweyi a tolovelaka ku hundza hi lani i mutirheli wa lisima wa Xikwembu.
10 Se ni kombela hi mu yakela kwartu lalitsongo ahenhla ka yindlo,+ hi mu vekela mubedu, meza, xitshamu ni nchumu xa ku tlhateka xa ku voninga hi xona.* Minkama hinkwayu a nga ta hundza hi lani, a ta tshama ka lona.”+
11 Siku lin’wani a fikile, a gama a ya ka kwartu leli nga henhla ka yindlo a fika a yetlela ka lona.
12 A gama a byela Geyazi+ mupfunisi wa yena a ku: “Vitana wansati lweyi wa Muxunemi.”+ Kutani a mu vitana, wansati lweyi a gama a fika a nyima kusuhi na yena.
13 Elixa a byela Geyazi a ku: “Ni kombela u vulavula na yena u ku: ‘U tikarhatile u hi yendlela minchumu ya yinyingi.+ Se ni nga ku yendlela yini?+ U lava ni ku vulavulela ni hosi+ kumbe ni murhangeli wa masonchwa?’” Wansati lweyi a mu hlamula a ku: “A ni lavi nchumu ni titshamele kahle ni maxaka ya mina.”
14 Elixa a vutisa Geyazi a ku: “Hi nga mu yendlela yini wansati lweyi?” Geyazi a hlamula a ku: “A nga na n’wana+ naswona nuna wa yena se a gugile.”
15 A tekela ku byela Geyazi a ku: “Mu vitani.” Se a mu vitana, wansati lweyi a fika a nyima nyanghweni.
16 Elixa a ku: “Lembe li taka hi nkama lowu, u ta va na u ni n’wana.”+ Kambe wansati lweyi a ku: “U nga hlayi leswo hosi ya mina, u nga ni hembeli wena mutirheli wa Xikwembu xa ntiyiso!”
17 Kambe hi lembe leli nga landzela wansati lweyi a ve ni nyimba a tlhela a psala* n’wana wa djaha, hi ku ya hi leswi Elixa a nga mu byela swona.
18 N’wana lweyi a kula se siku lin’wani a ya lani papayi wa yena ni lava a va tshovela a va li kona.
19 A a tshamela ku byela papayi wa yena a ku: “Nhloko ya minoo, yoo, nhloko ya minoo!” Se papayi wa yena a byela mutirhi wa yena a ku: “Mu teki u mu yisa ka mamani wa yena.”
20 Kutani a mu yisa ka mamani wa yena lweyi a nga fika a mu tlakula anze ninhlikanhi, a gama a fa.+
21 Mamani wa yena a khupuka na yena a ya ka kwartu la mutirheli wa Xikwembu xa ntiyiso,+ a fika a mu yetlelisa ka mubedu wa yena a gama a huma a pfala xipfalu.
22 Se a vitana nuna wa yena, a ku: “Ni kombela u rhuma mun’we wa vatirhi a ni tela ni mbongolo, swaku ni ta tsutsuma ni ya ka mutirheli wa Xikwembu xa ntiyiso ni ta tlhela ni vuya.”
23 Kambe nuna wa yena a ku: “Hi mhaka muni u ya ka yena namuntlha? A hi siku la ku huma ka n’weti+ kumbe savata.” Kambe wansati lweyi a ku: “A ku na timhaka, u nga karhateki.”
24 Kutani a lulamisela mbongolo, a byela mutirhi wa yena a ku: “Kahlula. U nga nyimi loko ni nga ku byelanga swaku nyima.”
25 Se a famba a ya ka mutirheli wa Xikwembu xa ntiyiso ka Ntshava ya Karmeli. Nkama mutirheli wa Xikwembu xa ntiyiso a nga mu vona na a ha ta, a byela Geyazi mupfunisi wa yena a ku: “Wa mu vona wansati wa Muxunemi hi lwiyaa, a le ku teni.
26 Ni kombela u tsutsuma u mu tlhangaveta u fika u mu vutisa u ku: ‘Wo yini ku pfuka? Nuna wa wena o yini? A n’wana wa wena ke?’” Se yena a ku: “Hinkwaswu swi famba kahle.”
27 Nkama a nga fika ka mutirheli wa Xikwembu xa ntiyiso ka ntshava, a fike a mu khoma minenge.+ Kutani Geyazi a tshinela a lava ku mu susa, kambe mutirheli wa Xikwembu xa ntiyiso a ku: “Mu tshiki, hikusa a twa ku vava hintamu naswona Yehovha a ni fihlele swona a nga ni byelanga.”
28 Se wansati lweyi a ku: “Hosi ya mina ni ze hi ku ku kombela n’wana mina? A ni hlayanga ni ku: ‘U nga ni tshembisi mavunhwa’?”+
29 Hi ku kahlula a byela Geyazi a ku: “Tilulamiseli*+ u teka nhonga ya mina u famba. Loko u tlhangana ni munhu, u nga mu xoweti; naswona loko munhu a ku xoweta, u nga mu hlamuli. Loko u fika, veka nhonga ya mina ka nghohe* ya mufana.”
30 Se wansati lweyi a ku: “Na funga hi vito la Yehovha Xikwembu lexi hanyaka ni tlhela ni funga hi wena swaku loko u nga fambi na mina, a ni nga ta famba.”+ Kutani Elixa a famba na yena.
31 Geyazi a rhanga a famba a fika a veka nhonga ka nghohe ya mufana kambe n’wana a a nga vulavuli kumbe ku timexa.+ A gama a tlhela a ya kumana na Elixa a fika a mu byela a ku: “Mufana a nga pfukanga.”
32 Nkama Elixa a nga fika ndlwini, a kume swaku mufana a a yetlelisiwe ka mubedu wa yena na a file.+
33 A fika a nghena a gama a pfala xipfalu, a sungula ku khongela ka Yehovha.+
34 Kutani a yetlela henhla ka n’wana, a veka nomo wa yena henhla ka nomo wa n’wana ni matihlo ya yena henhla ka matihlo ya n’wana ni mavoko ya yena henhla ka mavoko ya n’wana a nga suki henhla ka yena, se muzimbha wa n’wana wu sungula ku kufumela.+
35 Elixa a sungula ku fambafamba lomu ndlwini, a gama a yetlela henhla ka n’wana. Se n’wana a wetshemula ka 7 a gama a pfula matihlo.+
36 Elixa a vitana Geyazi a ku: “Vitana wansati wa Muxunemi.” Kutani a mu vitana. A gama a byela wansati lweyi a ku: “Tlakula n’wana wa wena.”+
37 Wansati lweyi a fika a nghena a khizama ka Elixa, a gama a tlakula n’wana wa yena a huma.
38 Nkama Elixa a nga tlhela a ya Jiligali, a ku ni ndlala atikweni.+ Vana va vaprofeta+ a va tshame na yena, se Elixa a byela mupfunisi wa yena+ a ku: “Tseleka panela yayikulu u swekela vana va vaprofeta a sopa.”
39 Se mun’we wa vona a ya nhoveni a ya khaya matsavu, a fika a kuma xisinyani xin’wani a gama a khaya marhanga* ya xona a tata mpahla ya yena. Nkama a nga vuya a fika a ma tsemelela a ma chela ka panela ya sopa hambileswi a a nga swi tivi swaku i yini.
40 Va gama va phamela vanhu swaku va ta dla, kambe loko va sungula ku dla va rila va tlhela va huwelela va ku: “Mutirheli wa Xikwembu xa ntiyiso, ku ni vhenenu ka swakudla leswi.” Kutani va tshika ku dla.
41 Kutani Elixa a ku: “Tisani mpupu.” Loko se va mu tiselile, a wu teka a wu chela ka panela a gama a ku: “Phamelani vanhu va dla.” A ku nga ha na vhenenu ka swakudla.+
42 Ku fika wanuna lweyi a a ta hi Bali-Xalixa+ na a ni saka la maxalani*+ ya ku ma ha ku tshoveliwa ni 20 wa mapawu ya ku hambiwa hi maxalani+ lawa ma nga sungula ku tshoveliwa, a fika a swi nyika mutirheli wa Xikwembu xa ntiyiso. Kutani Elixa a ku: “Swi teki u nyika vanhu va dla.”
43 Kambe mupfunisi wa yena a ku: “Swakudla leswi i switsongo a swi nge va yeneli 100 wa vavanuna.”+ Se Elixa a ku: “Swi nyike vanhu va dla, hikusa Yehovha a li: ‘Va ta dla swi tlhela swi sala.’”+
44 Kutani a va nyika va dla swi tlhela swi sala+ hi ku ya hi leswi Yehovha a nga swi hlaya.
Tinhlamunselu ta le hansi
^ Kumbe: “lambhu.”
^ Kumbe: “veleka”.
^ Hi Xiheberu: “Boha nguvu ya wena ka masenge”.
^ Kumbe: “kara la”.
^ I nchumu xa ku fana ni kwembe kumbe abóbora kambe na xi li xitsongo.
^ Kumbe: “sevhada”.
