Tihosi Ta Wumbirhi 5:1-27
5 Namani murhangeli wa masonchwa ya hosi ya le Siriya, a a tiviwa hintamu naswona hosi a yi mu hlonipha hikusa Yehovha a tirhise yena swaku a yendla Vasiriya va hlula ka tinyimpi ta vona. A a li nhenha hambileswi a a ni mavabyi ya nhlokonho.*
2 Siku lin’wani na Vasiriya va hlasela Vayisrayele, va teke xintombhani xa Muyisrayele lexi nga va mutirhi wa nsati wa Namani.
3 Xintombhani lexi xi byela nsati wa Namani xi ku: “Loko hosi ya mina yo ya ka muprofeta+ lweyi a nga Samariya, a a ta yi hanyisa ka mavabyi lawa yi nga na wona ya nhlokonho.”+
4 Se a* ya ka hosi ya yena, a ya yi byela leswi xintombhani xa Israyele xi nga swi hlaya.
5 Kutani hosi ya Siriya yi ku: “Famba! Ni ta tsala karta* ni tsalela hosi ya Israyele.” Se Namani, a teka 342 wa makilu* ya prata, ni 6.000 wa swikhemu swa woru ni 10 wa timpahla, a famba na swona.
6 Se a famba ni karta a ya ka hosi ya Israyele. Karta leli a li ku: “Ni ku rhumela karta leli na Namani mutirhi wa mina swaku u ta mu hanyisa ka mavabyi ya yena ya nhlokonho.”
7 Nkama hosi ya Israyele yi nga gama ku lerha karta lelo, yi handzula mpahla ya yona yi gama yi ku: “No va Xikwembu mina xi kotaka ku dlaya ni ku vhikela wutomi?+ A rhumele munhu lweyi ka mina a ni byela swaku ni mu hanyisa ka mavabyi ya yena ya nhlokonho! Ma swi vona swaku o lava ku holova na mina?”
8 Kambe nkama Elixa mutirheli wa Xikwembu xa ntiyiso a nga twa swaku hosi ya Israyele yi handzule mpahla ya yona, a tekela ku rhumela munhu a ya ka hosi a fika a ku: “Hi mhaka muni u handzule mpahla ya wena? Ni kombela u mu byela a ta halenu swaku a ta swi tiva swaku ku ni muprofeta lani Israyele.”+
9 Se Namani a famba ni makavhalu ya yena ni tinyolo* ta yena ta nyimpi, a fika a nyima ka nyanghwa wa yindlo ya Elixa.
10 Kutani Elixa a rhuma mupfunisi wa yena, swaku a ya mu byela a ku: “Famba u ya hlamba ka 7+ aYordani,+ muzimbha wa wena wu ta hanya* ka mavabyi lawa u nga na wona ya nhlokonho.”
11 Namani a kwata hintamu a gama a famba na a ku: “A ni tibyele swaku ‘A ta huma a ta ka mina, a fika a vitana vito la Yehovha Xikwembu xa yena, a gama a fambafambisa voko la yena lani ni nga bola xikhumba, se a ni hanyisa.’
12 A nambu wa Abana ni nambu wa Faripari leyi nga Damaxka,+ a yi yampsi ku tlula mati hinkwawu lama nga Israyele? A ni nge yi ka yona ni ya hlamba swaku ni ta hanya?” Se a ndzuluka a famba na a kwatile hintamu.
13 Vatirhi va yena va ya ka yena va fika va ku: “Wena hosi,* loko muprofeta a a ku byele swaku u yendla minchumu ya ku karhata, a wu nga ta yi yendla? Se, i ntxini xi karhataka ka leswi a nga ku byela swaku: ‘Famba u ya hlamba swaku u ta hanya’?”
14 Nkama a nga twa leswo a ya ka Nambu wa Yordani a fika a nghena ka 7, hi ku ya hi leswi mutirheli wa Xikwembu xa ntiyiso+ a nga mu byela swona. Se muzimbha wa yena wu hanya ka mavabyi lawa a a li na wona,+ nyama ya yena yi fana ni ya xifanyatana.+
15 A gama a tlhela a ya ka mutirheli wa Xikwembu xa ntiyiso,+ yena ni vanhu hinkwavu lava a a li na vona, a fika a nyima kusuhi na yena, a ku: “Swoswi na swi tiva swaku amisaveni hinkwayu a ku na Xikwembu xin’wani loko ku nga li Xikwembu xa Israyele.+ Ni kombela u yamukela leswi ni lavaka ku ku nyika swona.”
16 Kambe Elixa a ku: “Na funga hi vito la Yehovha Xikwembu lexi hanyaka lexi ni xi tirhelaka swaku a ni nge swi yamukeli leswi u lavaka ku ni nyika swona.”+ Se a mu sindzisa swaku a swi teka, kambe Elixa a nga pfumelanga.
17 Namani a gama a ku: “Loko u nga lavi leswo, ni kombela u ni nyika misava ya tiko leli leyi nga pakeliwaka hi timbongolo* timbirhi, hikusa a ni nge he tlheli ni yendla gandzelo la ku hisiwa kumbe magandzelo ka swikwembu swin’wani na ku nga li Yehovha.
18 Kambe ni kombela swaku Yehovha a ni rivalela ka mhaka leyi ntsena: Loko hosi ya mina yi ya ka tempele ya Rimoni yi ya gandzela, yi tiya hi voko la mina, se na mina ni boheka ku khizama ka tempele ya Rimoni. Loko ni khizama ka tempele ya Rimoni, ni kombela swaku Yehovha a ni rivalela hi mhaka ya swoleswo.”
19 Elixa a ku: “Famba hi ku rhula.” Kutani nkama a nga suka naswona na a fambe mpfhuka wa ku leha,
20 Geyazi+ mupfunisi wa Elixa lweyi a nga mutirheli wa Xikwembu xa ntiyiso+ a tibyela a ku: ‘Elixa a ve ni timpsalu ka Namani+ wa le Siriya hi ku yala ku teka leswi a nga mu tela na swona. Se na funga hi vito la Yehovha Xikwembu lexi hanyaka swaku ni ta mu landza hi ndzhaku se yena a ta fika a ni nyika xan’wanchumu.’
21 Kutani Geyazi a landza Namani hi ndzhaku. Nkama Namani a nga vona swaku ku ni munhu lweyi a mu landzaka hi ndzhaku, a xika ka nyolo ya yena a mu tlhangaveta a fika a mu vutisa a ku: “I mhaka muni?”
22 A mu hlamula a ku: “A ku na xa ku karhata. Ni rhumiwe hi Elixa, a li: ‘Ku fike madjaha mambirhi lawa ma nga vana va vaprofeta na ma ta hi ka ndhawu ya tintshava ya Efrayimi. Ni kombela u ma nyika 34,2 wa makilu* ya prata ni timpahla timbirhi.’”+
23 Namani a ku: “Teka 68,4 wa makilu* ya prata.” A mu sindzisa+ a za a pfumela, se Namani a teka 68,4 wa makilu ya prata ni timpahla timbirhi a swi peta ka mapaxta mambirhi, a gama a nyika vatirhi va yena vavambirhi va swi tlakula va heleketa Geyazi.
24 Nkama a nga fika aOfeli,* a teka minchumu liyani a yi ni vatirhi lavayani vavambirhi a yi veka ndlwini a gama a va tshika va famba. Loko se va fambile,
25 Geyazi a nghena a nyima kusuhi na Elixa. Elixa a mu vutisa a ku: “Geyazi a wu ye kwini?” Kambe yena a hlamula a ku: “A ni nga yanga ndhawu.”+
26 Se Elixa a mu vutisa a ku: “U pimisa swaku a ni swi tivi swaku u landze Namani hi ndzhaku naswona yena a xikile ka nyolo ya yena a ku tlhangaveta? Indjhe lowu i nkama wa ku yamukela prata, mpahla, minsinya ya mawolivhera, masimu ya mawuvha, tinyempfu, tihomu, vatirhi va xinuna kumbe vatirhi va xisati?+
27 Se mavabyi lawa Namani a a li na wona ya nhlokonho+ ma ta va ka wena ni ka vana va wena masiku hinkwawu.” Hi ku kahlula Geyazi a suka lani Elixa a a li kona, na a ni mavabyi ya nhlokonho, a a yo baa ku fana ni gamboko.*+
Tinhlamunselu ta le hansi
^ Kumbe: “lepra.” Ku nga muxaka wa mavabyi ya ku bola xikhumba. Vona Ntlhamuselo.
^ Swi nga yendleka ku hlayiwa Namani.
^ Kumbe: “papila”.
^ Hi Xiheberu: “10 wa titalenta”. Vona Xiyengetelo B14.
^ Kumbe: “tin’qolo; makalichi”.
^ Hi Xiheberu: “u ta va u tengile”.
^ Hi Xiheberu: “papayi”.
^ Kumbe: “mamula”. Ku nga vana va mbongolo ni kavhalu.
^ Hi Xiheberu: “talenta yin’we”. Vona Xiyengetelo B14.
^ Hi Xiheberu: “titalenta timbirhi”. Vona Xiyengetelo B14.
^ Ku nga ndhawu leyi kumekaka Samariya. Kumbexana ganga.
^ Kumbe: “neve.” I minchumu ya ku basa yi ku baa ku fana ni jelu.
