Tihosi Ta Wumbirhi 7:1-20
7 Se Elixa a ku: “Yingisani leswi Yehovha a swi hlayaka. Yehovha a li: ‘Mundzuku hi nkama lowu ka mabazara* ya Samariya, a 4 wa makilu* ya mapa ya ku siliwa kahle ma ta xaviwa hi xikhemu* xin’we xa prata ni 8 wa makilu* ya maxalani* na wona ma ta xaviwa hi xikhemu xin’we xa prata.’”+
2 Kutani murhangeli mun’we lweyi hosi a yi mu tshemba a byela mutirheli wa Xikwembu xa ntiyiso a ku: “Hambi Yehovha o pfula tinyanghwa ta matilo, leswi u swi hlayaka a swi nge yendleki.”+ Se Elixa a ku: “U ta swi vona swi yendleka,+ kambe a wu nga ta swi dla.”+
3 A ku ni 4 wa vavanuna lava a va ni mavabyi ya nhlokonho* lava a va tshamile ka nyanghwa wa doropa,+ va gama va vutisana va ku: “Hi tshamela yini lani hi nga ta za hi fa?
4 Loko hi ku: ‘A hi ngheneni ka doropa,’ hi ta ya fa hikusa ku ni ndlala.+ Kasi ni loko hi tshama lani, swa fana hi ta fa. Se a hi fambeni ka matende ya Vasiriya. Loko vo kala va nga hi dlayi hi ta hanya, kambe loko va hi dlaya, hi ta fa.”
5 Va gama va suka nimadlambu va ya ka matende ya Vasiriya. A nkama va nga fika kusuhi ni matende ya Vasiriya, va kume swaku ku yo baa a ku na munhu.
6 Yehovha a a yendle swaku Vasiriya va twa guwa la tinyolo* ta nyimpi, la makavhalu ni la masonchwa ya manyingi,+ va gama va byelana va ku: “Hosi ya Israyele yi thole tihosi ta Vaheti ni ta Gibita swaku ti ta lwa na hina!”
7 Hi madlambu wolawo va balekile va siya matende, makavhalu, ni timbongolo ta vona ni ndhawu leyi a va gwimbe ka yona matende va yi siyise swoleswo, hi mhaka ya ku chava ku dlayiwa.
8 A nkama vavanuna lava nga ni mavabyi ya nhlokonho va nga fika kusuhi ni ndhawu leyi Vasiriya a va gwimbe ka yona matende, va nghene ka tende lin’we va sungula ku dla va tlhela va phuza. Va teke prata, woru ni mpahla va famba va ya swi fihla. Va gama va tlhela va vuya va nghena ka tende lin’wani va teka minchumu va famba va ya yi fihla.
9 Va gama va byelana va ku: “Leswi hi swi yendlaka a hi swinene. Namuntlha i siku la mahungu ya ku tsakisa! A hi fambeni kaya ka hosi hi ya va byela, loko ho hlwela li za li xa hi ta khatisiwa.”
10 Se va famba va fika va byela lava a va vonelela nyanghwa wa doropa va ku: “Hi ye lomu Vasiriya va nga gwimba kona matende, kambe a hi kumanga munhu, a ku nga twali munhu ni wa mun’we. A ko va ni makavhalu ni timbongolo leti nga bohiwa naswona matende a ma yo sala woxe.”
11 Lava a va vonelela nyanghwa wa doropa va vhele va huwelela mhaka leyi ka vanhu; mhaka leyi yi tlhele yi ya byeliwa lava a va li kaya ka hosi.
12 Yi vhela hosi yi pfuka niwusiku se yi byela vatirhi va yona yi ku: “Nyimani ni mi byela leswi Vasiriya va nga swi yendla. Va swi tiva swaku hi twa ndlala,+ se va suke lani va nga gwimba kona matende va ya tumbela nhoveni, va ku: ‘Va ta huma ka doropa, hi gama hi va khoma hi nghena ka doropa la vona.’”+
13 Mun’we wa vatirhi va hosi a ku: “Ni kombela u rhuma vanhu va famba hi 5 wa makavhalu lama nga sala ka doropa. Hikusa swa fana, va ta gama va fana ni xitshungu hinkwaxu xa Israyele lexi nga lani ka doropa. Va ta fana ni xitshungu hinkwaxu xa Israyele lexi nga hela hi ku fa. A hi va rhumeni va famba hi ta vona swaku ku ta yendleka yini.”
14 Se va teka tinyolo timbirhi ni makavhalu, hosi yi gama yi va rhuma swaku va ya lomu Vasiriya va nga gwimba kona matende yi va byela yi ku: “Fambani mi ya vona swaku ku yendleka yini.”
15 Va landzelele minkondzo ya Vasiriya va za va ya fika Yordani naswona hinkwaku lomu a va famba kona a va kuma mpahla ni minchumu leyi Vasiriya va nga yi txukumeta nkama va nga baleka hi ku chava. Se lava nga rhumiwa va tlhela va ya byela hosi leswi va nga swi vona.
16 Kutani vanhu va huma va ya teketela minchumu ka matende ya Vasiriya, a 4 wa makilu* ya mapa ya ku siliwa kahle ma sungula ku xaviwa hi xikhemu xin’we xa prata ni 8 wa makilu* ya maxalani na wona ma sungula ku xaviwa hi xikhemu xin’we xa prata, hi ku ya hi leswi Yehovha a nga swi hlaya.+
17 Hosi a yi veke murhangeli lweyi a yi mu tshemba swaku a vonelela nyanghwa wa doropa, kambe vanhu va mu psanyetela a za a fa nkama a a li nyanghweni, hi ku ya hi leswi mutirheli wa Xikwembu xa ntiyiso a nga swi byela hosi nkama yi nga ta ka yena.
18 Ku yendleke leswi mutirheli wa Xikwembu xa ntiyiso a nga byela hosi swaku swi ta yendleka nkama a nga ku: “Mundzuku hi nkama lowu, ka mabazara ya Samariya a 8 wa makilu* ya maxalani ma ta xaviwa hi xikhemu xin’we xa prata ni 4 wa makilu* ya mapa ya ku siliwa kahle na wona ma ta xaviwa hi xikhemu xin’we xa prata.”+
19 Kambe murhangeli mun’we a a byele mutirheli wa Xikwembu xa ntiyiso a ku: “Hambi Yehovha o pfula tinyanghwa ta matilo leswi u swi hlayaka a swi nge yendleki.” Ka mhaka leyi Elixa a mu hlamule a ku: “U ta swi vona swi yendleka, kambe a wu nga ta swi dla.”
20 Leswi hi swona swi nga mu yendlekela, hikusa vanhu va mu psanyetelile a za a fa nkama na a li ka nyanghwa.
Tinhlamunselu ta le hansi
^ Kumbe: “nyanghwa wa doropa”.
^ Hi Xiheberu: “seya lin’we”. Vona Xiyengetelo B14.
^ Hi Xiheberu: “xikele”. Vona Xiyengetelo B14.
^ Hi Xiheberu: “tiseya timbirhi”. Vona Xiyengetelo B14.
^ Kumbe: “sevhada”.
^ Kumbe: “lepra”. Ku nga muxaka wa mavabyi ya ku bola xikhumba. Vona Ntlhamuselo.
^ Kumbe: “tin’qolo; makalichi”.
^ Hi Xiheberu: “seya lin’we”. Vona Xiyengetelo B14.
^ Hi Xiheberu: “tiseya timbirhi”. Vona Xiyengetelo B14.
^ Hi Xiheberu: “tiseya timbirhi”. Vona Xiyengetelo B14.
^ Hi Xiheberu: “seya lin’we”. Vona Xiyengetelo B14.
