Tihosi Ta Wumbirhi 8:1-29
8 Elixa a byela wansati lweyi a nga pfuxa n’wana wa yena+ a ku: “Famba ni ndjangu wa wena mi ya tshama ka tiko leli mi li lavaka, hikusa Yehovha a ta tisa ndlala ka tiko leli,+ leyi nga ta heta 7 wa malembe.”
2 Se wansati lweyi a famba, a yendla leswi mutirheli wa Xikwembu xa ntiyiso a nga mu byela swona. Yena ni ndjangu wa yena va fike va tshama ka tiko la Vafilista+ 7 wa malembe.
3 Nkama ku nga hela 7 wa malembe, wansati lweyi a vuya hi ka tiko la Vafilista, kutani a ya ka hosi a ya kombela swaku a mu tlhelisela yindlo ya yena ni masimu ya yena.
4 Hi nkama wolowo hosi a yi vulavula na Geyazi mupfunisi wa mutirheli wa Xikwembu xa ntiyiso yi ku: “Ni kombela u ni byela minchumu hinkwayu ya ku hlamalisa leyi Elixa a nga yi yendla.”+
5 A nkama Geyazi a a byela hosi leswi Elixa a nga mu pfuxisa xiswona munhu lweyi a a file,+ wansati lweyi n’wana wa yena a nga pfuxiwa a fika ka hosi a ta kombela swaku yi mu tlhelisela yindlo ya yena ni masimu ya yena.+ Geyazi a vhela a ku: “Hosi ya mina, a wansati lweyi ni mu hlayaka hi lweyi ni n’wana wa yena lweyi a nga pfuxiwa hi Elixa hi yelweyi.”
6 A nkama hosi yi nga twa leswo yi kombela wansati lweyi swaku a yi byela hinkwaswu leswi swi nga yendleka, se lweyi wansati a yi byela mhaka hinkwayu. Hosi yi gama yi byela mun’we ka lava a va tirha ka yindlo ya wuhosi yi ku: “Mu tlheliseleni minchumu ya yena hinkwayu ni hinkwaswu leswi swi nga tshoveliwa ka masimu ya yena, ku sukela hi siku leli a nga suka hi lona lani tikweni anze swoswi.”
7 Elixa a ye Damaxka+ hi nkama lowu Benadadi+ hosi ya Siriya a a vabya. Va gama va byela hosi va ku: “Ku fike mutirheli wa Xikwembu xa ntiyiso.”+
8 Se hosi yi byela Azayele+ yi ku: “Teka minchumu u famba na yona u ta nyika mutirheli wa Xikwembu xa ntiyiso.+ Famba u ya mu kombela swaku a ni vutisela ka Yehovha a ku: ‘Ni ta hanya ka mavabyi lawa kumbe a ni nga ta hanya?’”
9 Azayele a famba a ya tlhangana na Elixa na a tamele minchumu leswaku a ta mu nyika; a a ni minchumu hinkwayu yayinene ya Damaxka, leyi a yi pakeliwe ka 40 wa makamela. A fika a nyima kusuhi na yena a ku: “N’wana wa wena Benadadi hosi ya Siriya a ni rhumile swaku ni ta ka wena, a li: ‘Ni ta hanya ka mavabyi lawa ni nga na wona kumbe a ni nga ta hanya?’”
10 Elixa a mu hlamula a ku: “Famba u ya mu byela, u ku: ‘U ta hanya ka mavabyi lawa u nga na wona,’ kambe Yehovha a ni kombe swaku a ta fa.”+
11 Se Elixa a mu txuvuka hintamu a za Azayele a dana. Elixa mutirheli wa Xikwembu xa ntiyiso a gama a rila.
12 Azayele a mu vutisa a ku: “Hi mhaka muni u rila hosi ya mina?” Se Elixa a mu hlamula a ku: “Hikusa na swi tiva swilo swa ku biha leswi u nga ta swi yendla ka Vayisrayele.+ U ta hisa madoropa ya vona lawa ma nga ni mimuru ya ku tiya, u dlaya tinhenha ta vona hi xipada, u tsemelela vana va vona u tlhela u handzula makhwirhi ya vavasati lava nga ni tinyimba.”+
13 Azayele a mu vutisa a ku: “Mbyana ya ku fana na mina yi nga swi yendlisa ku yini swoleswo?” Kambe Elixa a ku: “Yehovha a ni kombile swaku u ta va hosi ya Siriya.”+
14 A gama a suka ka Elixa a tlhela a ya ka hosi ya yena, leyi nga fika yi mu vutisa yi ku: “Elixa a ku byele swa ku yini?” Kutani a hlamula a ku: “A ni byele swaku u ta hanya.”+
15 Kambe hi mundzuku ka kona, Azayele a teka mubalu* a wu peta ka mati, a gama a mbhonya a nhloko ya hosi a yi pfala swaku yi nga hefemuli anze yi fa.+ Se Azayele a va hosi.+
16 Hi lembe la wu 5 la ku fuma ka Yehorama+ n’wana wa Akabu hosi ya Israyele, hi nkama lowu Yehoxafati a a li hosi ya Yuda, Yehorama+ n’wana wa Yehoxafati hosi ya Yuda a ve hosi.
17 A a ni 32 wa malembe nkama a nga va hosi naswona a fume 8 wa malembe aYerusalema.
18 A tekelele mahanyelo ya tihosi ta Israyele,+ ku fana ni leswi nga yendliwa hi ndjangu wa Akabu+ hikusa a a teke n’wana wa Akabu swaku a va nsati wa yena+ naswona a tame a djohela Yehovha.+
19 Kambe Yehovha a a nga swi lavi ku helisa tiko la Yuda hi mhaka ya Davhida mutirheli wa yena,+ hikusa a a mu tshembise swaku vana va yena a va ta fuma+ Yerusalema hi nkama wa ku kala wu nga heli.
20 Nkama Yehorama a a fuma, tiko la Edomu li djikele tiko la Yuda+ li gama li tivekela hosi.+
21 Se Yehorama a tsemakanya a ya Zayiri ni tinyolo ta yena hinkwatu a gama a pfuka niwusiku a hlula Vaedomu lava a va tile va ta lwa na yena ni varhangeli va tinyolo* ta nyimpi; kutani masonchwa ma baleka ma ya ka matende ya wona.
22 Kambe tiko la Edomu a li tshikanga ku djikela tiko la Yuda anze namuntlha. Ni tiko la Libina+ na lona li sungule ku djikela tiko la Yuda hi nkama wolowo.
23 Timhaka hinkwatu ta wutomi la Yehorama, ni hinkwaswu leswi a nga swi yendla, swi tsaliwile ka buku leli vulavulaka hi wutomi la tihosi ta Yuda.
24 Se Yehorama a fa a lahliwa lani vavhovho va yena va nga lahliwa kona ka Doropa la Davhida.+ Akaziya+ n’wana wa yena a gama a va hosi.
25 Hi lembe la wu 12 la ku fuma ka Yehorama n’wana wa Akabu hosi ya Israyele, Akaziya n’wana wa Yehorama hosi ya Yuda a ve hosi.+
26 Akaziya a a ni 22 wa malembe nkama a nga va hosi naswona a fume lembe lin’we aYerusalema. Vito la mamani wa yena a ku li Ataliya+ ntukulu* wa Omiri+ hosi ya Israyele.
27 A tekelele mahanyelo ya ku biha ya ndjangu wa Akabu+ naswona a tame a yendlela Yehovha swa ku biha, ku fana ni ndjangu wa Akabu, hikusa a a li xaka la vona.+
28 Se a famba na Yehorama n’wana wa Akabu va ya lwa na Azayele hosi ya Siriya aRamoti-Jiliyadi,+ kambe Vasiriya va vavisa Yehorama.+
29 Hosi Yehorama a tlhela a ya Yezreyeli+ swaku swilondza swa yena swi ya hola; swilondza leswi a a vavisiwe hi Vasiriya aRama nkama na a lwa na Azayele hosi ya Siriya.+ Akaziya n’wana wa Yehorama hosi ya Yuda a ye Yezreyeli a ya pfuxela Yehorama n’wana wa Akabu, hikusa a a vavisiwile.*
Tinhlamunselu ta le hansi
^ Kumbe: “gumana”.
^ Kumbe: “tin’qolo; makalichi”.
^ Hi Xiheberu: “n’wana”.
^ Kumbe: “vabya.”