Tihosi Ta Wumbirhi 9:1-37
9 Muprofeta Elixa a vitana mun’we wa vana va vaprofeta a gama a mu byela a ku: “Tilulamiseli,* u hantlisa u teka bolhela la mafurha u ya Ramoti-Jiliyadi.+
2 Nkama u nga ta fika, lavetela Yewu+ n’wana wa Yehoxafati ntukulu wa Nimxi; u mu teka xikarhi ka vamakwavu u nghena na yena ka kwartu leli nga ndzenindzeni.
3 Se u teka bolhela la mafurha u mu chela ka nhloko ya yena u ku: ‘Yehovha a li: “Ni ku chela mafurha swaku u va hosi ya Israyele.”’+ U gama u kahlula u pfula xipfalu u baleka.”
4 Kutani lweyi a nga rhumiwa hi Elixa a famba a ya Ramoti-Jiliyadi.
5 Nkama a nga fika, varhangeli va nyimpi a va tshame kolanu. Se a ku: “Ku ni leswi va nga ni rhuma swaku ni ta ku byela, hosi ya mina.” Yewu a mu vutisa a ku: “U hlaya mani ka hina?” Kutani a hlamula a ku: “Ni hlaya wena, hosi ya mina.”
6 Se Yewu a sekeleka, va gama va nghena ndlwini; a gama lweyi a nga rhumiwa hi Elixa a mu chela mafurha ka nhloko, a ku: “Yehovha Xikwembu xa Israyele a li: ‘Mina Yehovha na ku langa swaku u va hosi ya vanhu va mina, ku nga Vayisrayele.+
7 U fanele u dlaya ndjangu wa Akabu hosi ya wena naswona ni ta hakelisa hi mhaka ya leswi a nga dlaya vatirheli va mina ku nga vaprofeta, mina Yehovha ni ta tlhela ni hakelisa hi mhaka ya vatirheli va mina hinkwavu lava va nga dlayiwa hi Jezabele.+
8 Ndjangu hinkwawu wa Akabu wu ta helisiwa; naswona ni ta helisa vavanuna hinkwavu ka ndjangu wa Akabu, ku patsa ni vanhu lava va kalaka va nga pfuni nchumu ni lava va kalaka va nga na wa ku va pfuna aIsrayele.+
9 Ni ta yendla swaku ndjangu wa Akabu wu fana ni ndjangu wa Yerobuwamu+ n’wana wa Nebati ni ndjangu wa Baxa+ n’wana wa Ahiya.
10 Se Jezabele a ta dliwa hi timbyana ka masimu ya Yezreyeli,+ a nga ta lahliwa hi munhu.’” A nkama lweyi a nga rhumiwa hi Elixa a nga gama ku hlaya leswo, a pfula xipfalu a baleka.+
11 Nkama Yewu a nga tlhela a ya ka vatirhi va hosi ya yena, va mu vutisile va ku: “A ku yendleka yini? A yi lava yini nhlanyi liya?” Kutani a va hlamula a ku: “Na n’wina ma swi tiva swaku wa hlanya, leswi a nga swi hlaya a swi twisiseki.”
12 Va gama va ku: “Wa hemba! Hi kombela u hi byela.” Se a ku: “A ni byele leswi, a tlhela a ku: ‘Yehovha a li: “Na ku langa swaku u va hosi ya Israyele.”’”+
13 Nkama va nga twa leswo, va hantlisa va teka mpahla ya vona va yi yandlala henhla ka swikada+ va gama va mu veka henhla ka yona, se va chaya limhondzo va ku: “Yewu i hosi!”+
14 Se Yewu+ n’wana wa Yehoxafati ntukulu wa Nimxi a sungula ku hamba planu* la ku djikela Yehorama.
Yehorama a a li Ramoti-Jiliyadi+ ni tiko hinkwalu la Israyele na va lwa na Azayele+ hosi ya Siriya.
15 Hi ku famba ka nkama, Hosi Yehorama a tlhele a ya Yezreyeli+ leswaku a ya dahiwa swilondza leswi a nga vavisiwa hi Vasiriya nkama na a lwa na Azayele hosi ya Siriya.+
Kutani Yewu a ku: “Loko mi swi vona swi li swinene ka n’wina, mi nga pfumeleli munhu swaku a baleka ka doropa leli a ya hlaya mhaka leyi aYezreyeli.”
16 Se Yewu a famba hi nyolo* ya yena a ya Yezreyeli, hikusa Yehorama a a yetlele kohala na a vavisiwile, naswona Akaziya hosi ya Yuda na yena a a li kohala swaku a ya pfuxela Yehorama.
17 Nkama lweyi a a vonelela doropa a a nyime henhla ka prediyu aYezreyeli, a vone vavanuna va vanyingi lava a va rhangeliwa hi Yewu na va tshinela. A vhela a ku: “Ku ni vavanuna va vanyingi lava taka.” Kutani Yehorama a ku: “Rhuma munhu lweyi a fambaka hi kavhalu a va tlhangaveta, u mu byela swaku a a va vutisi a ku: ‘Mi ta hi ku rhula kumbe ihim?’”
18 Lweyi a a famba hi kavhalu a va tlhangaveta a fika a ku: “A hosi yi li: ‘Mi ta hi ku rhula kumbe ihim?’” Kambe Yewu a mu hlamula a ku: “U tiva yini hi ‘ku rhula’? A hi fambe u ni landzela!”
Se lweyi a a vonelela doropa, a ku: “Lweyi hi nga mu rhuma a fikile ka vona kambe a nga se vuya.”
19 Kutani a rhuma munhu mun’wanyani wa wumbirhi a famba hi kavhalu nkama a nga fika ka vona, a ku: “A hosi yi li: ‘U ta hi ku rhula?’” Kambe Yewu a mu hlamula a ku: “U tiva yini hi ‘ku rhula’ wena. A hi fambe u ni landzela!”
20 Lweyi a a vonelela doropa a tlhela a ku: “A fikile ka vona, kambe a nga se vuya naswona a mafambisela lawa ya nyolo ma fana ni mafambisela ya Yewu ntukulu* wa Nimxi, hikusa munhu wa kona a fambisa ingaku o hlanya.”
21 Yehorama a ku: “Ni lulamiseleni nyolo ya mina!” Se va lulamisa nyolo ya yena ya nyimpi, a gama Yehorama hosi ya Israyele na Akaziya+ hosi ya Yuda va huma, hinkwavu na va famba hi tinyolo ta vona ta nyimpi va tlhangaveta Yewu. Va tlhangane na yena ka masimu ya Naboti+ wa Muyezreyeli.
22 Nkama Yehorama a nga vona Yewu, a mu vutisa a ku: “Yewu, u ta hi ku rhula ke?” Se Yewu a hlamula a ku: “A ku nge vi ni ku rhula na ku ni wunghwavani la mamani wa wena Jezabele+ ni wuloyi la yena la linyingi.”+
23 Yehorama a djikisa nyolo ya yena swaku a baleka, a gama a byela Akaziya a ku: “Akaziya, hi djikeliwile!”
24 Yewu a humesa ligubu la yena a txopa Yehorama, a mpaxwa* wu mu tlhava ka nhlana wu huma hi ka mbilu, a gama a wa ka nyolo ya yena ya nyimpi.
25 Yewu a byela Bidikari mupfunisi wa yena a ku: “Mu tlakuli u mu txukumeta ka masimu ya Naboti wa Muyezreyeli.+ Khumbuka swaku mina na wena a hi li xikan’we na hi famba hi nyolo hi landzela Akabu papayi wa yena, nkama Yehovha a nga mu yavanyisa a ku:+
26 ‘“Leswi tolo ni nga vona ngati ya Naboti+ ni ya vana va yena,” ku vula mina Yehovha, “ni ta hakelisa+ kola ka masimu lawa,” ku vula mina Yehovha.’ Se swoswi mu tlakuli u mu txukumeta ka masimu hi ku ya hi leswi Yehovha a nga swi hlaya.”+
27 A nkama Akaziya+ hosi ya Yuda a nga vona leswi nga yendleka, a baleka a famba hi ndlela leyi hundzaka hi ka jardim lalikulu.* (Yewu a gama a mu hlongolisa, a ku: “Na yena mu dlayeni!” Va gama va mu tlhava na a li ka nyolo ya yena na a li ka ndlela leyi yaka aGuri, aIbileyami.+ Kambe a tame a baleka anze a fika Mejido lomu a nga fela kona.
28 Kutani vatirhi va yena va mu tlakula hi nyolo va mu yisa Yerusalema, va ya mu lahla ka sirha la yena lani vavhovho va yena va nga lahliwa kona ka Doropa la Davhida.+
29 Akaziya+ a ve hosi ya Yuda hi lembe la wu 11 la ku fuma ka Yehorama n’wana wa Akabu.)
30 Nkama Yewu a a ya Yezreyeli+ Jezabele+ a swi twile swaku wa ta. A gama a tipenda matihlo hi minchumu ya ntima ya ku tisasekisa hi yona, a tilunghisa ni misisi a gama a hlometela hi ka janela.
31 Nkama Yewu a nga nghena nyanghweni, Jezabele a ku: “U yo khohlwa leswi nga yendlekela Zimiri lweyi a nga dlaya hosi ya yena?”+
32 Se Yewu a txuvuka henhla ka janela a ku: “I mani lweyi a nyimaka na mina? I mani?”+ Kutani vatirhi vambirhi kumbe vanharhu va le wuhosini va vhela va txuvuka hansi se va mu vona.
33 A ku: “Mu txukumeteni hansi!” Se va mu txukumeta hansi, a pshandlaka, ngati ya yena yi chela khumbi ni makavhalu, a gama a mu psanyetela.
34 Yewu a gama a nghena ka doropa a fika a dla a tlhela a nwa. Kutani a ku: “Ni kombela mi ya lahla wansati lweyi, lweyi a nga rhukiwa. Phela, i n’wana wa hosi.”+
35 Kambe nkama va nga ya swaku va ya mu lahla, a va kumanga nchumu, va yo kuma nhloko,* minenge ni swiyandla swa mavoko ya yena.+
36 Nkama va nga vuya va ta mu byela leswi nga yendleka, Yewu a ku: “Ku yendleke leswi Yehovha+ a nga swi hlaya hi ku tirhisa mutirheli wa yena Eliya wa le Tixibi nkama a nga ku: ‘Timbyana ti ta dla nyama ya Jezabele ka masimu ya Yezreyeli.+
37 Ntsumbu wa Jezabele wu ta va xitrumi ka masimu ya Yezreyeli, swaku vanhu va nga hlayi va ku: “Lweyi i Jezabele.”’”
Tinhlamunselu ta le hansi
^ Hi Xiheberu: “Boha nguvu ya wena ka masenge”.
^ Kumbe: “kungu”.
^ Kumbe: “n’qolo; kalichi”.
^ Hi Xiheberu: “n’wana”.
^ Kumbe: “flexa”.
^ Hi Xiheberu: “yindlo ya jardim.”
^ Kumbe: “rhambu la nhloko”.
