Tikronika Ta Wumbirhi 1:1-17
1 Mfumu wa Solomoni n’wana wa Davhida wu tame wu tiya naswona Yehovha Xikwembu xa yena a a mu pfuna lakakuva a hloniphiwa swinene.+
2 Solomoni a vitana Vayisrayele hinkwavu, varhangeli va mintlawa ya 1.000 wa vanhu, varhangeli va mintlawa ya 100 wa vanhu, vayavanyisi, varhangeli lavan’wani hinkwavu va tiko la Israyele ni varhangeli va mindjangu.
3 Se Solomoni ni vanhu hinkwavu va ya ka ndhawu ya ku tlakuka leyi a yi li Gibiyoni+ lani a ku ni tende la ntlhanganu la Xikwembu xa ntiyiso, ku nga tende leli Moxe mutirheli wa Yehovha a nga li yendla amananga.
4 Kambe Davhida a teke Areka ya Xikwembu xa ntiyiso aKiriyati-Yerimi+ a yi yisa ka ndhawu leyi a a yi lulamisele yona; a a yi gwimbele tende aYerusalema.+
5 A altari ya kobre+ leyi Bezaleli+ n’wana wa Uri, n’wana wa Huri a nga yi yendla a yi vekiwe phambheni ka tabernakela ya Yehovha; Solomoni ni Vayisrayele a va khongela na va li phambheni ka yona.
6 Kutani Solomoni a yendlela Yehovha magandzelo kolanu, a yendla magandzelo ya ku hisiwa hi 1.000 wa swifuyu ahenhla ka altari ya kobre+ leyi a yi li ka tende la ntlhanganu.
7 Hi wusiku lolelo Xikwembu xi humelela ka Solomoni ka milorho xi fika xi ku: “Kombela lexi u xi lavaka ni ta ku nyika xona.”+
8 Se Solomoni a hlamula Xikwembu a ku: “U mu rhandze hintamu papayi wa mina Davhida+ naswona u ni nyikile wuhosi la yena.+
9 Se Yehovha Xikwembu xa mina, ni kombela swaku u yendla leswi u nga tshembisa Davhida papayi wa mina,+ hikusa u ni yendle ni va hosi ya vanhu lava nga vanyingi ku fana ni wuthulu la misava.+
10 Ni kombela u ni nyika wutlharhi ni wutivi+ swaku ni ta kota ku rhangela vanhu lava, hikusa i mani a nga kotaka ku yavanyisa vanhu va wena va ku talisa xileswi?”+
11 Kutani Xikwembu xi byela Solomoni xi ku: “Leswi u lavaka leswo naswona u kalaka u nga kombelanga ku ganya, tshomba, ku hloniphiwa kumbe swaku vanhu lava ku nyenyaka va helisiwa kumbe u hanya malembe ya manyingi,* kambe u nga kombela wutlharhi ni wutivi swaku u ta yavanyisa vanhu va mina lava ni nga ku veka swaku u va hosi ya vona,+
12 ni ta ku nyika wutlharhi ni wutivi; ni ta tlhela ni ku yendla u ganya, u va ni tshomba u tlhela u hloniphiwa, ku nga minchumu ya ku a yi se tshama yi kumiwa hi tihosi tin’wani leti nga fuma na wena u nga se va hosi funtshi a yi nga ta kumiwa hi tihosi tin’wani leti nga ta fuma loko se u file.”+
13 Se Solomoni a suka ka ndhawu ya ku tlakuka yi nga Gibiyoni+ lani tende la ntlhanganu a li li kona, a tlhelela aYerusalema; funtshi a fume Israyele.
14 Solomoni a tama a hlengeleta tinyolo* ni makavhalu;* a a li ni 1.400 wa tinyolo ni 12.000 wa makavhalu.*+ Swilo leswi a a swi veke ka doropa leli a a veka tinyolo+ leli a li li kusuhi ni lomu a a tshama kona aYerusalema.+
15 A hosi yi yendle swaku a prata ni woru swi tala hintamu aYerusalema ku fana ni maribye,+ ni timhandzi ta minsinya ya mikedari na tona a ti li tinyingi swinene ku fana ni minsinya ya makuwa* leyi nga Xefela.+
16 Solomoni a a xava makavhalu aGibita,+ vaxavisi lava a va mu tirhela a va xava makavhalu na ma li manyingi* hi male leyi a yi pimiwile.+
17 A Gibita, nyolo yin’we a yi xaviwa hi 600 wa swikhemu swa prata, kasi kavhalu a li xaviwa hi 150 wa swikhemu swa prata; se vona a va xavisela tihosi hinkwatu ta Vaheti ni tihosi ta Siriya.
Tinhlamunselu ta le hansi
^ Hi Xiheberu: “masiku ya manyingi”.
^ Kumbe: “tin’qolo; makalichi”.
^ Kumbe: “vanhu lava a va fambisa makavhalu.”
^ Kumbe: “vanhu lava a va fambisa makavhalu.”
^ Kumbe: “ma figo”.
^ Kumbexana: “aGibita ni Kuwe”. Vaxavisi lava a va tirhela hosi a va ma xava Kuwe. Swi nga yendleka ku vulavuliwa hi Kilikiya.