Tikronika Ta Wumbirhi 10:1-19
-
Israyele a djikela Robuwamu (1-19)
10 Robuwamu a ye Xikemi,+ hikusa vanhu hinkwavu va Israyele a va ye Xikemi swaku va ya mu yendla hosi.+
2 Nkama Yerobuwamu+ n’wana wa Nebati a nga twa mhaka leyi a vuyile hi Gibita. (A a li Gibita hikusa a a balekile hi mhaka ya ku chava Hosi Solomoni.)+
3 Kutani va rhume vanhu swaku va ya mu vitana, se Yerobuwamu ni Vayisrayele hinkwavu va ya ka Robuwamu va fika va ku:
4 “Papayi wa wena a hi tikisele wutomi.+ Kambe loko wo hi twela wusiwana u hi vevukisela ndzhwalu lowu papayi wa wena a nga hi rhwexa wona, hi ta va vatirhi va wena.”
5 A va hlamula a ku: “Tlhelani mi vuya na se ku hundze masiku manharhu.” Va gama va famba.+
6 Hosi Robuwamu a gama a vutisa madoda lawa a ma tirhela papayi wa yena Solomoni nkama na a ha hanya, a ku: “Mi yi vonisa ku yini mhaka leyi, ni nga va hlamula ni ku yini vanhu lava?”
7 Va mu hlamula va ku: “Loko wo va khoma kahle vanhu lava, u va tsakisa u tlhela u va hlamula kahle, va ta tshama va li vatirhi va wena.”
8 Kambe a tshike leswi madoda ma nga mu byela swona, a ya vutisa madjaha lawa a nga kula na wona, lawa se a ma mu tirhela.+
9 A ma vutisa a ku: “Ni nga va hlamulisa ku yini vanhu lava, lava nga ni kombela va ku: ‘Hi vevukiseli ndzhwalu lowu papayi wa wena a nga hi rhwexa wona’?”
10 Kutani madjaha lawa ma nga kula na yena ma mu hlamula ma ku: “U ta byela vanhu lava nga ku kombela va ku: ‘Papayi wa wena a a hi tikisela wutomi, hi kombela u hi vevukisela,’ u ku: ‘Ni ta mi tikisela hintamu ku tlula leswi papayi wa mina a nga mi tikiselisa* swona.
11 Papayi a mi rhwexe ndzhwalu wa ku tika, kambe mina ni ta wu yengesela. Papayi a a mi ba hi tinhonga* tinene, kambe mina ni ta mi ba hi tinhonga ta mimintwa.’”
12 Yerobuwamu ni vanhu hinkwavu va tlhela va ya ka Robuwamu hi siku la wunharhu, hi ku landza leswi a nga va byela swona a ku: “Vuyani ka mina hi siku la wunharhu.”+
13 Kambe hosi a yi va hlamulanga kahle. Hosi Robuwamu a yalise swoleswo ku yendla leswi a nga byeliwa hi madoda.
14 A yendle leswi a nga byeliwa hi madjaha lawa a nga kula na wona, a ku: “Ni ta mi tikisela ndzhwalu wa n’wina funtshi ni ta wu yengesela. Papayi wa mina a a mi ba hi tinhonga tinene kambe mina ni ta mi ba hi tinhonga ta mimintwa.”
15 Hosi a yi va yingisanga vanhu. Leswi swi yendleke hi mhaka ya Xikwembu xa ntiyiso,+ swaku ku ta yendleka leswi Yehovha a nga swi byela Yerobuwamu n’wana wa Nebati hi ku tirhisa Ahiya+ wa le Xilo.
16 Loko Vayisrayele hinkwavu va vona swaku hosi a yi va yingisanga, va yi hlamula va ku: “Davhida n’wana wa Yese a hi hosi ya hina. Se n’wina Vayisrayele hinkwenu, tlhelelani ka swikwembu swa n’wina! Se wena Davhida, sala ni mfumu wa wena.”+ Vayisrayele hinkwavu va gama va muka.+
17 Kambe Robuwamu a tame a fuma Vayisrayele lava a va tshama ka madoropa ya Yuda.+
18 Se Hosi Robuwamu a rhuma Adorami,+ lweyi a a vonelela swikarawa swaku a ya ka Vayisrayele, kambe Vayisrayele va mu ba hi maribye a za a fa. Hosi Robuwamu a vhela a famba hi nyolo* ya yena a baleka a ya Yerusalema.+
19 Ku sukela ka nkama wolowo, Vayisrayele va terekele mfumu wa Davhida anze namuntlha.
Tinhlamunselu ta le hansi
^ Hi Xiheberu: “xintiwhani xa mina xi ta va xikulu ku tlula masenge ya papayi”.
^ Kumbe: “timpsika; minkhavi”.
^ Kumbe: “n’qolo; kalichi”.