Tikronika Ta Wumbirhi 13:1-22
13 Hi lembe la wu 18 la ku fuma ka Hosi Yerobuwamu, Abiya a sungule ku fuma aYuda.+
2 A fume malembe manharhu aYerusalema. Vito la mamani wa yena a ku li Mikaya+ n’wana wa Uriyeli wa le Jibiya.+ Funtshi ku ve ni nyimpi axikarhi ka Abiya na Yerobuwamu.+
3 Se Abiya a ya nyimpini na a ni 400.000 wa tinhenha leti nga djondzisiwa kahle ku lwa nyimpi.+ Yerobuwamu na yena a tilunghiselela ku lwa nyimpi na a ni 800.000 wa tinhenha, leti na tona ti nga djondzisiwa kahle ku lwa nyimpi.
4 Kutani Abiya a nyima henhla ka Ntshava ya Zemarayimi, leyi nga ka ndhawu ya tintshava ya Efrayimi a ku: “Ni yingisi, wena Yerobuwamu ni tiko hinkwalu la Israyele.
5 Mo kala mi nga swi tivi swaku Yehovha Xikwembu xa Israyele a nyike Davhida ni vana va yena+ a mfumu swaku va fuma tiko la Israyele hi nkama wa ku kala wu nga heli,+ hi ku ya hi ntwananu wa ku kala wu nga txintxiwi?*+
6 Kambe Yerobuwamu+ n’wana wa Nebati, mutirhi wa Solomoni n’wana wa Davhida, a djikele hosi ya yena.+
7 Kutani vanhu va ku kala va nga pfuni nchumu va sungula ku nyima na Yerobuwamu. Se va gama va va ni matimba ku tlula Robuwamu n’wana wa Solomoni hikusa Robuwamu a ha li mutsongo naswona a a nga ta swi kota ku lwa na vona.
8 “Swoswi mi pimisa swaku mi ta hlula mfumu wa Yehovha lowu rhangeliwaka hi vana va Davhida hi mhaka ya leswi mi nga vanyingi ni leswi mi nga ni swihon’wani swa woru leswi nga swikwembu swa n’wina leswi mi nga yendleliwa swona hi Yerobuwamu.+
9 Kambe a hi n’wina mi nga hlongola vaprista va Yehovha,+ ku nga vana va Aroni ni Valevhi naswona a hi n’wina mi nga tilangela vaprista ku fana ni vanhu va matiko man’wani?+ Mun’wani ni mun’wani lweyi a a ta na a khome xihon’wani ni 7 wa tinyempfu ta xinuna a mi mu yendla muprista wa minchumu ya ku a hi swikwembu.
10 Loko ku li hina, Yehovha i Xikwembu xa hina,+ funtshi a hi mu tshikanga; vaprista va hina, ku nga vana va Aroni, va tirhela Yehovha na va pfuniwa hi Valevhi.
11 Va yendlela Yehovha magandzelo ya ku hisiwa mixo wun’wani ni wun’wani ni madlambu man’wani ni man’wani,+ va tlhela va hisa a swinun’hwelisu,*+ va veka mapawu ya ku kwetsima+ ahenhla ka meza lowu nga yendliwa hi woru la ku tenga naswona madlambu man’wani ni man’wani va layitha mimotso*+ leyi nga henhla ka xa ku tlhateka mimotso lexi nga yendliwa hi woru.+ Hina hi yendla leswi hi faneleke hi swi yendlela Yehovha Xikwembu xa hina; kambe n’wina mi mu tshikile.
12 Xikwembu xa ntiyiso xi na hina, xa hi rhangela ni vaprista va xona lava nga khoma timhalamhala* leti chayiwaka hi nkama wa nyimpi. N’wina vavanuna va Israyele, mi nga lwi na Yehovha Xikwembu xa vavhovho va n’wina, hikusa mi ta hluliwa.”+
13 Kambe Yerobuwamu a rhuma masonchwa man’wani swaku ma va djuma hi le ndzhaku, kasi man’wani ma va phambheni ka Vayuda, se masonchwa ma va djuma hi le ndzhaku.
14 Nkama Vayuda va nga ndzuluka, va kume swaku a va pfaleliwile phambheni ni le ndzhaku. Va gama va sungula ku huwelela ka Yehovha,+ vaprista na va chaya timhalamhala ti vanga guwa hintamu.
15 Kutani vanhu va Yuda va vanga guwa la nyimpi. Nkama va nga yendla leswo, Xikwembu xa ntiyiso xi hlula Yerobuwamu ni tiko hinkwalu la Israyele aphambheni ka Abiya ni Vayuda.
16 Vayisrayele va baleka hi ku chava Vayuda, kutani Xikwembu xi pfuna Vayuda swaku va va hlula.
17 Abiya ni masonchwa ya yena va dlaya vanhu va vanyingi hintamu. Ku dlayiwe 500.000 wa masonchwa ya Vayisrayele lawa ma nga djondzisiwa kahle ku lwa nyimpi.
18 Vayisrayele va danisiwile hi siku lolelo, Vayuda va va hlulile hikusa a va tshemba Yehovha Xikwembu xa vavhovho va vona.+
19 Abiya a tame a hlongolisa Yerobuwamu a mu tekela madoropa ya yena, ku nga Betele+ ni swidoropani leswi nga kusuhi, Yexana ni swidoropani leswi nga kusuhi, na Efrayini+ ni swidoropani leswi nga kusuhi.
20 Yerobuwamu a nga ha tlhelanga a va ni matimba hi nkama wa ku fuma ka Abiya; se Yehovha a mu khatisa a gama a fa.+
21 Kambe Abiya a va ni matimba. Hi ku famba ka nkama a teka 14 wa vavasati,+ a va ni 22 wa vana va madjaha ni 16 wa vana va tintombhi.
22 Timhaka hinkwatu ta wutomi la Abiya, ni hinkwaswu leswi a nga swi yendla ni ku swi hlaya, swi tsaliwile hi muprofeta Ido.+
Tinhlamunselu ta le hansi
^ Hi Xiheberu: “ntwananu wa munyu.”
^ Kumbe: “malambhu”.
^ Vona Ntlhamuselo.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.