Tikronika Ta Wumbirhi 14:1-15
14 Kutani Abiya a fa a gama a lahliwa lani vavhovho va yena va nga lahliwa kona ka Doropa la Davhida;+ se Asa n’wana wa yena a va hosi. A nkama a ku fuma yena ku ve ni ku rhula ka tiko hinkwalu ku ringana 10 wa malembe.
2 Asa a yendlele Yehovha Xikwembu xa yena minchumu yayinene ni ya ku lulama.
3 A suse maaltari ya vamatiko+ ni tindhawu ta ku tlakuka leti a va gandzela ka tona, a tlhela a dilizela a mapilari lawa a va ma yendle swikwembu+ ni ku tsema timhandzi ta Axera.*+
4 A tlhela a byela vanhu va Yuda swaku va tirhela Yehovha Xikwembu xa vavhovho va vona ni ku yingisa Nawu ni leswi a nga va byela swona.
5 A suse tindhawu ta ku tlakuka leti a va gandzela ka tona ni leswi a va tlhateka ka swona swinun’hwelisu*+ ka tiko hinkwalu la Yuda naswona mfumu wa yena a wu karhatiwanga hi nchumu.
6 A yake madoropa lawa ma nga ni mimuru ya ku tiya aYuda,+ hikusa a ku ni ku rhula atikweni funtshi a ku nga na munhu lweyi a a lwa na yena, hikusa Yehovha a a mu humulisile.+
7 Se a byela vanhu va Yuda a ku: “A hi yakeni madoropa, hi gama hi yaka mimuru matlhelweni ka wona, ni maprediyu,*+ hi veka swipfalu ni swa ku khiya hi swona. Hikusa hi nyikiwe tiko hi mhaka ya leswi hi nga lava Yehovha Xikwembu xa hina. Hi mu lavile naswona a hi vhikelile ka valala va hina.” Va gama va heta ku yaka.+
8 Asa a a ni 300.000 wa masonchwa ya lixaka la Yuda, lawa a ma khoma swivhikelo swaswikulu ni matlharhi. Ka lixaka la Benjamini a a ni 280.000 wa masonchwa ya matimba lawa a ma khoma swivhikelo swaswitsongo ni tigubu.+
9 Hi ku famba ka nkama, Zera wa le Etiyopiya a tile swaku a ta lwa na vona, a a ni 1.000.000* wa masonchwa ni 300 wa tinyolo* ta nyimpi.+ Nkama a nga fika aMarexayi,+
10 Asa a humile swaku a ya lwa na yena, va fike va tilulamisela ku lwa nyimpi ka Nkova wa Zefata aMarexayi.
11 Kutani Asa a sungula ku khongela ka Yehovha Xikwembu xa yena+ a ku: “Yehovha, a wu na mhaka swaku lava u va pfunaka i vanyingi kumbe a va na matimba.+ Hi pfune, Yehovha Xikwembu xa hina, hikusa hi tshembe wena+ naswona hi tele ku ta lwa ni xitshungu lexi hi vito la wena.+ Yehovha, u Xikwembu xa hina. U nga pfumeli swaku munhu a ku hlula.”+
12 Kutani Yehovha a hlula Vaetiyopiya aphambheni ka Asa ni le phambheni ka vanhu va Yuda, Vaetiyopiya va gama va baleka.+
13 Asa ni masonchwa ya yena va va hlongolisa va za va ya fika aJerari.+ Vaetiyopiya va tama va dlayeteliwa anze va hela, hikusa va helisiwe hi ku helela hi Yehovha ni masonchwa ya yena. Vanhu va Yuda va gama va teketela minchumu ya yinyingi ya Vaetiyopiya.
14 Se va hlasela madoropa hinkwawu lawa a ma li kusuhi ni Jerari, hikusa Yehovha a yendle swaku vanhu lava tshamaka ka madoropa wolawo va chava; va gama va teketela minchumu ka madoropa wolawo hikusa a ku ni minchumu ya yinyingi.
15 Va tlhela va hlasela vanhu lava nga ni swifuyu lava a va tshama ka matende, va va tekela swifuyu swa swinyingi ni makamela kutani va tlhelela aYerusalema.
Tinhlamunselu ta le hansi
^ Vona Ntlhamuselo.
^ Vona Ntlhamuselo.
^ Kumbe: “swihondzo; switezi”.
^ Kumbe: “um milhão”.
^ Kumbe: “tin’qolo; makalichi”.
