Tikronika Ta Wumbirhi 22:1-12
22 Kutani vanhu va le Yerusalema va veka Akaziya xigumandzeni xa Yehorama swaku a va hosi a pfaleta papayi wa yena, hikusa vamakwavu va yena hinkwavu vavakulu a va dlayiwe hi masonchwa lawa a ma teketela minchumu ya van’wanyani lawa a ma te ni Vaarabiya.+ Se Akaziya n’wana wa Yehorama a sungula ku fuma aYuda.+
2 Akaziya a a ni 22 wa malembe nkama a nga va hosi funtshi a fume lembe lin’we aYerusalema. Vito la mamani wa yena a ku li Ataliya+ ntukulu* wa Omiri.+
3 Na yena a tekelele mahanyelo ya ku biha ya ndjangu wa Akabu,+ hikusa mamani wa yena a a mu xengetela ku yendla swa ku biha.
4 A tame a yendlela Yehovha swa ku biha, ku fana ni ndjangu wa Akabu, hikusa loko papayi wa yena se a file hi wona a wu mu byeletela leswi a a fanele a swi yendla, funtshi leswo swi game swi mu peta nghozini.
5 A yendle leswi va nga mu byela swona, se a famba na Yehorama n’wana wa Akabu hosi ya Israyele va ya lwa na Azayele+ hosi ya Siriya aRamoti-Jiliyadi,+ lani lava va ku txopa va nga vavisa Yehorama kona.
6 Kutani a tlhela a ya Yezreyeli+ swaku swilondza swa yena swi ya hola. Swilondza leswi, a a vavisiwe aRama nkama na a lwa na Azayele hosi ya Siriya.+
Akaziya* n’wana wa Yehorama+ hosi ya Yuda a ye Yezreyeli a ya pfuxela Yehorama+ n’wana wa Akabu, hikusa a a vavisiwile.*+
7 Kambe lipfhumba la Akaziya la ku ya vona Yehorama li yendle swaku Xikwembu xi mu dlaya; nkama a nga fika, a fambe na Yehorama swaku a ya tlhangana na Yewu+ ntukulu wa Nimxi, lweyi Yehovha a a mu langile swaku a helisa ndjangu wa Akabu.+
8 Nkama Yewu a nga sungula ku helisa ndjangu wa Akabu, a kume varhangeli va Yuda, vana va vamakwavu va Akaziya ni vatirhi va Akaziya a gama a va dlaya.+
9 Kutani a famba a ya lava Akaziya; se vanhu va yena va mu kuma lomu a a tumbele kona aSamariya va gama va mu yisa ka Yewu. Va mu dlayile va tlhela va mu lahla+ hikusa va te: “Lweyi i ntukulu wa Yehoxafati lweyi a a gandzela Yehovha hi mbilu ya yena hinkwayu.”+ A ku nga ha na mun’wani ka ndjangu wa Akaziya lweyi a a ni matimba ya ku fuma.
10 A nkama Ataliya+ mamani wa Akaziya a nga vona swaku n’wana wa yena a file, a dlaye vana hinkwavu va le wuhosini la Yuda.+
11 Kambe, Yehoxabeti n’wana wa hosi a teke Yehowaxi+ n’wana wa Akaziya na a nga voniwi hi munhu swaku a nga dlayiwi ni vana lavan’wani va hosi. A mu tekile a ya mu fihla ka kwartu la le ndzeni na a ni wansati lweyi a a mu hlayisa. Yehoxabeti n’wana wa Hosi Yehorama,+ (a a li nsati wa muprista Yoyada+ funtshi a a li makwavu wa Akaziya) a mu fihlile funtshi Ataliya a nga mu dlayanga.+
12 Yehowaxi a tshame na vona 6 wa malembe na va mu fihlile ka yindlo ya Xikwembu xa ntiyiso, hi nkama lowu Ataliya a a fuma tiko.
Tinhlamunselu ta le hansi
^ Hi Xiheberu: “n’wana”.
^ Kumbe: “a a vabya.”
^ Ka matsalwa man’wani ya Xiheberu a vitaniwa Azariya.
