Tikronika Ta Wumbirhi 23:1-21
23 Hi lembe la wu 7, Yoyada a kombise swaku a nga chavi nchumu hi ku yendla ntwananu ni lava a va rhangela mintlawa ya 100 wa vanhu,+ ku nga Azariya n’wana wa Yerohamu, Ismayeli n’wana wa Yehohanani, Azariya n’wana wa Obede, Mazeya n’wana wa Adaya na Elixafati n’wana wa Zikiri.
2 Se va ya ka tiko hinkwalu la Yuda va fika va hlengeleta Valevhi+ ku sukela ka madoropa hinkwawu ya Yuda ku ya fika ka varhangeli va mindjangu ya Israyele. Nkama va nga fika aYerusalema,
3 hinkwavu lava a va hlengeletanile kolanu va yendle ntwananu+ ni hosi ka yindlo ya Xikwembu xa ntiyiso, Yoyada a gama a ku:
“Yingisani! N’wana wa hosi hi yena lweyi a nga ta fuma, hi ku ya hi leswi Yehovha a nga tshembisa Davhida ni vana va yena.+
4 Yendlani leswi: Yavani vaprista ni Valevhi lava tirhaka+ hi Savata va va mintlawa yinharhu, ntlawa wun’we wu fanele wu vonelela tinyanghwa;+
5 ntlawa lowun’wani wu ta va ka yindlo ya hosi,+ kasi wa wunharhu wu ta va ka Nyanghwa lowu vitaniwaka Nyanghwa wa Masungulo, funtshi vanhu hinkwavu va ta va ka mikintari* ya yindlo ya Yehovha.+
6 Mi nga pfumeleli munhu a nghena ka yindlo ya Yehovha loko ku nga li vaprista ni Valevhi lava tirhaka kona.+ Vona va nga nghena hikusa i ntlawa wa ku kwetsima, kasi vanhu lavan’wani hinkwavu va fanele va yendla leswi hlayiwaka hi nawu wa Yehovha.
7 Valevhi va fanele va nyima ka matlhelo hinkwawu ya hosi, hinkwavu na va khome matlharhi ya vona. Lweyi a nga ta nghena ka yindlo a ta dlayiwa. Mi fanele mi famba ni hosi hinkwaku lani yi yaka kona.”
8 Valevhi ni tiko hinkwalu la Yuda va yendle leswi muprista Yoyada a nga va byela swona. Murhangeli hi mun’we a teke ntlawa wa yena wa lava a va tirha hi Savata ni lava a va nga tirhi hi Savata,+ hikusa muprista Yoyada a nga yi tshikanga mintlawa+ leyi yi muka yi tshika ku yendla mintirho ya yona.
9 Se muprista Yoyada a teka matlharhi, swivhikelo swa redondu ni swivhikelo swaswitsongo, leswi a swi li swa Hosi Davhida,+ leswi a swi li ka yindlo ya Xikwembu xa ntiyiso+ a swi nyika lava a va rhangela mintlawa ya 100 wa vanhu.+
10 Kutani a nyimisa vanhu hinkwavu, hinkwavu a va khome matlharhi ya vona, ku sukela ka tlhelo la xinene la yindlo ku ya ka tlhelo la ximatsi, a va nyime kusuhi ni altari ni kusuhi ni yindlo, na va vhikela hosi matlhelo hinkwawu.
11 Kutani va humesa n’wana wa hosi+ va mu tlhateka harhi* ya wuhosi ni buku ya Nawu,+ se Yoyada ni vana va yena va mu chela mafurha va mu veka swaku a va hosi. Va gama va ku: “Hosi hanya hi masiku!”+
12 Nkama Ataliya a nga twa vanhu na va tsutsuma va hoyozela hosi, na yena a kahlula a nghena ka yindlo ya Yehovha lomu vanhu lava a va li kona.+
13 Se a vona hosi na yi nyime kusuhi ni pilari leli a li li nyanghweni. A varhangeli+ ni lava a va chaya timhalamhala* a va nyime kusuhi ni hosi, funtshi vanhu hinkwavu va tiko a va tsakile+ na va chaya timhalamhala naswona lava a va yimbelela na va khome minchumu ya ku chaya hi yona, hi vona a va rhangela nkama na ku dzunisiwa hosi. Kutani Ataliya a handzula mpahla ya yena, a huwelela a ku: “Vaxengi! Vaxengi!”
14 Muprista Yoyada a humesa lava a va rhangela mintlawa ya 100 wa vanhu lava va nga langiwa swaku va rhangela nyimpini, a ku: “Mu humeseni, loko ku ni munhu lweyi a nyimaka na yena, mu dlayeni hi xipada!” Hikusa muprista a a te: “Mi nga mu dlayeni ka yindlo ya Yehovha.”
15 Se va mu khoma va famba na yena; a nkama va nga fika ka nyanghwa wa yindlo ya hosi lowu a wu vitaniwa Nyanghwa wa Makavhalu, va vhela va mu dlayela kolanu.
16 Kutani Yoyada a yendla ntwananu yena ni vanhu hinkwavu ni hosi swaku va ta tshama na va li vanhu va Yehovha.+
17 Vanhu hinkwavu va gama va ya ka tempele ya Bali va fika va yi dilizela,+ va dilizela ni maaltari ya yena, va fayetela swifaniso swa yena hinkwaswu,+ va tlhela va dlaya Matani muprista wa Bali+ phambheni ka maaltari.
18 Yoyada a veka vaprista ni Valevhi swaku va vonelela yindlo ya Yehovha; a va langiwe hi Davhida swaku va vonelela yindlo ya Yehovha hi ku ya hi mintlawa ya vona, a va yendlela Yehovha+ magandzelo ya ku hisiwa hi ku ya hi leswi a swi tsaliwile ka Nawu wa Moxe,+ a va swi yendla na va tsakile va tlhela va yimbelela hi ku ya hi leswi Davhida a nga va byela swona.
19 A veke vagwardu+ ka tinyanghwa ta yindlo ya Yehovha swaku ku nga tshuki ku nghena munhu lweyi a kalaka a nga basanga.
20 A tlhele a teka vanhu lava a va rhangela mintlawa ya 100 wa vanhu,+ varhangeli van’wani ni vanhu hinkwavu va tiko swaku va famba ni hosi loko yi huma ka yindlo ya Yehovha yi ya ka yindlo ya wuhosi. Kutani va nghena ka yindlo ya wuhosi hi nyanghwa wa le henhla, se a hosi yi fika yi tshama ka xitshamu xa wuhosi.+
21 Vanhu hinkwavu atikweni a va tsakile hikusa a ku ni ku rhula ka doropa hi mhaka ya leswi Ataliya a nga dlayiwa hi xipada.
Tinhlamunselu ta le hansi
^ Vona Ntlhamuselo.
^ Kumbe: “korowa”.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
