Tikronika Ta Wumbirhi 24:1-27
24 Yehowaxi a a ni 7 wa malembe nkama a nga va hosi+ funtshi a fume 40 wa malembe aYerusalema. Vito la mamani wa yena a ku li Zibiya lweyi a nga psaliwa aBerxeba.+
2 Yehowaxi a tame a tirhela Yehovha hi ku tshembeka ka masiku hinkwawu ya muprista Yoyada.+
3 Yoyada a mu langele vasati vambirhi, a gama a va ni vana va madjaha ni va tintombhi.
4 Hi ku famba ka nkama Yehowaxi a navela ku lunghisa yindlo ya Yehovha.+
5 Se a tlhanganisa vaprista ni Valevhi a va byela a ku: “Fambani mi ya ka madoropa ya Yuda, mi fika mi hlengisa male ka tiko hinkwalu la Israyele swaku lembe ni lembe ku ta lunghisiwa yindlo ya Xikwembu xa n’wina;+ funtshi mi fanele mi hantla mi sungula.” Kambe Valevhi va hlwela ku swi yendla.+
6 Kutani hosi yi vitana Yoyada lweyi a a li murhangeli yi mu vutisa yi ku:+ “Hi mhaka muni u nga byelanga Valevhi swaku va tisa rhesa* la ku kwetsima leli taka hi Yuda ni Yerusalema, leli Moxe+ mutirheli wa Yehovha a nga hlaya swaku li fanele li humesiwa, ku nga rhesa la ku kwetsima la Vayisrayele leli a li humeseliwa tende la Wumboni?+
7 Hikusa vana va Ataliya,+ wansati lwiyani wa mbilu ya ku biha va tlhanye yindlo ya Xikwembu xa ntiyiso+ va nghena va teka swilo hinkwaswu swa ku kwetsima leswi a swi li ka yindlo ya Yehovha va swi tirhisela Bali.”
8 Kutani hosi yi va rhuma swaku va hamba kaxa+ va li veka handle ka nyanghwa wa yindlo ya Yehovha.+
9 Se va gama va huwelela aYuda ni le Yerusalema swaku va humesela Yehovha rhesa la ku kwetsima+ leli Moxe mutirheli wa Xikwembu xa ntiyiso a nga byela Vayisrayele amananga swaku va li humesa.
10 Varhangeli hinkwavu ni vanhu hinkwavu va tsaka,+ kutani va tama va peta minyikelo ka kaxa anze li tala.
11 Loko Valevhi va teka kaxa va li yisa ka hosi, va gama va vona swaku kaxa li tale hi male, sekretariyu* wa hosi ni mupfunisi wa muprista wamukulu a va fika va humesa male leyi a yi li ka kaxa+ va gama va li tlhelisa ka ndhawu ya lona. A va yendla leswo siku ni siku naswona va hlengelete male ya yinyingi.
12 Hosi na Yoyada a va teka male leyo va yi nyika lava a va vonelela ntirho lowu a wu yendliwa ka yindlo ya Yehovha kutani vona a va thola lava tsemaka maribye, lava tivaka ku yendla mintirho ya ku hambanahambana swaku va lunghisa yindlo ya Yehovha+ ku patsa ni lava tirhaka hi nsimbi ni kobre swaku va lunghisa yindlo ya Yehovha.
13 Lava a va vonelela ntirho va sungula ku tirha, ntirho wa ku lunghisa a wu tama wu yendliwa na wu voneleliwa hi vona, va lunghise yindlo ya Xikwembu xa ntiyiso yi tshamisa leswi a yi li xiswona a ku sunguleni va tlhela va yi tiyisa.
14 Nkama va nga heta, va teke male hinkwayu leyi nga sala va yi yisa ka hosi na Yoyada, kutani va yi tirhisela ku yendla swibya leswi a swi ta tirhisiwa ka yindlo ya Yehovha, swibya swa ku tirha hi swona, swa ku yendla magandzelo, tikopo ni swibya swa woru ni swa prata.+ A ku yendliwa magandzelo ya ku hisiwa+ siku ni siku ka yindlo ya Yehovha, na Yoyada wa ha hanya.
15 Yoyada a fe na a gugile swinene na a tikhorisile hi wutomi; a a ni 130 wa malembe nkama a nga fa.
16 Kutani a lahliwa ka Doropa la Davhida lomu a ku lahliwa kona tihosi,+ hikusa a yendle minchumu yayinene aIsrayele+ hi mhaka ya leswi a a hlonipha Xikwembu xa ntiyiso ni yindlo ya xona.
17 Loko Yoyada se a file, varhangeli va Yuda va ye ka hosi va fika va yi khizamela, hosi yi gama yi va yingisa.
18 Va tshike yindlo ya Yehovha Xikwembu xa vavhovho va vona va sungula ku gandzela timhandzi ta Axera* ni swifaniso, xi za Xikwembu xi kwatela vanhu va Yuda ni va Yerusalema hi mhaka ya xidjoho xa vona.
19 Yehovha a a rhuma vaprofeta hi ku phindhaphindha swaku va va byela swaku va tlhelela ka yena, va tame va va basopisa kambe a va yingisanga.+
20 Moya wa ku kwetsima wa Xikwembu wu va ka Zakariya n’wana wa muprista Yoyada+ kutani a nyima phambheni ka vanhu a ku: “Xikwembu xa ntiyiso xi li: ‘Hi mhaka muni mi nga yingisi minawu ya mina Yehovha? A swi nga ta mi fambela kahle! Leswi mi nga ni tshika mina Yehovha, na mina ni ta mi tshika.’”+
21 Kambe va mu djikela+ va mu ba hi maribye ka kintari* wa yindlo ya Yehovha hi ku ya hi leswi hosi yi nga va byela swona.+
22 Hosi Yehowaxi a nga swi khumbukanga leswi Yoyada papayi wa Zakariya a nga mu rhandzisa xiswona, hikusa a dlaye Zakariya n’wana wa Yoyada, lweyi nkama lowu na a fa, a nga te: “Yehovha a a ku khatise hi mhaka ya leswi.”+
23 A ku sunguleni ka lembe, masonchwa ya Siriya ma tile ma ta lwa na Yehowaxi kutani ma hlasela Yuda ni Yerusalema.+ Se ma dlaya varhangeli hinkwavu+ ma tlhela ma teka minchumu hinkwayu leyi ma nga yi teka Yuda ni Yerusalema ma ya yi nyika hosi ya Damaxka.
24 Hambileswi masonchwa ya Siriya a ma nga li manyingi, Yehovha a yendle swaku ma hlula masonchwa ya manyingi hintamu,+ hi mhaka leswi va nga mu tshika yena Yehovha Xikwembu xa vavhovho va vona; se masonchwa ya Siriya ma khatise Yehowaxi.
25 Nkama ma nga suka (hikusa ma mu siye na ma mu vavise swinene*), vatirhi va yena va mu djikelile hi mhaka ya leswi a nga dlaya vana va muprista Yoyada.+ Va mu dlayile ka mubedu wa yena.+ Kutani a fa va ya mu lahla ka Doropa la Davhida,+ kambe a va mu lahlanga lomu a ku lahliwa kona tihosi.+
26 Lava va nga mu djikela+ a ku li Zabadi n’wana wa Ximeyati wa Muamoni na Yehozabadi n’wana wa Ximiriti wa Mumowabu.
27 Timhaka hinkwatu ta vana va yena, leswi a nga khatisisiwa xiswona+ ni ku lunghisiwa ka yindlo ya Xikwembu xa ntiyiso,+ swi tsaliwile ka Buku leli vulavulaka hi Tihosi. Se Amaziya n’wana wa yena a va hosi.
Tinhlamunselu ta le hansi
^ Kumbe: “impoxtu; tinemba”.
^ Kumbe: “matsalana; mabalani”.
^ Vona Ntlhamuselo.
^ Vona Ntlhamuselo.
^ Kumbe: “na a ni mavabyi ya manyingi”.
