Tikronika Ta Wumbirhi 28:1-27
28 Akazi+ a a ni 20 malembe nkama a nga va hosi funtshi a fume 16 wa malembe aYerusalema. A nga mu yendlelanga swaswinene Yehovha ku hambana na Davhida vhovho wa yena,+
2 a yendle swilo swa ku biha leswi nga yendliwa hi tihosi ta Israyele+ funtshi a tlhele a yendla swifaniso swa nsimbi+ swa Bali.
3 A tlhele a yendla magandzelo ka Nkova wa N’wana wa Hinomi,* a hisa vana va yena hi ndzilu a yendla magandzelo hi vona;+ a yendle swilo swa ku nyenyentsa leswi a swi yendliwa hi matiko+ lawa Yehovha a nga ma hlongola phambheni ka Vayisrayele.
4 A tlhela a yendla magandzelo ya ku hisiwa ka tindhawu ta ku tlakuka leti a ku gandzeliwa ka tona,+ ka maganga ni hansi ka minsinya hinkwayu yayikulu.+
5 Kutani Yehovha Xikwembu xa yena a mu nyikela ka hosi ya Siriya+ leyi nga mu hlula yi gama yi teka vanhu va vanyingi yi va yisa awukaraweni aDamaxka.+ Xikwembu xi tlhele xi yendla swaku a hluliwa hi hosi ya Israyele leyi nga dlaya vanhu va yena va vanyingi hintamu.
6 Peka+ n’wana wa Remaliya a dlaye 120.000 wa masonchwa ya matimba hi siku lin’we aYuda, hinkwavu a ku li vavanuna va ku kala va nga chavi nchumu. Leswi swi va humelele hi mhaka ya leswi va nga tshika Yehovha Xikwembu xa vavhovho va vona.+
7 Zikiri lweyi wa Muefrayimi lweyi a a li sonchwa la matimba, a dlaye Mazeya n’wana wa hosi na Azirikami, lweyi a a vonelela yindlo ya hosi, na Elkana lweyi a a li wa wumbirhi na a landzela hosi.
8 Vayisrayele va khome 200.000 wa vamakwavu va vona va va yisa awukaraweni, a ku li vavasati, vana va madjaha ni vana va tintombhi; va tlhele va va tekela minchumu ya yinyingi va yi yisa aSamariya.+
9 Kambe kolanu a ku na Odedi muprofeta wa Yehovha. Se a ya phambheni ka masonchwa lawa a ma ya Samariya a fika a ku: “Yingisani! Yehovha Xikwembu xa vavhovho va n’wina a kwatele vanhu va Yuda, hi leswo swi nga yendla swaku a va tshika+ mi va dlayisa ximona swi za swi fika ni le tilweni.
10 Swoswi mi lava ku yendla swaku vanhu va Yuda ni Yerusalema va va swikarawa swa n’wina swa xinuna ni swa xisati.+ Kasi n’wina, mo kala mi nga na nandzu phambheni ka Yehovha Xikwembu xa n’wina?
11 Ni yingiseni, tlhelisani vanhu lava mi nga va teka ka vamakwenu va n’wina mi va yendla swikarawa, hikusa Yehovha a mi kwatelile hintamu.”
12 Se varhangeli van’wani va Vaefrayimi, ku nga Azariya n’wana wa Yehohanani na Berekiya n’wana wa Mexilemoti, Yeyizikiya n’wana wa Xalumi na Amasa n’wana wa Adilayi, va holovisa lava a va vuya hi le nyimpini,
13 va ku: “Mi nga tisi swikarawa lani, hikusa hi ta va ni nandzu ka Yehovha. Leswi mi swi yendlaka swi ta yengetela swidjoho swa hina ni minandzu ya hina, hikusa hi ni swidjoho swa swinyingi funtshi Xikwembu xi li kwatele hintamu tiko la Israyele.”
14 Se masonchwa lawa a ma vuya hi nyimpini ma teka swikarawa ni swibya leswi ma nga vuya na swona+ ma swi yisa ka varhangeli ni le ka vanhu hinkwavu.
15 Kutani vavanuna lava a va langiwile hi mavito va teka swikarawa hinkwaswu leswi a swi nga na mpahla,* va swi nyika mpahla ka minchumu leyi va nga vuya na yona hi le nyimpini. Va swi yambexa va tlhela va swi nyika masandaliya, swakudla ni swa ku phuza, va swi nyika ni mafurha swaku swi tola. Se swikarawa leswi a swi nga swi koti ku famba va swi khwelise ka timbongolo va swi yisa ka vamakwavu va swona aYeriko, ku nga doropa leli nga ni minsinya ya mintxindzu,* va gama va tlhelela Samariya.
16 Hi nkama wolowo, Hosi Akazi a kombela tihosi ta Asiriya swaku ti mu pfuna.+
17 Vaedomu va tlhela va hlasela vanhu va tiko la Yuda, va khoma van’wani va vona va va yendla swikarawa.
18 Vafilista+ va tlhela va hlasela madoropa ya Xefela+ ni Negebi wa Yuda, va teka doropa la Beti-Xemexi,+ Ayiyaloni,+ Jederoti, Soko ni swidoropani leswi nga kusuhi na kona, Timina+ ni swidoropani leswi nga kusuhi na kona ni Jimizu ni swidoropani leswi nga kusuhi na kona; va tshama kolanu.
19 Yehovha a khatisa vanhu va tiko la Yuda hi mhaka ya Akazi hosi ya Israyele hikusa a tshike Vayuda va djoha; leswo swi yendle swaku va nga ha tshembeki ka Yehovha.
20 Hi wugamu Tiglata-Pilinezere+ hosi ya Asiriya a fika a lwa na yena, a tlhela a mu hlupha+ ku hambana ni ku mu pfuna.
21 Akazi a teke minchumu hinkwayu leyi a yi li ka yindlo ya Yehovha, ka yindlo ya wuhosi+ ni le ka tiyindlo ta varhangeli a swi nyika hosi ya Asiriya; kambe swoleswo a swi mu pfunanga hi nchumu.
22 Hi nkama lowu a a hlupheka, Hosi Akazi a djohele Yehovha hintamu.
23 A sungule ku yendla magandzelo a yendlela swikwembu leswi nga mu hlula+ swa Damaxka+ a gama a ku: “Leswi swikwembu swa tihosi ta Siriya swi ti pfunaka, ni ta swi yendlela magandzelo swaku na mina swi ta ni pfuna.”+ Kambe swoleswo swi mu djohisile yena ni tiko hinkwalu la Israyele.
24 Akazi a tlhela a hlengeleta swibya leswi a swi li ka yindlo ya Xikwembu xa ntiyiso+ a gama a swi tsemelela, a pfala tinyanghwa ta yindlo ya Yehovha,+ a tiyendlela maaltari ka ponta yin’wani ni yin’wani ya Yerusalema.
25 Ka madoropa hinkwawu ya Yuda, a yendle tindhawu ta ku tlakuka swaku a yendlela swikwembu swin’wani magandzelo,+ a tlhela a kwatisa Yehovha Xikwembu xa vavhovho va yena.
26 Timhaka hinkwatu ta wutomi la yena, ni hinkwaswu leswi a nga swi yendla ku sukela a ku sunguleni anze magamu, swi tsaliwile ka Buku leli vulavulaka hi wutomi la Tihosi ta Yuda ni ta Israyele.+
27 Se Akazi a fa a gama a lahliwa lani vavhovho va yena va nga lahliwa kona; va mu lahle ka doropa aYerusalema, kambe a va mu lahlanga lani tihosi ta Israyele a ti lahliwa kona.+ Kutani Hezekiya n’wana wa yena a gama a va hosi.
Tinhlamunselu ta le hansi
^ Vona Ntlhamuselo ka rito “Gehena”.
^ Hi Xiheberu: “a swi nga yambalanga nchumu”.
^ Kumbe: “mapalmera”.
