Tikronika Ta Wumbirhi 30:1-27
-
Hezekiya a hamba fexta la Paxkwa (1-27)
30 Se Hezekiya a rhuma vanhu va ya ka tiko hinkwalu la Israyele+ ni la Yuda, a tlhela a tsala makarta a tsalela lixaka la Efrayimi ni la Manasi,+ a va byela swaku va ta ka yindlo ya Yehovha aYerusalema va ta yendlela Yehovha Xikwembu xa Israyele a Paxkwa.+
2 Kambe hosi, varhangeli ni vanhu hinkwavu va le Yerusalema va yendla xiboho xa ku yendla Paxkwa hi wheti ya wumbirhi,+
3 hikusa a va yi yendlanga hi nkama lowu a yi fanele yi yendliwa hi wona,+ hi mhaka ya leswi a ku nga na vaprista va vanyingi lava nga tibasisa+ naswona a ku nga na vanhu va vanyingi lava a va tlhanganile aYerusalema.
4 A hosi ni vanhu hinkwavu va pfumelelane na yona mhaka leyi.
5 Se va yendla xiboho xa ku byela tiko hinkwalu la Israyele mhaka leyi, ku sukela aBerxeba ku ya fika aDani,+ swaku vanhu a va fanele va ta Yerusalema va ta yendlela Yehovha Xikwembu xa Israyele a Paxkwa, hikusa a va nga se tshama va yi yendla na va tlhanganile hi ku ya hi leswi a swi tsaliwile ka nawu.+
6 Kutani lava a va heleketa makarta lawa ma taka hi ka hosi ni ka varhangeli lava yi nga va veka, va ya ka tiko hinkwalu la Israyele ni la Yuda hi ku ya hi leswi hosi yi nga va byela swona va ku: “N’wina Vayisrayele, tlhelelani ka Yehovha Xikwembu xa Abrahamu, xa Izaki ni xa Israyele, kuva na yena a ta tlhelela ka n’wina mi nga pona ku fumiwa hi tihosi ta Asiriya.+
7 Mi nga fani ni vavhovho va n’wina ni vamakwenu va n’wina lava kalaka va nga tshembekanga ka Yehovha Xikwembu xa vavhovho va vona, a za a va tisela makhombo ya ku chavisa lawa hambi n’wina mi ma vonaka.+
8 Swoswi mi nga tiwomiseni tinhloko ku fana ni vavhovho wa n’wina.+ Yingisani Yehovha mi ta ka yindlo ya yena+ leyi a nga yi yendla yi kwetsima hi nkama wa ku kala wu nga heli, mi tirhela Yehovha Xikwembu xa n’wina swaku a ta tshika ku mi kwatela.+
9 Hikusa loko mo tlhelela ka Yehovha, vamakwenu va n’wina ni vana va n’wina va ta kombiwa timpsalu hi lava va nga va yendla swikarawa+ naswona va ta va tshika va tlhela ka tiko leli,+ hikusa Yehovha Xikwembu xa n’wina a ni ntwelawusiwana ni timpsalu,+ a nge mi tshiki loko mi tlhelela ka yena.”+
10 Lava a va heleketa makarta va ye ka madoropa hinkwawu ya tiko hinkwalu la lixaka la Efrayimi ni la Manasi+ ni la Zebuloni, kambe vanhu a va va hleka va tlhela va va poyila.+
11 Kambe vanhu van’wani va lixaka la Aseri, la Manasi ni la Zebuloni va tiveke hansi va ya Yerusalema.+
12 Xikwembu xa ntiyiso xi pfune Vayuda swaku va twanana, va yendla leswi hosi ni varhangeli lava yi nga va veka va nga va byela swona hi ku ya hi leswi Yehovha a nga swi hlaya.
13 Vanhu va vanyingi va tlhanganile aYerusalema hi wheti ya wumbirhi+ swaku va ta hamba Fexta la Mapawu ya Ku Kala Fermentu;+ funtshi a va li vanyingi hintamu.
14 Se va sekeleka va nyima va susa maaltari lawa a ma li Yerusalema,+ va tlhela va susa ni maaltari hinkwawu ya ku hisela ka wona swinun’hwelisu*+ va ma txukumeta ka Nkova wa Kedroni.
15 Kutani hi siku la wu 14 la wheti ya wumbirhi, va dlaya swifuyu swa ku yendla magandzelo ya Paxkwa. Se vaprista ni Valevhi va dana kutani va tibasisa, va tlhela va tisa magandzelo ya ku hisiwa ka yindlo ya Yehovha.
16 Va nyima ka tindhawu leti va nga yaveliwa ku nyima ka tona hi ku ya hi Nawu wa Moxe mutirheli wa Xikwembu xa ntiyiso; kutani vaprista va n’wan’wasela ngati+ leyi a va nyiketiwe yona hi Valevhi.
17 A ku ni vanhu va vanyingi lava a va nga tibasisanga, kutani Valevhi a va vonelela ku dlayiwa ka swifuyu swa ku yendla magandzelo ya Paxkwa swa lava a va nga basanga,+ kuva va ta basisiwa phambheni ka Yehovha,
18 hikusa vanhu va vanyingi, ngopfungopfu lava taka hi ka lixaka la Efrayimi, la Manasi,+ la Isakara ni la Zebuloni a va nga tibasisanga, kambe va dlile Paxkwa, funtshi a va swi yendlanga leswi nga tsaliwa ka nawu. Kambe Hezekiya a va khongelela, a ku: “Wena Yehovha Xikwembu xa ku lulama,+ rivalela
19 mun’wani ni mun’wani lweyi a nga tinyimisela hi mbilu ya yena hinkwayu ku ku tirhela wena Yehovha Xikwembu xa ntiyiso,+ Xikwembu xa vavhovho va vona, hambileswi va kalaka va nga tibasisanga hi ku ya hi nawu wa fexta la ku kwetsima.”+
20 Se Yehovha a yingisa xikhongelo xa Hezekiya a gama a rivalela vanhu.
21 Kutani Vayisrayele lava a va li aYerusalema va hete 7 wa masiku na va hamba Fexta la Mapawu ya Ku Kala Fermentu,+ a va tsakile hintamu+ funtshi Valevhi ni vaprista a va dzunisa Yehovha siku ni siku na va chayela Yehovha minchumu ya vona ya ku chaya hi yona.+
22 Hezekiya a tlhela a vulavula ni Valevhi hinkwavu lava a va tirhela Yehovha hi wutlharhi a tlhela a va tiyisa. Kutani va heta 7 wa masiku+ na va dla swakudla ka fexta lolelo, va tlhela va yendla magandzelo ya ku kombela ku rhula+ ni ku khensa Yehovha Xikwembu xa vavhovho va vona.
23 Se vanhu hinkwavu va yendla xiboho xa ku tlhela va heta 7 wa masiku na va li ka fexta leli, kutani va heta 7 wa masiku lawa na va li ka fexta leli na va tsakile.+
24 Hezekiya hosi ya Yuda a yendlela vanhu munyikelo hi ku humesa 1.000 wa tihomu ni 7.000 wa tinyempfu kasi varhangeli lava a a va vekile va humese 1.000 wa tihomu ni 10.000 wa tinyempfu;+ vaprista va vanyingi a va li ku tibasiseni hi nkama wolowo.+
25 Vanhu hinkwavu va Yuda, vaprista, Valevhi ni vanhu hinkwavu lava taka hi ka tiko la Israyele,+ vanhu hinkwavu va ku ta hi ka matiko man’wani+ lava va tshama ka tiko la Israyele ni vanhu hinkwavu va matiko man’wani lava a va tshama aYuda va tame va tsaka.
26 Se vanhu va tsaka hintamu aYerusalema, hikusa ku sukela ka nkama lowu a ku fuma Solomoni n’wana wa Davhida hosi ya Israyele, a ku nga se tshama ku yendleka nchumu wa ku fana ni lowu aYerusalema.+
27 Hi wugamu vaprista lava nga Valevhi, va sekeleka va nyima va katekisa vanhu;+ naswona Xikwembu xi yingise marito ya vona ni xikhongelo xa vona na xi li ka ndhawu ya xona ya ku kwetsima lomu xi tshamaka kona atilweni.
Tinhlamunselu ta le hansi
^ Vona Ntlhamuselo.
