Tikronika Ta Wumbirhi 31:1-21
31 Nkama fexta li nga hela, Vayisrayele hinkwavu lava a va li kolanu va ye ka madoropa ya Yuda, va fika va dilizela mapilari lawa a va ma yendle swikwembu,+ va tsema timhandzi ta Axera,*+ va dilizela tindhawu ta ku tlakuka+ leti a va gandzela ka tona ni maaltari+ ka tiko hinkwalu la lixaka la Yuda, la Benjamini na Efrayimi na Manasi,+ anze va swi heta, loko se va gamile Vayisrayele hinkwavu va tlhelele ka madoropa ya vona.
2 Kutani Hezekiya a yava vaprista ni Valevhi hi ku ya hi mintlawa ya vona+ ni mintirho ya vona+ swaku va yendla magandzelo ya ku hisiwa ni ya ku kombela ku rhula, ni ku yendla ntirho wa Xikwembu va tlhela va xi khensa ni ku xi dzunisa ka tinyanghwa ta minkitari* ya yindlo ya Yehovha.+
3 Ku yendliwe magandzelo ya ku hisiwa+ hi swifuyu swin’wani swa hosi, ku patsa ni magandzelo ya nimixo ni ya nimadlambu,+ ni magandzelo lawa a ma hisiwa hi Tisavata,+ hi nkama wa ku huma ka n’weti+ ni hi nkama wa mafexta+ hi ku ya hi leswi a swi tsaliwile ka Nawu wa Yehovha.
4 A tlhele a byela vanhu lava a va tshama aYerusalema swaku va nyika vaprista ni Valevhi+ leswi a va fanele va nyikiwa swona kuva va ta wu landzelela hi ku helela nawu wa Yehovha.
5 Nkama va nga twa leswo, Vayisrayele va tise trigu,* vhinyu la nyuwani, mafurha,+ wulombe la tinyoxi ni minchumu hinkwayu leyi va nga yi tshovela masin’wini.+ Va tise swa ku sungula leswi va nga swi tshovela, va langa swa lisima swa kona; va tlhele va tisa wukhume* la linyingi la minchumu hinkwayu.+
6 Vanhu va Israyele ni va Yuda lava a va tshama ka madoropa ya Yuda, na vona va tise wukhume la tihomu, tinyempfu ni la minchumu ya ku kwetsima+ leyi nga nyikeliwa ka Yehovha Xikwembu xa vona. Va swi tisile va swi hlengeleta swi va swa swinyingi.
7 Hi wheti ya wunharhu+ va sungule ku tisa minyikelo ya vona na yi li yinyingi; va game ku yi nyikela hi wheti ya wu 7.+
8 Nkama Hezekiya ni varhangeli lava a nga va veka va nga fika va vona minchumu ya yinyingi leyi vanhu va nga yi nyikela, va dzunisa Yehovha va tlhela va katekisa vanhu va yena ku nga Vayisrayele.
9 Hezekiya a vutisa vaprista ni Valevhi swaku minyikelo liyani a yi ta hi kwini,
10 se Azariya muprista wamukulu wa ndjangu wa Zadoki a mu hlamula a ku: “Ku sukela nkama lowu va nga sungula ku tisa minyikelo ka yindlo ya Yehovha,+ vanhu a va dla va xurha ku tlhela ku sala minchumu ya yinyingi, hikusa Yehovha a katekise vanhu va yena funtshi minchumu leyi ya yinyingi leyi u yi vonaka yi yo sala.”+
11 Se Hezekiya a va byela swaku va lulamisela makwartu ya ku hlayisela minchumu ka wona+ ka yindlo ya Yehovha, kutani va ma lulamisa.
12 Vanhu va tame va tisa minyikelo, wukhume+ ni minchumu ya ku kwetsima hi ku tshembeka; Konaniya lweyi a a li Mulevhi a a vonelela minchumu leyi hinkwayu funtshi a a pfuniwa hi makwavu wa yena Ximeyi.
13 Yehiyele, Azaziya, Nahati, Azayeli, Yerimoti, Yozabadi, Eliyeli, Iximakiya, Mahati na Benaya a va li varhangeli lava a va pfuna Konaniya ni makwavu wa yena Ximeyi, hi ku ya hi nawu wa Hosi Hezekiya funtshi Azariya hi yena a a vonelela yindlo ya Xikwembu xa ntiyiso.
14 Kore n’wana wa Iminaya, Mulevhi lweyi a a vonelela nyanghwa lowu nga ka tlhelo la le wuxeni,+ a a vonelela magandzelo ya ku tirhandzela+ ya Xikwembu xa ntiyiso funtshi a a yava minchumu ya ku kwetsima+ hintamu ni minyikelo leyi a yi humeseliwa Yehovha.+
15 Ka madoropa ya vaprista+ a a pfuniwa hi Edeni, Miniyamini, Yexuwa, Xemaya, Amariya na Xekaniya, vavanuna lava a va yendla mintirho ya vona hi ku tshembeka swaku va phakela vamakwavu va vona a minchumu ya ku ringana lomu a va tirhela kona,+ a va yi phakela vavakulu ni vavatsongo.
16 A ku tlhela ku phakeliwa swakudla ka vamakwavu va vona va xinuna lava a va ta siku ni siku swaku va ta tirha ka yindlo ya Yehovha ni ku yendla mintirho leyi a va yi yendla ka mintlawa ya vona. Lava a va tsalisiwile hi ku ya hi swib’ongo swa vona, a va sukela ka malembe manharhu ku ya henhla.
17 Vaprista a va tsalisiwile hi ku ya hi swib’ongo swa vona+ ku fana ni leswi Valevhi lava nga ni 20 wa malembe ku ya henhla a va tsalisiwa xiswona,+ hi ku ya hi mintirho leyi a va yi yendla ka mintlawa ya vona.+
18 A ku tsalisiwe vana va vona hinkwavu, vasati va vona, vana va vona va madjaha ni vana va vona va tintombhi ni vanhu hinkwavu, hikusa a va tibasisile hi mhaka ya ntirho wa ku kwetsima lowu a va wu yendla hi ku tshembeka.
19 Ni vatukulu va Aroni, ku nga vaprista lava a va tshama masin’wini lama nga ka tindhawu leti ti nga ni ka ku lusela kona kusuhi ni madoropa ya vona,+ na vona a va tsalisiwile. Ka madoropa hinkwawu, vavanuna a va nyikiwe ntirho hi ku ya hi mavito ya vona swaku va phakela swakudla vavanuna hinkwavu lava nga vaprista ni hinkwavu lava nga tsalisiwa hi ku ya hi swib’ongo swa vona swa Valevhi.
20 Hezekiya a yendle swa ku fana ka tiko hinkwalu la Yuda funtshi a tame a yendla swaswinene ka Yehovha Xikwembu xa yena.
21 Mintirho hinkwayu leyi a nga yi yendla swaku a tirhela Xikwembu xa yena, hambi leyi a nga yi yendla ka yindlo ya Xikwembu xa ntiyiso+ kumbe leyi yi fambisanaka ni Minawu ya xona, a yi yendle hi mbilu ya yena hinkwayu naswona swi mu fambele kahle.
Tinhlamunselu ta le hansi
^ Vona Ntlhamuselo.
^ Vona Ntlhamuselo.
^ Kumbe: “dízimo”.
^ Swi nga ha yendleka ku hlayiwa maxalani.
