Tikronika Ta Wumbirhi 32:1-33
32 Loko swilo leswi se swi yendlekile ni loko Hezekiya a yendle minchumu hi ku tshembeka,+ Senakeribi hosi ya Asiriya a tile a ta lwa ni tiko la Yuda. A fike a rhendzela madoropa lawa ma nga ni mimuru ya ku tiya swaku a ma hlasela a tlhela a ma teka.+
2 A nkama Hezekiya a nga vona swaku Senakeribi a tele ku ta lwa ni doropa la Yerusalema,
3 a vulavule ni varhangeli ni masonchwa ya yena a gama a yendla xiboho xa ku seletela swihlovo leswi a swi li handle ka doropa,+ na vona va mu seketela.
4 Se ku hlengeletiwa vanhu va vanyingi va seletela swihlovo hinkwaswu ni tindhawu leti a ku famba mati axikarhi ka tiko, va ku: “A hi swi lavi swaku loko tihosi ta Asiriya ti fika lani ti kuma mati ya manyingi.”
5 Hi ku tinyimisela Hezekiya a yake muru hinkwawu lowu a wu diliziwile a yaka ni maprediyu* a henhla ka wona, a tlhela a yaka ni muru wun’wanyani hi handle. A tlhele a lunghisa Ganga*+ ka Doropa la Davhida a yendla ni matlharhi ni swivhikelo swa swinyingi.
6 A gama a langa varhangeli va nyimpi swaku va vonelela vanhu kutani a va hlengeleta ka kintari lowu a wu li kusuhi ni nyanghwa wa doropa se a va tiyisa a ku:
7 “Tiyani nhlana funtshi mi nga rhurhumeli. Mi nga chavisiwi hi hosi ya Asiriya+ ni xitshungu hinkwaxu lexi nga na yona, hikusa i vanyingi lava nga na hina ku tlula lava va nga na yona.+
8 Yona yi tshemba vanhu, kasi hina hi tshemba Yehovha Xikwembu xa hina lweyi a hi pfunaka a tlhela a hi lwela tinyimpi ta hina.”+ Se vanhu va sungula ku kala va nga ha chavi hi mhaka ya leswi nga hlayiwa hi Hezekiya hosi ya Yuda.+
9 Hi ku famba ka nkama, nkama Senakeribi hosi ya Asiriya a wa ha li Lakixi+ ni masonchwa ya yena hinkwawu, a rhuma vatirhi va yena va ya Yerusalema ka Hezekiya hosi ya Yuda ni ka Vayudiya hinkwavu lava a va li Yerusalema+ a ku:
10 “Senakeribi hosi ya Asiriya a li: ‘Kasi mo tshemba yini leswi mi tamaka mi tshama ka doropa la Yerusalema hambileswi li nga pfaliwa ka matlhelo hinkwawu?+
11 Phela Hezekiya o mi xenga swaku mi ta fa hi ndlala ni torha, loko a ku: “Yehovha Xikwembu xa hina a ta hi ponisa ka hosi ya Asiriya!”+
12 A hi yena Hezekiya lweyi a nga susa tindhawu ta ku tlakuka+ ta Xikwembu xa n’wina ni maaltari ya xona,+ a tlhela a byela vanhu va Yuda ni va Yerusalema, a ku: “Mi fanele mi gandzela ka altari yin’we mi tlhela mi yendla magandzelo ka yona”?+
13 Mo kala mi nga swi tivi leswi mina ni vavhovho va mina hi nga swi yendla ka vanhu hinkwavu va matiko?+ Indjhe swikwembu swa matiko wolawo swi swi kotile ku ponisa vanhu va swona ka mina?+
14 Ka swikwembu swa matiko lawa vavhovho va mina va nga ma helisa, hi xini lexi nga kota ku ponisa vanhu va xona ka mina, swaku Xikwembu xa n’wina xi nga za xi kota ku mi ponisa ka mina?+
15 Mi nga pfumeli ku xengiwa hi Hezekiya!+ Mi nga mu tshembi hikusa a ku na xikwembu kumbe tiko kumbe mfumu lowu nga kota ku ponisa vanhu va wona ka mina ni ka vavhovho va mina. Se Xikwembu xa n’wina xi nga swi kotisa ku yini ku mi ponisa ka mina?’”+
16 Vatirhi va Senakeribi va tame va rhuketela Yehovha Xikwembu xa ntiyiso na Hezekiya mutirheli wa yena.
17 A tlhele a tsala makarta+ a rhuketela Yehovha Xikwembu xa Israyele+ a ku: “Xikwembu xa Hezekiya a xi nge swi koti ku ponisa vanhu va xona ka mina,+ ku fana ni swikwembu swa matiko leswi nga tsandzeka ku ponisa vanhu va swona ka mina.”
18 Va tame va huwelela hi lirimi la Vayuda, va vulavula ni vanhu va Yerusalema lava a va li henhla ka muru, va va chavisa swaku va ta kota ku teka doropa.+
19 Va rhuketele Xikwembu xa Yerusalema ingaku vo rhuketela swikwembu swa vanhu va misava, leswi swi nga yendliwa hi mavoko ya vanhu.
20 Kambe Hosi Hezekiya na muprofeta Esaya+ n’wana wa Amozi va tame va khongela hi mhaka leyi, na va rila va kombela Xikwembu swaku xi va pfuna.+
21 Se Yehovha a rhumela ntsumi kutani yi dlaya masonchwa hinkwawu ya matimba,+ varhangeli hinkwavu va masonchwa ni hinkwavu lava a va rhangela ka matende ya Vaasiriya, yi za hosi yi tlhelela ka tiko la yona na yi dane swinene. Hi ku famba ka nkama yi ya ka tempele ya xikwembu xa yona, se van’wani va vana va yona va yi dlaya hi xipada.+
22 Yehovha a ponise Hezekiya ni vanhu va Yerusalema ka Senakeribi hosi ya Asiriya ni ka vanhu lavan’wani hinkwavu, a va humulisa ka valala va vona.
23 Vanhu va vanyingi va ta ni minchumu va ta nyikela ka Yehovha aYerusalema ni minchumu ya lisima va ta nyika Hezekiya hosi ya Yuda+ naswona matiko hinkwawu ma mu hloniphe hintamu Hezekiya loko swilo leswi hinkwaswu se swi yendlekile.
24 Ka masiku wolawo Hezekiya a vabya hintamu a za a va kusuhi ni ku fa, se a khongela ka Yehovha,+ kutani a mu hlamula hi ku mu nyika xikombiso.+
25 Kambe Hezekiya a nga swi khensanga swilo swaswinene leswi a nga yendleliwa swona, a sungule ku tibyela se Xikwembu xi mu kwatela ku patsa ni tiko la Yuda ni la Yerusalema.
26 Kambe Hezekiya a tiveka hansi hi mhaka ya leswi a nga tibyela,+ yena ni vanhu va Yerusalema kutani Yehovha a nga va khatisanga ka nkama lowu a ku fuma Hezekiya.+
27 Kutani Hezekiya a ganya hintamu a tlhela a hloniphiwa hintamu;+ a tiyendlela tindhawu+ ta ku veka prata, woru, maribye ya lisima, mafurha ya balsamu, swivhikelo ni minchumu hinkwayu ya ku saseka.
28 A tlhele a yaka matshala, tindhawu ta ku veka vhinyu la nyuwani ni mafurha, ku patsa ni swib’ala swa swifuyu swa ku hambanahambana ni swib’ala swa tinyempfu.
29 A tlhele a va ni madoropa, swifuyu swa swinyingi, tinyempfu ni tihomu ta tinyingi, hikusa Xikwembu a xi mu nyike minchumu ya yinyingi hintamu.
30 Hezekiya hi yena a nga pfala xihlovo+ xa le henhla xa Jiyoni+ a tlhela a txela swaku mati ya xona ma ya ka Doropa la Davhida+ ka tlhelo la wupeladlambu, naswona hinkwaswu leswi Hezekiya a a swi yendla a swi famba kahle.
31 Kambe a nkama vatirhi va varhangeli va Babilona va nga rhumiwa swaku va ya ka yena va ya mu vutisa hi xikombiso+ lexi nga yendleka atikweni,+ Xikwembu xa ntiyiso xi mu tshikile swaku xi ta mu kambela+ xi ta vona leswi nga ka mbilu ya yena.+
32 Timhaka hinkwatu ta wutomi la Hezekiya ni mintirho leyi a nga yi yendla hi lirhandzu,+ swi tsaliwile ka buku la muprofeta Esaya+ n’wana wa Amozi lweyi a a vona minchumu ya ku hlamalisa hi ndlela ya singita, ni ka Buku la Tihosi ta Yuda ni ta Israyele.+
33 Se Hezekiya a fa, a lahliwa lani ku nga lahliwa kona vavhovho va yena, va mu lahle ka ganga leli a li ya ka ndhawu leyi a ku lahliwa ka yona vana va Davhida;+ vanhu hinkwavu va Yuda ni va Yerusalema va mu lahle hi ndlela ya ku hlonipheka. Kutani Manasi n’wana wa yena a gama a va hosi.
Tinhlamunselu ta le hansi
^ Kumbe: “swihondzo; switezi”.
^ Kumbe: “Milu”. A rito leli hi Xiheberu li vula “ku tata”.
