Tikronika Ta Wumbirhi 36:1-23
36 Se vanhu va tiko la Yuda va teka Yehowazi+ n’wana wa Yosiya va mu veka swaku a va hosi ya Yerusalema a pfaleta papayi wa yena.+
2 Yehowazi a a ni 23 wa malembe nkama a nga va hosi funtshi a fume tiwheti tinharhu aYerusalema.
3 Kambe hosi ya Gibita yi mu susile swaku a nga ha fumi aYerusalema, yi gama yi sindzisa vanhu va tiko la Yuda swaku va hakela 3.420 wa makilu* ya prata ni 34,2 wa makilu* ya woru.+
4 Hosi ya Gibita yi tlhele yi veka Eliyakimi makwavu wa Yehowazi swaku a va hosi ya Yuda ni Yerusalema, yi gama yi txintxa vito la yena li va Yoyakimi; kambe Neko+ a teke Yehowazi makwavu wa Eliyakimi a mu yisa Gibita.+
5 Yoyakimi+ a a ni 25 wa malembe nkama a nga va hosi funtshi a fume 11 wa malembe aYerusalema. A tame a yendlela Yehovha Xikwembu xa yena swilo swa ku biha.+
6 Nebukadinazara+ hosi ya Babilona a teke Yoyakimi a gama a mu boha hi machini mambirhi ya kobre a mu yisa Babilona.+
7 A tlhele a teka swibya swin’wani leswi a swi tirhisiwa ka yindlo ya Yehovha a swi yisa Babilona, kutani a swi veka ka yindlo ya yena aBabilona.+
8 Timhaka hinkwatu ta wutomi la Yoyakimi, swilo swa ku biha ni swa ku nyenyentsa leswi a nga swi yendla, swi tsaliwile ka Buku leli vulavulaka hi Tihosi ta Israyele ni ta Yuda; se Yoyakini n’wana wa yena a va hosi.+
9 Yoyakini+ a a ni 18 wa malembe nkama a nga va hosi funtshi a fume tiwheti tinharhu ni 10 wa masiku aYerusalema; a tame a yendlela Yehovha swa ku biha.+
10 A ku sunguleni ka lembe, Hosi Nebukadinazara a rhumele vanhu swaku va tisa Yoyakini aBabilona+ ku patsa ni minchumu ya lisima leyi a yi li ka yindlo ya Yehovha.+ A veke Zedekiya makwavu wa papayi wa Yoyakini kuva a va hosi ya Yuda ni Yerusalema.+
11 Zedekiya+ a a ni 21 wa malembe nkama a nga va hosi funtshi a fume 11 wa malembe aYerusalema.+
12 A tame a yendlela Yehovha Xikwembu xa yena swa ku biha. A nga tivekanga hansi ka muprofeta Yeremiya+ lweyi a nga hlaya leswi a nga rhumiwa hi Yehovha.
13 A tlhele a djikela Hosi Nebukadinazara,+ lweyi a nga yendla swaku a funga hi vito la Xikwembu funtshi a tame a tiwomisa nhloko a yala ku tirhela Yehovha Xikwembu xa Israyele.
14 Varhangeli hinkwavu va vaprista ku patsa ni vanhu a va yendla swa ku biha ngopfu, a va yendla swilo hinkwaswu swa ku nyenyentsa leswi yendliwaka hi vanhu va matiko funtshi va chakise yindlo ya Yehovha+ leyi a a yi kwetsimisile aYerusalema.
15 Yehovha Xikwembu xa vavhovho va vona a a tshamela ku va basopisa hi ku tirhisa vatirheli va yena, a va basopisa hi ku phindhaphindha hi mhaka ya leswi a a twela wusiwana vanhu va yena ku patsa ni tempele ya yena.
16 Kambe va tame va poyila vatirheli va Yehovha Xikwembu xa ntiyiso,+ va nga ma yingisi marito ya yena+ va tlhela va rhuketela vaprofeta va yena+ a za a va kwatela+ se swi tikomba swaku a va ha na murhi.
17 Xikwembu xi yendle swaku hosi ya Vakalidiya+ yi ya lwa na vona, yi fika yi dlaya madjaha ya vona hi xipada+ ka tempele leyi va nga tiyendlela yona;+ a yi ma twelanga wusiwana madjaha kumbe tintombhi, vanhu vavakulu kumbe lava va vabyaka.+ Xi yendle swaku hosi ya Vakalidiya yi helisa minchumu hinkwayu yi ku jii.+
18 Swibya hinkwaswu leswi a swi li ka yindlo ya Xikwembu xa ntiyiso, swaswikulu kumbe swaswitsongo, ku patsa ni xuma lexi a xi li ka yindlo ya Yehovha ni xuma xa hosi ni varhangeli va yona, hinkwaswu yi swi tekile yi swi yisa aBabilona.+
19 Yi hise yindlo ya Xikwembu xa ntiyiso,+ yi dilizela muru wa le Yerusalema,+ yi hisa ni maprediyu* ya wona hinkwawu lama nga ni mimuru ya ku tiya kutani yi wonhetela minchumu hinkwayu ya lisima.+
20 Yi teke lava nga pona ku dlayiwa hi xipada yi va yisa awukaraweni aBabilona,+ va ya va swikarawa swa yona+ ni swa vana va yona, anze mfumu wa Persiya wu sungula ku fuma,+
21 kuva ku yendleka leswi Yehovha a nga swi hlaya hi ku tirhisa Yeremiya,+ tiko li tshame li nga na munhu* anze li humula ka tisavata+ hinkwatu leti li kalaka li nga humulanga hi tona. Hi nkama lowu tiko a li nga na munhu, li humulile anze ku hela 70 wa malembe.+
22 Hi lembe la ku sungula la ku fuma ka Korexe+ hosi ya Persiya, Yehovha a nyike Korexe hosi ya Persiya mimpimiso ya ku yendla leswi yena Yehovha a nga swi hlaya hi ku tirhisa Yeremiya+ leswaku a tivisa hinkwavu ka mfumu wa yena ni ku tlhela a tsala+ a ku:
23 “Korexe hosi ya Persiya a li: ‘Yehovha Xikwembu xa matilo a ni nyike mimfumu hinkwayu ya misava+ naswona a ni rhume swaku ni mu yakela yindlo aYerusalema le Yuda.+ Mun’wani ni mun’wani xikarhi ka n’wina lweyi a lumbaka vanhu va yena, Yehovha Xikwembu a a vi na yena, a a fambi.’”+
Tinhlamunselu ta le hansi
^ Hi Xiheberu: “100 wa titalenta”. Vona Xiyengetelo B14.
^ Hi Xiheberu: “talenta yin’we”. Vona Xiyengetelo B14.
^ Kumbe: “swihondzo; switezi”.
^ Kumbe: “li li rhumbi”.
