Tikronika Ta Wumbirhi 5:1-14
5 Solomoni a heta ntirho hinkwawu lowu a a fanele a wu yendla ka yindlo ya Yehovha.+ A gama a teka minchumu hinkwayu leyi yi nga nyikeliwa hi papayi wa yena Davhida+ a yi peta ndzeni ka tempele. A teke prata ni woru ni swibya hinkwaswu, a swi veka lani a ku vekiwa kona minchumu ya lisima ka yindlo ya Xikwembu xa ntiyiso.+
2 Hi nkama wolowo Solomoni a hlengeleta madoda, varhangeli va mindjangu ni varhangeli hinkwavu va tinxaka ta Israyele va ya Yerusalema va ya humesa areka ya ntwananu wa Yehovha ka Doropa la Davhida,+ ku nga Siyoni.+
3 Vavanuna hinkwavu va Israyele va hlengeletana phambheni ka hosi na va li ka fexta* leli nga va kona hi wheti ya wu 7.+
4 Madoda hinkwawu ya Israyele ma fika, se Valevhi va tlakula Areka.+
5 Va tlakule Areka, tende la ntlhanganu+ ni swibya hinkwaswu swa ku kwetsima leswi a swi li ka tende. Swi tlakuliwe hi vaprista ni Valevhi.
6 Hosi Solomoni ni Vayisrayele hinkwavu lava a va vitaniwile swaku va ta ka yena, a va li phambheni ka Areka. Kutani ku yendliwa magandzelo hi tinyempfu ni tihomu ta tinyingi hintamu+ va za va nga ha swi koti ku swi konta.
7 Vaprista va peta areka ya ntwananu wa Yehovha ka ndhawu ya yona, ka Ndhawu Ya Ku Kwetsima Hintamu, ahansi ka timpapa ta makerubu.+
8 Timpapa ta makerubu a ti pfulekile lani Areka a yi li kona, a ti mbhonya Areka ni swikhomo swa yona+ ku sukela ahenhla.
9 Swikhomo swa yona a swi lehile, loko u li ka Ndhawu Ya Ku Kwetsima aphambheni ka Ndhawu Ya Ku Kwetsima Hintamu, a swi voneka swaku a swi gama kwini kambe loko u li handle a swi nga voneki. Swa ha li kolanu ninamuntlha.
10 Andzeni ka Areka a ko va ni maribye mambirhi, lawa Moxe a nga ma veka na a li Horebi,+ nkama Yehovha a nga yendla ntwananu+ ni Vayisrayele nkama va nga huma aGibita.+
11 Nkama vaprista va nga huma ka ndhawu ya ku kwetsima (hikusa vaprista hinkwavu lava a va li kona a va tibasisile+ swi nga na mhaka swaku i va ntlawa wini wa kona),+
12 vayimbeleli hinkwavu va Valevhi+ lava a va lumba ntlawa wa Azafi,+ Hemani,+ Yedutani+ ni vana va vona ni vamakwavu va vona a va yambale mpahla leyi nga yendliwa hi panu ya lisima, a va khome switende, tiharipa ni swa ku chaya hi swona swa nsimbi swa ku fana ni maparatu;* a va nyime ka tlhelo la le wuxeni la altari na va ni 120 wa vaprista lava a va chaya timhalamhala.*+
13 Nkama lava a va chaya timhalamhala ni lava a va yimbelela va nga sungula ku dzunisa Yehovha ni ku mu khensa ni nkama na ku twala a guwa la timhalamhala, ni minchumu yin’wani ya ku chaya hi yona na va dzunisa Yehovha va ku: “Lirhandzu la wena lalikulu a li heli hikusa u munene,”+ se a rhefu li tata yindlo ya Yehovha.+
14 Vaprista a va nga swi koti ku tama va yendla ntirho wa vona hi mhaka ya rhefu leli, hikusa ku phatima ka Yehovha a ku tate yindlo ya Xikwembu xa ntiyiso.+
Tinhlamunselu ta le hansi
^ Ku nga Fexta la Minchacha.
^ I minchumu yimbirhi ya ku fana ni maparatu ya ku chaya hi yona muzika, leyi nga yendliwa hi kobre, naswona a yi bananisiwa swaku yi ta chaya.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
