Tikronika Ta Wumbirhi 6:1-42
6 Hi nkama wolowo Solomoni a ku: “Wena Yehovha u hlayile swaku u ta tshama ka ndhawu ya munyama wawukulu.+
2 Swoswi ni ku yakele yindlo ya ku tlakuka, swaku u ta tshama ka yona hi nkama wa ku kala wu nga heli.”+
3 Kutani hosi yi ndzuluka yi sungula ku katekisa vanhu hinkwavu va Israyele, vanhu hinkwavu va Israyele a va yo nyima.+
4 Yi ku: “A ku dzunisiwe Yehovha Xikwembu xa Israyele, lweyi a nga tshembisa papayi wa mina Davhida a tlhela a yendla hinkwaswu leswi a nga swi tshembisa, nkama a nga ku:
5 ‘Ku sukela siku leli ni nga humesa vanhu va mina ka tiko la Gibita, a ni langanga doropa ka tinxaka hinkwatu ta Israyele swaku ni yakeliwa yindlo leyi a ku ta dzunisiwa vito la mina ka yona,+ a ni langanga munhu swaku a va murhangeli wa vanhu va mina, ku nga Vayisrayele.
6 Kambe ni lange doropa la Yerusalema+ swaku vito la mina li dzunisiwa kona, ni lange Davhida swaku a rhangela vanhu va mina, ku nga Vayisrayele.’+
7 Papayi wa mina Davhida a a swi lava hintamu ku yaka yindlo leyi a ku ta dzunisiwa vito la Yehovha Xikwembu xa Israyele ka yona.+
8 Kambe Yehovha a byele papayi wa mina Davhida a ku: ‘U swi lava hintamu ku ni yakela yindlo leyi ku nga ta dzunisiwa vito la mina ka yona, leswi u swi navelaka i swinene.
9 Kambe a hi wena u nga ta ni yakela yindlo leyi; n’wana lweyi u nga ta mu psala hi yena a nga ta ni yakela yindlo leyi ku nga ta dzunisiwa vito la mina ka yona.’+
10 Yehovha a yendle leswi a nga swi tshembisa, hikusa ni pfalete papayi wa mina Davhida funtshi ni tshame ka xitshamu xa wuhosi xa Israyele+ hi ku ya hi leswi Yehovha a nga swi hlaya.+ Ni tlhele ni yaka yindlo leyi ku nga ta dzunisiwa vito la Yehovha Xikwembu xa Israyele ka yona,
11 funtshi ka yindlo leyi ni veke Areka leyi nga ni ntwananu+ lowu Yehovha a nga wu yendla ni vanhu va yena, ku nga Vayisrayele.”
12 Solomoni a nyima phambheni ka altari ya Yehovha ni phambheni ka vanhu hinkwavu va Israyele, a tlakusa mavoko ya yena ma kombeta tilweni.+
13 (Hikusa Solomoni a a yendle palku la kobre a gama a li veka xikarhi ka kintari.*+ A li lehe 2,2 wa mametru* li yanama 2,2 wa mametru li tlakuka 1,3 metru; kutani a nyima ka lona.) A gama a khizama phambheni ka vanhu hinkwavu va Israyele a tlakusa mavoko ya yena ma kombeta tilweni,+
14 a ku: “Wena Yehovha Xikwembu xa Israyele, a ku na Xikwembu xa ku fana na wena atilweni kumbe amisaveni, wa wu hlayisa ntwananu funtshi wa va rhandza vanhu va wena lava ku tirhelaka hi timbilu hinkwatu.+
15 U yendle leswi u nga tshembisa papayi wa mina Davhida.+ U mu tshembisile funtshi namuntlha u swi yendlile leswi u nga mu tshembisa swona.+
16 Yehovha Xikwembu xa Israyele, yendla leswi u nga swi tshembisa papayi wa mina Davhida nkama u nga ku: ‘Ka xitshamu xa wuhosi xa Israyele minkama hinkwayu ku ta va ni munhu lweyi a humaka ka ndjangu wa wena, loko ntsena vana va wena va tshembeka ka mina va tlhela va yingisa nawu wa mina+ ku fana ni leswi wena u nga tshembeka ka mina.’+
17 Yehovha Xikwembu xa Israyele, ni kombela u yendla leswi u nga swi tshembisa mutirheli wa wena Davhida.
18 “Kambe wena Xikwembu, indjhe u nga tshama ni vanhu lani misaveni?+ Hambi matilo, lawa ma nga henhla ka matilo a ma ku yeneli;+ se yindlo leyi ni nga ku yakela yona i yitsongo hintamu!+
19 Swoswi ni kombela u yingisa xikhongelo xa mina ni leswi ni swi kombelaka wena Yehovha Xikwembu xa mina, ni kombela u yingisa xirilo xa mina ni xikhongelo lexi ni xi yendlaka.
20 Matihlo ya wena a ma vonelele yindlo leyi wusiku ni nhlikanhi, ku nga ndhawu leyi u nga hlaya swaku vito la wena li ta dzunisiwa kona,+ swaku u yingisa xikhongelo xa mina lexi ni xi yendlaka ka ndhawu leyi.
21 Ni kombela u yingisa loko ni ku kombela swaku u ni pfuna ni loko vanhu va wena ku nga Vayisrayele, va khongela va kombela ku pfuniwa na va txuvuka lani yindlo leyi yi nga kona;+ ni kombela u yingisa na u li ka ndhawu leyi u tshamaka ka yona koseno matilweni;+ hi yingisi u tlhela u hi rivalela.+
22 “Loko munhu o tshuka a lumbetiwa swaku a yendlele munhu mun’wani swa ku biha a gama lweyi a mu lumbetaka a mu sindzisa swaku a funga,* kutani a ta ka altari ya yindlo leyi hi mhaka ya leswi a nga funga,+
23 ni kombela u mu yingisa na u li koseno matilweni, u tlhela u mu yavanyisa ni ku mu hakelisa hi ku ya hi leswi a swi yendlaka;+ lweyi a yendlaka swa ku biha mu voni nandzu u tlhela u mu khatisa, lweyi wa ku lulama swi voni swaku a nga na nandzu u tlhela u mu hakela hi mintirho ya yena yayinene.+
24 “Loko vanhu va wena, ku nga Vayisrayele va hluliwa hi valala va vona hi mhaka ya leswi va nga ku djohela hi ku phindhaphindha,+ se va tlhelela ka wena swaku va dzunisa vito la wena,+ va tlhela va khongela+ ni ku kombela swaku u va ni timpsalu ka vona na va li ka yindlo leyi,+
25 ni kombela u yingisa na u li koseno matilweni,+ u rivalela vanhu va wena, ku nga Vayisrayele xidjoho xa vona, u tlhela u va tlhelisela ka tiko leli u nga va nyika lona ni vavhovho va vona.+
26 “Loko matilo ma pfaliwile funtshi ku nga ni mpfula+ hi mhaka ya leswi va nga ku djohela hi ku phindhaphindha,+ kutani va khongela ka wena na va txuvuke lani yindlo leyi yi nga kona, va dzunisa vito la wena, va gama va tshika ku yendla swidjoho leswi a va swi yendla hi mhaka ya leswi u nga va khatisa,+
27 ni kombela u yingisa na u li koseno matilweni, u rivalela xidjoho xa vanhu va wena, ku nga Vayisrayele, hikusa u ta va djondzisa ndlela yayinene leyi va faneleke va famba ka yona,+ u tlhela u yendla swaku mpfula yi na+ ka tiko leli u nga va nyika lona swaku li va tshomba la vona.
28 “Loko ko tshuka ku va ni ndlala+ kumbe mavabyi,+ kumbe mpfula yi nga ni,* ku fa swinsinyani,+ ku va ni mintete leyi wonhetelaka,+ kumbe loko valala va vona va tshuka va va hlasela ka doropa lin’wani ni lin’wani la tiko la vona+ kumbe loko va tshuka va kumana ni ntungu wun’wani ni wun’wani kumbe mavabyi man’wani,+
29 xikhongelo xin’wani ni xin’wani,+ xikombelo xin’wani ni xin’wani xa ku kombela timpsalu+ lexi nga ta yendliwa hi munhu mun’wani ni mun’wani kumbe hi vanhu va wena hinkwavu, ku nga Vayisrayele, (hikusa mun’wani ni mun’wani a tiva leswi mu karhataka ni ku vava loku a ku twaka)+ loko va khongela na va txuvuke lani yindlo leyi yi nga kona,+
30 ni kombela u va yingisa na u li koseno tilweni, lani u tshamaka+ kona funtshi u va rivalela,+ u tlhela u hakela mun’wani ni mun’wani hi ku ya hi leswi a swi yendlaka, hikusa u tiva mbilu ya yena (hikusa hi wena ntsena u yi tivaka kahle mbilu ya munhu),+
31 swaku va ta ku hlonipha va tlhela va yingisa minawu ya wena masiku hinkwawu lawa va nga ta hanya ka tiko leli u nga li nyika vavhovho va hina.
32 “Ni loko vanhu lava taka hi ka matiko man’wani, lava kalaka va nga li Vayisrayele, lava taka hi ka matiko ya le kule hi mhaka ya vito la wena lalikulu,+ voko la wena la matimba ni matimba ya wena yamakulu,* va fika va khongela na va txuvuke lani yindlo leyi nga kona,+
33 ni kombela u yingisa na u li koseno matilweni, lani u tshamaka kona, u tlhela u yendlela hinkwavu lava taka hi ka matiko man’wani hinkwaswu leswi va nga ta ku kombela swona, yendla leswo swaku vanhu hinkwavu amisaveni va ta tiva vito la wena+ va tlhela va ku hlonipha ku fana ni leswi vanhu va wena, ku nga Vayisrayele, va yendlisaka swona, va tlhela va tiva swaku vito la wena la dzunisiwa ka yindlo leyi ni nga ku yakela yona.
34 “Loko vanhu va wena va ya nyimpini va ya lwa ni valala va vona ku nga na mhaka swaku va kwini,+ va gama va khongela+ ka wena na va txuvuke doropa leli u nga li langa, ni lani yindlo leyi ni nga yi yaka swaku ku dzunisiwa vito la wena yi nga kona,+
35 ni kombela u yingisa xikhongelo xa vona na u li koseno matilweni u swi twa loko va ku kombela swaku u va ni timpsalu ka vona, u tlhela u va pfuna.+
36 “Loko va tshuka va ku djohela (hikusa a ku na munhu lweyi a kalaka a nga djohi),+ se u va kwatela, u tlhela u va nyikela ka valala va vona, va gama va va khoma va ya va yendla swikarawa ka tiko la vona ka kule kumbe kusuhi,+
37 se va tisola na va li ka tiko leli va nga tekiwa va ya yendliwa swikarawa ka lona, va gama va tlhelela ka wena va tlhela va kombela swaku u va rivalela na va li ka tiko leli va nga yendliwa swikarawa ka lona, va ku: ‘Hi djohile hi ku yendla swa ku biha funtshi hi ni nandzu,’+
38 kutani va tlhelela ka wena hi timbilu ta vona hinkwatu+ ni hi wutomi* la vona hinkwalu na va li ka tiko la valala va vona+ lava nga va yendla swikarawa, va khongela ka wena na va txuvuke tiko leli u nga li nyika vavhovho va vona ni doropa leli u nga li langa+ ni yindlo leyi ni nga ku yakela leswaku ku dzunisiwa vito la wena ka yona,
39 ni kombela u yingisa xikhongelo xa vona na u li koseno matilweni, u swi twa loko va ku kombela swaku u va ni timpsalu ka vona, u tlhela u va pfuna,+ u rivalela vanhu va wena lava nga ku djohela.
40 “Wena Xikwembu xa mina, ni kombela swaku matihlo ya wena ma vona u tlhela u yingisa swikhongelo leswi nga ta yendliwa ka ndhawu leyi.+
41 Wena Yehovha Xikwembu ni Areka ya wena leyi kombisaka matimba ya wena, nghenani ka ndhawu leyi ya ku humula ka yona.+ Yehovha Xikwembu, vaprista va wena a va swi kombise swaku hi wena u kotaka ku ponisa; vanhu va wena va ku tshembeka a va tsake hi mhaka ya minchumu yayinene leyi u yi yendlaka.+
42 Yehovha Xikwembu, u nga mu tshiki lweyi u nga mu langa.+ Khumbuka leswi u nga mu rhandzisa swona Davhida mutirheli wa wena.”+
Tinhlamunselu ta le hansi
^ Vona Ntlhamuselo.
^ Hi Xiheberu: “5 wa swisungunu”. Vona Xiyengetelo B14.
^ Rito la Xiheberu li nga tirhisiwa lani li kombisa swaku loko ko tsumbuliwa swaku leswi munhu a nga swi funga a hi ntiyiso a a ta khatisiwa.
^ Kumbe: “ku va ni djandza”.
^ Hi Xiheberu: “voko la yena leli nga tshandzavutiwa”.
^ Hi Xiheberu: “néfesh”. Vona Ntlhamuselo.
