Tikronika Ta Wumbirhi 7:1-22
7 Nkama Solomoni a nga gama ku khongela,+ ku ta ndzilu hi le tilweni+ wu hisa hinkwaswu leswi ku nga yendliwa magandzelo hi swona, kutani ku phatima ka Yehovha ku tata yindlo leyi.+
2 Vaprista a va swi kotanga ku nghena ka yindlo ya Yehovha hikusa ku phatima ka Yehovha a ku tate yindlo ya yena Yehovha.+
3 Vayisrayele va wu vonile ndzilu ni nkama lowu ku phatima ka Yehovha ku nga tata yindlo leyi, va gama va khizama lani a va li kona, tinghohe* ta vona ti txuvuka hansi va khensa Yehovha va ku: “U munene; lirhandzu la wena lalikulu a li heli.”
4 Kutani hosi ni Vayisrayele hinkwavu va yendlela Yehovha magandzelo.+
5 Hosi Solomoni a yendle magandzelo hi 22.000 wa tihomu ni 120.000 wa tinyempfu. Se hosi ni Vayisrayele hinkwavu va khangula* yindlo ya Xikwembu xa ntiyiso.+
6 Vaprista a va nyime lomu va tirhaka kona, Valevhi na vona a va nyime lomu va tirhaka kona na va khome swa ku chaya hi swona leswi a va swi chaya loko va yimbelela tinsimu va dzunisa Yehovha.+ (Hosi Davhida a yendle minchumu ya ku chaya hi yona swaku a khensa Yehovha, “hikusa lirhandzu la yena lalikulu a li heli.”) Vaprista a va chaya timhalamhala*+ kasi Vayisrayele a va nyime phambheni ka vona.
7 Solomoni a yendla swaku ndhawu leyi nga xikarhi ka kintari* leyi nga phambheni ka yindlo ya Yehovha yi va ya ku kwetsima, hikusa a a fanele a yendlela kona magandzelo ya ku hisiwa+ ni mafurha ya magandzelo ya ku kombela ku rhula, a a fanele a yendla leswo hikusa altari ya kobre+ leyi a nga yi yendla a yi li yitsongo swaku ku yendliwa magandzelo ya ku hisiwa, magandzelo ya swakudla+ ni mafurha ya magandzelo ka yona.+
8 Hi nkama wolowo Solomoni ni Vayisrayele hinkwavu va hamba fexta 7 wa masiku,+ a ku ni xitshungu xaxikulu lexi a xi ta hi Lebo-Amati* ku ya fika ni ka Nkova wa Gibita.+
9 Kambe hi siku la wu 8,* va ve ni ntlhanganu wa ku hlawuleka+ hikusa a va hete 7 wa masiku na va khangula altari ni 7 wa masiku na va hamba fexta.
10 Se hi siku la wu 23 la wheti ya wu 7, a tshika vanhu va famba, na timbilu ta vona ti tsakile+ hi mhaka ya minchumu hinkwayu yayinene leyi Yehovha a nga yi yendlela Davhida na Solomoni ku patsa ni vanhu va yena, ku nga Vayisrayele.+
11 Kutani Solomoni a heta ku yaka yindlo ya Yehovha ni yindlo ya wuhosi;+ naswona a swi kotile ku swi yendla hinkwaswu leswi a a lava ku swi yendla ka yindlo ya Yehovha ni ka yindlo ya yena.+
12 Yehovha a humelele ka Solomoni+ niwusiku a ku: “Ni xi twile xikhongelo xa wena funtshi ni lange ndhawu leyi swaku yi va ndhawu ya ku yendlela ka yona magandzelo.+
13 Loko ni pfala matilo swaku mpfula yi nga ni, ni loko ni rhuma mintete swaku yi wonhetela tiko, ni loko ni yendla swaku vanhu va mina va vabya,
14 kutani vanhu va mina lava vitaniwaka hi vito la mina+ va tiveka hansi+ va tlhela va khongela, va ni lavetela va tlhela va tshika ku yendla swilo swa ku biha+ leswi va swi yendlaka, ni ta va yingisa na ni li tilweni, ni va rivalela xidjoho xa vona, ni tlhela ni lunghisa ni tiko la vona.+
15 Matihlo ya mina ma ta tshama na ma pfulekile funtshi tindleve ta mina ti ta yingisa swikhongelo leswi yendliwaka ka ndhawu leyi.+
16 Swoswi ni lange yindlo leyi ni tlhela ni yi yendla yi va ya ku kwetsima, swaku vito la mina li ta dzunisiwa ka yona hi nkama wa ku kala wu nga heli,+ ni ta yi vonelela ni tlhela ni yi hlayisa masiku hinkwawu.+
17 “Se loko wena u ni yingisa ku fana ni papayi wa wena Davhida, u yendla hinkwaswu leswi ni nga ku byela swona, u tlhela u yingisa minawu ya mina ni swiboho swa mina swa ku yavanyisa,+
18 ni ta tiyisa mfumu wa wena+ hi ku ya hi ntwananu lowu ni nga wu yendla ni papayi wa wena Davhida,+ ni ku: ‘Minkama hinkwayu ku ta va ni munhu lweyi a humaka ka ndjangu wa wena lweyi a nga ta fuma Vayisrayele.’+
19 Kambe loko wena wo ni tshika, u tlhela u nga yingisi minawu ya mina ni leswi ni nga ku byela swona, u gama u ya tirhela swikwembu swin’wani, u swi khizamela,+
20 ni ta susa Vayisrayele ka tiko leli ni nga va nyika lona+ ni yindlo leyi, ni nga yi kwetsimisa hi mhaka ya vito la mina ni ta yi susa phambheni ka mina naswona ni ta yendla swaku yi poyiliwa yi tlhela yi hlekiwa hi vanhu hinkwavu.+
21 Yindlo leyi yi ta tshama na yi hohlokile.* Hinkwavu lava nga ta hundza hi kusuhi na yona va ta hlamala+ va ku: ‘Hi mhaka muni Yehovha a yendle leswi ka tiko leli ni ka yindlo leyi?’+
22 Se va ta ku: ‘Hi mhaka ya leswi va nga tshika Yehovha+ Xikwembu xa vavhovho va vona, lweyi a nga va humesa ka tiko la Gibita+ va gama va sungula ku tirhela swikwembu swin’wani va tlhela va swi khizamela.+ Hi leswo swi nga yendla swaku a va tisela khombo leli.’”+
Tinhlamunselu ta le hansi
^ Kumbe: “makara ya”.
^ Kumbe: “inagurara”.
^ Ku nga minchumu ya ku hambiwa hi timhondzo kumbe tinsimbi, swi chaya ku fananyana ni vhuvhuzela.
^ Vona Ntlhamuselo.
^ Kumbe: “Nyanghwa wa Amati”.
^ Ku nga siku la wu 15 loko se va hetile ku hamba fexta.
^ Kumbe: “yi li rhumbi.”
