Timotiya Wa Wumbirhi 2:1-26
2 Se wena n’wananga,+ tama u tiyisiwa hi timpsalu tatikulu leti Kreste Yesu a ti kombisaka;
2 naswona leswi u nga swi twa ka mina, leswi a swi seketeliwa hi timboni ta tinyingi,+ swi djondzisi vanhu va ku tshembeka, lava na vona va nga ta faneleka kahle ku swi djondzisa van’wani.
3 Ku fana ni sonchwa lalinene+ la Kreste Yesu, u nga zami ku baleka swikarhatu.+
4 A ku na musonchwa lweyi a nga tinghenisaka ka manegosiyu* loko a lava ku tsakisa lweyi a nga mu thola.
5 Ni lomu ka mintlangu, lweyi a nga ka mpalisanu a nga tlhatekiwi harhi* loko a nga landzeleli minawu ya mpalisanu.+
6 Murimi lweyi a tirhaka hi matimba, hi yena a faneleke a va wa ku sungula ku dla mihandzu ya kona.
7 Tama u pimisa hi swilo leswi ni ku byelaka swona; Hosi yi ta ku yendla u swi twisisa swilo hinkwaswu.
8 Khumbuka swaku Yesu Kreste a pfuxiwile ka lava nga fa+ naswona a a li ntukulu* wa Davhida,+ hilani ma vulaka hi kona mahungu ya ku tsakisa lawa ni ma chumayelaka,+
9 lawa ni hluphiwaka ni tlhela ni bohiwa hi machini ingaku no va xigevenga hi mhaka ya wona.+ Kambe rito la Xikwembu a li bohiwanga.+
10 Hi mhaka ya leswo, ni tama ni tiyisela swilo hinkwaswu hi mhaka ya vanhu lava nga langiwa hi Xikwembu,+ leswaku na vona va ta ponisiwa hi ku tirhisa Kreste Yesu ni ku kuma minkateko ya ku kala yi nga heli.*
11 Mhaka leyi i ntiyiso: Loko hi fe xikan’we hi ta tlhela hi hanya xikan’we;+
12 loko hi tama hi tiyisela, hi ta tlhela hi va tihosi na yena;+ loko hi mu yala, na yena a ta hi yala;+
13 hambiloko hi nga tshembeki, yena a ta tshama na a tshembekile hikusa a nge tiyali.
14 Tama u va tsundzuxa timhaka leti, u va djondzisa phambheni ka Xikwembu leswaku va nga phikizani hi marito, ku nga swilo leswi kalaka swi nga pfuni nchumu hikusa swi vavisa* lava swi yingisaka.
15 Tirha hi matimba leswaku Xikwembu xi ta tsaka hi wena, u nga vi ni tingana hi ntirho wa wena, u djondzisa rito la ntiyiso ni ku li tlhamusela kahle.+
16 Fambela kule ni mavulavulelo ya ku kala ma nga pfuni nchumu lawa ma lwisanaka ni swilo swa ku kwetsima,+ hikusa ma ta* yendla swaku Xikwembu xi ya xi nga hloniphiwi,
17 naswona rito la vona li ta hangalaka ku fana ni xilondza lexi bolisaka muzimbha. Iminewu na Filetu i van’wani va vona.+
18 Vanhu lava va tshike ntiyiso, va vula swaku vafi se va pfuxiwile+ naswona va hahlula lipfumelo la van’wani.
19 Kambe masungulo* ya ku tiya lama nga vekiwa hi Xikwembu a ma tsekatseki, ma ni karimbu leli nge: “Yehovha* wa va tiva lava nga va yena”+ ni leli nge: “Lweyi a vitanaka vito la Yehovha*+ a a fambeli kule ni swa ku biha.”
20 Ka yindlo yayikulu a ku na swibya swa woru ni swa prata ntsena kambe ni leswi nga yendliwa hi mapulangu ni vumba; swin’wani swi tirhiseliwa swilo swa lisima kambe swin’wani swi tirhiseliwa swilo swa ku danisa.
21 Kutani loko munhu a fambela kule ni swibya leswi tirhiseliwaka swilo swa ku danisa, a ta va xibya lexi tirhiseliwaka swilo swa lisima, xibya lexi kwetsimaka, lexi pfunaka n’winyi wa xona ni lexi nga lunghekela ntirho wun’wani ni wun’wani wawunene.
22 Hi mhaka leyo, baleka ku navela ka wujovhem, kambe lavetela ku lulama, lipfumelo, lirhandzu, ku rhula xikan’we ni lava vitanaka Hosi hi mbilu leyi nga basa.
23 Naswona u nga tinghenisi ka ku kanetana hi timhaka ta wuphunta leti kalaka ti nga pfuni nchumu+ hikusa wa swi tiva swaku leswo swi gama hi tinyimpi.
24 Hikusa mutirhi wa Hosi a nga fanelanga a lwa kambe a fanele a vevuka ka vanhu hinkwavu,+ a faneleka ku djondzisa, a tikhoma loko a wonheliwa,+
25 a va djondzisa hi ku rhula lava yalaka leswi a swi djondzisaka.+ Kumbexana Xikwembu xi nga va yendla va txintxa leswaku va ta wu tiva kahle ntiyiso,+
26 se va tilaya va tlhela va pona ka ntlhamu wa Davulosi, lweyi a nga va phasa na va hanya swaku va yendla ku rhandza ka yena.+
Tinhlamunselu ta le hansi
^ Kumbe: “mabindzu”. Kumbexana: “ka mintirho ya siku ni siku”.
^ Kumbe: “korowa”.
^ Hi Xigriki: “mbewu”.
^ Hi Xigriki: “ku dzuneka ka ku kala ku nga heli.”
^ Kumbe: “helisa; dunga tinhloko”.
^ Kumbe: “va ta”.
^ Kumbe: “fundação la”.
^ Vona Xiyengetelo A5.
^ Vona Xiyengetelo A5.
