Vatesalonika Va Wumbirhi 1:1-12
1 Mina Pawulo, ni nga na Silvhano* na Timotiya,+ ni tsalela bandla la Vatesalonika leli lumbaka Xikwembu Papayi wa hina na Hosi Yesu Kreste ni ku:
2 Timpsalu tatikulu ni ku rhula leswi taka hi ka Xikwembu Papayi ni le ka Hosi Yesu Kreste a swi ve na n’wina.
3 Vamakwerhu, swa fanela kuva hi khensa Xikwembu masiku hinkwawu hi mhaka ya n’wina, hikusa lipfumelo la n’wina li ya li tiya swinene naswona ndlela leyi mi rhandzanaka hi yona ya kula.+
4 Hi mhaka leyo ha tibuma hi n’wina+ xikarhi ka mabandla ya Xikwembu hi mhaka ya ku tiyisela ka n’wina ni lipfumelo la n’wina ndzeni ka ku xanisiwa ni mahlomulu lawa mi kumanaka na wona.+
5 Leswo swi kombisa swaku Xikwembu xi yavanyisa hi ku lulama. Kutani ma faneleka ku nghena ka Mfumu wa Xikwembu lowu mi hluphekaka hi mhaka ya wona.+
6 Leswi Xikwembu xi nga lulama, xi ta va khatisa lava mi hluphaka.+
7 Kambe n’wina lava mi hluphiwaka, Xikwembu xi ta mi chunsa xikan’we na hina loko Hosi Yesu a humelela*+ hi le tilweni na a ni tintsumi ta yena ta matimba,+
8 na a li ka ndzilu lowu pfurhaka, leswaku a ta khatisa lava kalaka va nga xi tivi Xikwembu ni lava kalaka va nga ma yingisi mahungu ya ku tsakisa ya Hosi ya hina Yesu.+
9 Vanhu volavo va ta yavanyisiwa hi Hosi ya hina. Va ta helisiwa swa wugamu+ naswona a yi nga ha ta va txuvuka kumbe ku va pfuna hi matimba ya yona yamakulu.
10 Leswo swi ta yendleka nkama lowu Hosi ya hina yi nga ta ta swaku yi ta dzunisiwa ni vamakwavu va yona lava kwetsimaka; hinkwavu lava pfumelaka ka yona va ta yi hlonipha. Kutani leswi mi nga kholwa ka leswi hi nga mi byela swona, na n’wina mi ta va xikarhi ka vona.
11 Hi leswo swi yendlaka hi mi khongelela nkama ni nkama, hi kombela Xikwembu xa hina leswaku xi mi vona na mi faneliwa hi ku vitaniwa,+ xi tlhela xi yendla minchumu hinkwayu leyi xi yi tsakelaka hi matimba ya xona, ni ku hetisa leswi a mi swi yendla hi mhaka ya lipfumelo la n’wina.
12 Leswo swi ta yendla swaku vito la Hosi ya hina Yesu li dzunisiwa ka n’wina, na n’wina mi dzunisiwa ka yena, hi mhaka ya timpsalu tatikulu ta Xikwembu xa hina ni ta Hosi Yesu Kreste.
