Esaya 2:1-22
2 Hi leyi mhaka leyi Esaya n’wana wa Amozi a nga yi vona leyi a yi ta yendleka aYuda ni Yerusalema:+
2 Ka masiku ya wugamu,Ntshava ya yindlo ya YehovhaYi ta vekiwa yi tiya henhla ka tintshava,+Naswona yi ta tlakusiwa yi tlula ni maganga,Funtshi matiko hinkwawu ma ta ya ka yona.+
3 Vanhu va vanyingi va ta ya ka yona se va ku:
“Tanani, a hi khupukeni hi ya ka ntshava ya Yehovha,Ka yindlo ya Xikwembu xa Yakobe.+
A ta hi djondzisa tindlela ta yena,Kutani hi ta famba ka tindlela ta yena.”+
Hikusa nawu wu ta ta hi Siyoni,Ni rito la Yehovha li ta ta hi Yerusalema.+
4 A ta yavanyisa matikoA lunghisa timhaka ta vanhu va vanyingi.
Va ta txintxa swipada swa vona swi va swikomuNi matlharhi ya vona ma va masikelo.+
Tiko a li nge he lwi ni tiko lin’wani,Naswona a va nge he djondzeli ku lwa nyimpi.+
5 Tanani n’wina ndjangu wa Yakobe,A hi fambeni ka ku vonakala ka Yehovha.+
6 Wena Xikwembu u tshike vanhu va wena, ku nga ndjangu wa Yakobe,+Hi mhaka ya leswi tiko li nga tala hi swilo swa le Wuxeni;Va yendla masalamusi+ ku fana ni Vafilista,Funtshi ka tiko la vona ku tale hi vana va matiko man’wani.
7 Tiko la vona li tale hi prata ni woru,Funtshi va ni minchumu ya yinyingi ya lisima.
Tiko la vona li tale hi makavhalu,Naswona va ni tinyolo* ta tinyingi.+
8 Tiko la vona li tale hi swikwembu leswi kalaka swi nga pfuni nchumu.+
Va khizamela mintirho ya mavoko ya vona,Swilo leswi va nga swi yendla hi voxe.
9 Lweyi a khizamaka u ta mu danisa,Naswona a wu nge tshuki u va rivalela.
10 Nghena ka ribye, u tumbela ka misavaHi mhaka ya ku kwata ka Yehovha loku chavisakaNi wukulu la yena ni ku phatima ka yena.+
11 Lweyi a titlakusaka a ta danisiwa,Ni lava va tibyelaka va ta danisiwa.
I Yehovha ntsena lweyi a nga ta dzunisiwa hi siku lolelo.
12 Hikusa i siku la Yehovha murhangeli wa tintsumi.+
Li ta fikela hinkwavu lava va titlakusaka ni lava va tibyelaka,Li ta fikela hinkwavu, hambi va ku ganya kumbe swisiwana,+
13 Li ta fikela minsinya hinkwayu ya ku leha ya mikedari ya LebanoniNi minsinya hinkwayu ya oku ya le Baxani,
14 Ni henhla ka tintshava hinkwatu ta ku lehaNi maganga hinkwawu ya ku leha,
15 Henhla ka maprediyu* hinkwawu ya ku leha ni mimuru hinkwayu ya ku tiya,
16 Henhla ka maboti hinkwawu ya le Tarxixi+Ni henhla ka maboti hinkwawu ya ku saseka.
17 Lweyi a titlakusaka a ta danisiwa,Ni lava va tibyelaka va ta danisiwa.
I Yehovha ntsena lweyi a nga ta dzunisiwa hi siku lolelo.
18 Swikwembu leswi kalaka swi nga pfuni nchumu swi ta nyamalala swa wugamu.+
19 Vanhu va ta nghena ka mimhakwa* ya maribyeNi ka swikhele+Hi mhaka ya ku chava ku kwata ka YehovhaNi wukulu la yena ni ku phatima ka yena,+Loko a tela ku ta yendla swaku misava yi rhurhumela hi mhaka ya ku chava.
20 Hi siku lolelo vanhu va ta teka swikwembu swa vona swa prata ni swa woru leswi kalaka swi nga pfuni nchumuLeswi va nga tiyendlela swona leswaku va swi gandzelaVa swi txukumetela ka makondlo ni vamangadjani,*+
21 Swaku va ta nghena ka mimbhovo leyi nga ka maribyeNi ka mimhakwa,Hi mhaka ya ku chava ku kwata ka YehovhaNi wukulu la yena ni ku phatima ka yena,Loko a tela ku ta yendla swaku misava yi rhurhumela hi mhaka ya ku chava.
22 Tshikani ku tshemba munhu,Lweyi a fanaka ni moya lowu a wu hefemulaka.
Hi mhaka muni mi fanele mi mu nyika lisima?
Tinhlamunselu ta le hansi
^ Kumbe: “tin’qolo; makalichi”.
^ Kumbe: “swihondzo; switezi”.
^ Ku nga mimbhovo leyi kumekaka ka ntshava kumbe ka ribye.
^ Kumbe: “morcegos”.
