Esaya 39:1-8
-
Lava va nga rhumiwa na va ta hi Babilona (1-8)
39 Hi nkama wolowo Merodaki-Baladani hosi ya Babilona, n’wana wa Baladani, a rhumela makarta ni minchumu swaku va ya nyika Hezekiya,+ hikusa a a swi twile swaku a a vabya kambe se a a hanyile.+
2 Hezekiya a va yamukela na a tsakile se a va komba lani a vekaka kona xuma,+ ku nga prata, woru, mafurha ya balsamu, mafurha man’wani ya lisima, matlharhi ya yena hinkwawu ni minchumu hinkwayu leyi a yi li kona ka ndhawu leyi a a veka kona xuma. A va kombe hinkwaswu leswi a swi li ka yindlo ya yena ya wuhosi ni ka mfumu wa yena hinkwawu.
3 Muprofeta Esaya a gama a ya ka Hosi Hezekiya a fika a mu vutisa a ku: “Vavanuna lava va hlaye swa ku yini funtshi va ta hi kwini?” Se Hezekiya a mu hlamula a ku: “Va ta hi ka tiko la kule, aBabilona.”+
4 A tlhela a vutisa a ku: “I mpsini leswi va nga swi vona ka yindlo ya wena?” Hezekiya a mu hlamula a ku: “Va vone minchumu hinkwayu leyi nga ka yindlo ya mina ya wuhosi. A ku na nchumu ni kalaka ni nga va kombanga ka ndhawu leyi ni vekaka xuma.”
5 Esaya a byela Hezekiya a ku: “Twana leswi Yehovha murhangeli wa tintsumi a swi hlayaka:
6 ‘Yingisa! Ku ta fika nkama lowu hinkwaswu leswi nga ka yindlo ya wena ya wuhosi ni hinkwaswu leswi vavhovho va wena va nga swi siya anze namuntlha, swi nga ta tekiwa swi yisiwa aBabilona. A ku nga ta sala nchumu,’+ ku vula Yehovha.+
7 ‘Funtshi van’wani va vana va wena, va ta tekiwa swaku va ya tirha ka yindlo ya wuhosi aBabilona.’”+
8 Se Hezekiya a byela Esaya a ku: “Leswi Yehovha a nga swi hlaya i swinene.” A tlhela a ku: “Hikusa ku ta va ni ku rhula ni ku tshamiseka na na ha hanya.”+
