Estere 2:1-23
2 Hi ku famba ka nkama, loko ku kwata ka Hosi Asuwerusi+ ku pumbekile, a khumbuke leswi Vhaxiti a nga swi yendla+ ni xiboho lexi a nga xi teka xa ku mu khatisa.+
2 Se vatirhi va hosi va ku: “Hosi a yi laveliwe tintombhi ta ku saseka leti kalaka ti nga se tshama ti famba masangu ni wanuna.
3 Hosi a yi lange tindota ka maprovhinsiya hinkwawu ya mfumu wa yona,+ leswaku ti hlengeleta tintombhi hinkwatu ta ku saseka leti kalaka ti nga se tshama ti famba masangu ni wanuna, swaku ti rhurha ti ya ka yindlo ya wuhosi aXuxani,* lomu ku tshamaka kona vavasati. A va hlayisiwe hi Hegayi+ mutheniwa* wa hosi, lweyi a hlayisaka vavasati naswona a va nyikiwe swa ku tolatola swaku va saseka.
4 Se ntombhi leyi yi nga ta tsakisa hosi yi ta va nsati wa hosi yi pfaleta Vhaxiti.”+ Mhaka leyi yi tsakise hosi, kutani yi yendla swoleswo.
5 Ka yindlo ya wuhosi aXuxani*+ a ku ni wanuna mun’wani wa Muyuda, lweyi vito la yena a ku li Mordekayi+ n’wana wa Yayiri, n’wana wa Ximeyi, n’wana wa Kixi lweyi a a li wa ka Benjamini,+
6 lweyi a nga tekiwa Yerusalema ni vanhu lava nga yendliwa swikarawa na Hosi Yekoniya*+ wa Yuda hi Hosi Nebukadinazara wa le Babilona.
7 A kulise Adasa,* ku nga Estere, n’wana wa makwavu wa xinuna wa papayi wa yena,+ hikusa a a nga na vapsali. Ntombhi leyi a yi saseke ngopfu swinene. Nkama yi nga feliwa hi vapsali, Mordekayi a yi tekile a yi wundla.
8 Nkama rito la hosi ni nawu wa yona swi nga tivisiwa ni nkama tintombhi ta tinyingi leti a ti ta hlayisiwa hi Hegayi+ ka yindlo ya hosi aXuxani* ti nga hlengeletiwa, Estere na yena a yisiwe ka yindlo ya hosi a ya hlayisiwa hi Hegayi muhlayisi wa vavasati.
9 Ntombhi leyi yi tsakise Hegayi kutani a yi komba timpsalu, a hantla a yi nyika swa ku tolatola swaku yi tisasekisa+ ni swakudla swa xipesiyali, a tlhela a yi nyika 7 wa tintombhi leti ti taka hi ka yindlo ya hosi. Se a yi susa xikan’we ni tintombhi leti a ti yi tirhela swaku va ya tshama ka ndhawu ya xipesiyali ka yindlo ya vavasati.
10 Estere a nga hlayanga nchumu hi vanhu va tiko la yena+ kumbe hi maxaka ya yena, hikusa Mordekayi+ a a mu byele swaku a nga vulavuli hi vona.+
11 Siku ni siku, Mordekayi a a ndlhula hi phambheni ka kintari* wa yindlo ya vavasati leswaku a tiva swaku Estere a ndjhani ni swaku wa ha khomiwa kahle ke.
12 Ntombhi yin’wani ni yin’wani a yi nyikiwa nkama wa ku ya voniwa hi Hosi Asuwerusi loko se ku hele 12 wa tiwheti na yi tola swa ku tisasekisa hi swona ku nga leswi a ti fanele ti swi yendla, a ti fanele ti yendla leswi swaku ti tisasekisa: Ku ringana 6 wa tiwheti a ti fanele ti tola mafurha ya mira,+ kasi ka 6 wa tiwheti letin’wani, a ti fanele ti tola mafurha ya balsamu+ ni switolatola swin’wani swa ku tisasekisa hi swona.
13 Se hi kona ntombhi a yi ta va yi lunghekile ku ya voniwa hi hosi, nkama a yi suka ka yindlo ya vavasati yi ya ka yindlo ya hosi, a yi nyikiwa xin’wani ni xin’wani lexi a yi xi kombela.
14 A yi nghena nimadlambu, kutani yi huma nimixo yi tlhelela ka yindlo ya wumbirhi ya vavasati lava a va hlayisiwa hi Xaxigazi mutheniwa* wa hosi+ lweyi a a hlayisa vavasati vavatsongo* va hosi. Loko hosi yi nga mu tsakelanga hintamu, naswona yi nga rhumisanga swaku ntombhi yoleyo yi ya vitaniwa hi vito, a yi nga ha tlheleli ka hosi.+
15 Se loko nkama wu fika wa leswaku a nghena ka hosi, Estere n’wana wa Abiyayile, makwavu wa papayi wa Mordekayi, lweyi a nga mu teka swaku a va n’wana wa yena,+ a nga kombelanga nchumu handle ka leswi a nga byeliwa hi Hegayi mutheniwa* wa hosi, lweyi a a hlayisa vavasati. (Nkama wolowo hinkwawu, Estere a a rhandziwa hi vanhu hinkwavu lava a va mu vona.)
16 Estere a yisiwe ka Hosi Asuwerusi ka yindlo ya yena ya wuhosi hi wheti ya yena ya wu 10, ku nga wheti ya Tebeti,* hi lembe la wu 7+ la ku fuma ka yena.
17 Kutani hosi yi rhandza Estere ku tlula vavasati lavan’wani hinkwavu, yi za yi mu komba timpsalu ni wunene ku tlula tintombhi* letin’wani hinkwatu. Se yi mu yambexa harhi* ya wuhosi ka nhloko yi mu yendla nsati wa yona+ swaku a pfaleta Vhaxiti.+
18 Kutani hosi yi hambela tindota ta yona hinkwatu ni vatirhi va yona fexta lalikulu; a ku li fexta la Estere. Se yi rivalela vanhu hinkwavu ka maprovhinsiya hinkwawu yi tlhela yi va nyika ni swilo hi ku phindhaphindha hi ku ya hi maganyelo ya hosi.
19 Nkama tintombhi*+ ti nga hlengeletiwa ka wumbirhi, Mordekayi a a tshame ka xipfalu xa hosi.
20 Estere a nga vulanga nchumu hi maxaka ya yena ni vanhu va tiko la yena,+ hi ku landza leswi Mordekayi a nga mu rhuma swona; Estere a tame a yendla leswi Mordekayi a nga mu byela swona ku fana ni leswi a a swi yendla na wa ha hlayisiwa hi yena.+
21 Ka masiku wolawo, nkama Mordekayi na a ha tshame ka xipfalu xa hosi, Bigitani na Terexi, vatirheli va mfumu vambirhi va hosi, lava a va li vagwardu va tinyanghwa, va kwata va gama va yendla maplanu ya ku dlaya Hosi Asuwerusi.
22 Se Mordekayi a yi twa mhaka leyi, hi ku hantlisa a byela Estere Nsati wa Hosi. Kutani Estere a byela hosi leswi Mordekayi a nga swi twa.
23 Se mhaka leyi yi kambisisiwa, ku gama ku tsumbuliwa swaku i ntiyiso, kutani vavanuna lavambirhi va hayekiwa ka mhandzi; mhaka leyi yi tsaliwe ka buku ya matimu phambheni ka hosi.+
Tinhlamunselu ta le hansi
^ Kumbe: “aSuza”.
^ Ku nga wanuna lweyi a nga susiwa marhanga.
^ Kumbe: “aSuza”.
^ Leswi vulaka muxaka wun’wani wa xinsinyani lexi vuliwaka Murta.
^ Kumbe: “aSuza”.
^ Vona Ntlhamuselo.
^ Ku nga wanuna lweyi a nga susiwa marhanga.
^ Vona Ntlhamuselo.
^ Ku nga wanuna lweyi a nga susiwa marhanga.
^ Vona Xiyengetelo B15.
^ Ku nga wansati lweyi a kalaka a nga se famba masangu.
^ Kumbe: “korowa”.
^ Ku nga wansati lweyi a kalaka a nga se famba masangu.
