Estere 4:1-17
4 Nkama Mordekayi+ a nga twa hinkwaswu leswi nga yendliwa,+ a handzula mpahla ya yena hi xikarhi, a yambala mpahla ya masaka a ticheletela ni nkuma. A huma a ya xikarhi ka doropa, na a vanga guwa a rila hi xiviti.
2 A yo famba a za a ya fika ka nyanghwa wa hosi ntsena, hikusa a ku nga pfumeleliwi munhu a nghena ka xipfalu xa hosi na a yambale mpahla ya masaka.
3 Ka maprovhinsiya hinkwawu+ lomu rito la hosi ni nawu wa yona swi nga fika kona, a ku ni xirilo xaxikulu xikarhi ka Vayuda, a va titsona swakudla+ va rila na va xukuvalile. Va ku tala a va yetlela ka nkuma na va yambale mpahla ya masaka.+
4 Nkama vatirhi va xisati va Estere ni vatheniwa* va yena va nga fika va mu byela mhaka leyi, a karhatekile swinene. Se a rhumela mpahla ka Mordekayi swaku a yi yambala, kuva a hlivila mpahla* ya masaka, kambe a nga yi tekanga.
5 Kutani Estere a vitana Ataki, mun’wani wa vatheniwa* va hosi, lweyi a nga langiwa swaku a va mutirhi wa Estere, a mu rhuma swaku a ya yi kambisisa kahle mhaka leyi ka Mordekayi.
6 Se Ataki a famba a ya vulavula na Mordekayi xikarhi ka doropa aphambheni ka nyanghwa wa hosi.
7 Mordekayi a mu byela hinkwaswu leswi nga mu yendlekela ni male hinkwayu+ leyi Hamani a nga tshembisa ku yi peta ka xuma xa hosi swaku ku ta dlayiwa Vayuda.+
8 A tlhela a mu nyika ni papela la nawu lowu nga tsaliwa Xuxani*+ wa leswaku va helisiwa. A a fanele a wu komba Estere a tlhela a mu tlhamusela wona ni ku mu byela+ swaku a ya ka hosi a ya kombela ku kombiwa timpsalu a tlhela a kombelela ni vanhu va tiko la yena.
9 Se Ataki a tlhelela ka Estere a ya mu byela leswi Mordekayi a nga swi hlaya.
10 Estere a tlhela a rhuma Ataki swaku a ya byela Mordekayi a ku:+
11 “Vatirhi hinkwavu va hosi ni vanhu lava tshamaka ka maprovhinsiya ya yona va swi tiva swaku loko wanuna kumbe wansati o nghena ka kintari* wa hosi wa le ndzeni+ na a nga vitaniwanga, ku tirha nawu wun’we ntsena: A fanele a dlayiwa; a to pona ntsena loko hosi yo mu tlakusela nhonga ya wuhosi ya woru.+ Kambe mina se ni ni 30 wa masiku na hosi yi nga se ni vitana.”
12 Nkama Mordekayi a nga byeliwa leswi Estere a nga swi vula,
13 a hlamule Estere a ku: “U nga pimisi swaku leswi u nga ka yindlo ya hosi u nga tshuka u pona ku tlula Vayuda lavan’wani hinkwavu.
14 Hikusa loko wo miyela swoswi, Vayuda va ta pfuniwa va tlhela va chunsiwa hi tindlela tin’wani,+ kambe wena ni ndjangu wa papayi wa wena, mi ta fa. Naswona swi tiviwa hi mani, swaku kumbexana leswi hi swona swi nga yendla swaku u va lani wuhosini!”+
15 Kutani Estere a hlamula Mordekayi a ku:
16 “Famba u ya hlengeleta Vayuda hinkwavu lava nga Xuxani,* mi titsona swakudla+ hi mhaka ya mina. Mi nga dli hambi ku phuza anze ku hela masiku manharhu,+ wusiku ni nhlikanhi. Na mina ku patsa ni vatirhi va mina va xisati hi ta titsona swakudla. Ni ta ya ka hosi, hambileswi ni nga ta va na ni tlule nawu naswona loko swi lava ni fa, ni ta fa.”
17 Se Mordekayi a famba a ya yendla hinkwaswu leswi Estere a nga mu rhuma swaku a swi yendla.
Tinhlamunselu ta le hansi
^ Ku nga vavanuna lava nga susiwa marhanga.
^ Kumbe: “nguvu”.
^ Ku nga vavanuna lava nga susiwa marhanga.
^ Kumbe: “Suza”.
^ Vona Ntlhamuselo.
^ Kumbe: “Suza”.
