Estere 5:1-14
5 Hi siku la wunharhu,+ Estere a yambale mpahla ya yena ya wuhosi a gama a ya nyima ka kintari* wa le ndzeni ka yindlo ya hosi lowu nga txuvukana ni yindlo ya hosi. Hosi a yi tshame ka xitshamu xa yona xa wuhosi na yi txuvukane ni nyanghwa wa yindlo.
2 Nkama hosi yi nga vona Estere nsati wa yona na a nyime ka kintari, yi mu komba timpsalu hi ku mu tlakusela nhonga ya woru ya wuhosi+ leyi a yi li ka voko la yona. Se Estere a tshinela a khumba ponta ya nhonga yoleyo.
3 Hosi yi mu vutisa yi ku: “Ku yendleka yini nkatanga Estere? U lava swaku ni ku yendlela yini? Phela hambi hafu ya wuhosi la mina, ni nga ku nyika yona!”
4 Estere a hlamula a ku: “Loko u swi tsakela wena hosi, tani namuntlha na Hamani+ ka fexta leli ni nga ku hambela lona.”
5 Kutani hosi yi byela vanhu va yona yi ku: “Byelani Hamani swaku a ta hi ku kahlula, hi ku landza leswi Estere a nga kombela swona.” Se hosi na Hamani va ya ka fexta leli nga yendliwa hi Estere.
6 Nkama a va phuza vhinyu ka fexta, hosi yi vutise Estere yi ku: “U lava ni ku yendlela yini? Phela ni ta ku nyika! U lava yini? Hambi wo lava hafu ya wuhosi la mina, ni ta ku nyika yona!”+
7 Estere a hlamula a ku: “Leswi ni swi kombelaka ni leswi ni swi lavaka hi leswi:
8 Loko ku li swaku na ku tsakisa wena hosi naswona wa swi lava ku ni nyika leswi ni nga ta ku kombela, tani na Hamani ka fexta leli ni nga ta mi yendlela lona mundzuku; se mundzuku ni ta vula xikombelo xa mina.”
9 Hi siku lolelo Hamani a fambe na a tsakile swinene. Kambe nkama a nga vona Mordekayi ka nyanghwa wa hosi naswona a vona swaku a nga sekeleki swaku a mu komba xihlonipho, Hamani a kwata hintamu hi mhaka ya Mordekayi.+
10 Kambe Hamani a tikhoma a ya kaya ka yena. A gama a rhuma vanhu va ya vita vanghanu va yena ni nsati wa yena Zerexi.+
11 Se Hamani a tibuma hi ku ganya ka yena, hi madjaha ya yena ya manyingi+ ni ndlela leyi hosi yi nga mu tlakusa hi yona swaku a va henhla ka varhangeli* ni vatirhi hinkwavu va hosi.+
12 Hamani a tlhela a ku: “Funtshi Estere Nsati wa Hosi a yo rhamba mina ntsena swaku ni famba ni hosi ka fexta leli a nga li yendla.+ Ni tlhele ni rhambiwa mundzuku swaku ni ya ka fexta ni hosi.+
13 Kambe hinkwaswu leswi, a swi ni tsakisi hi nchumu hi mhaka Muyuda lwiyani va nge i Mordekayi, lweyi ni mu vonaka na wa ha tshamile ka nyanghwa wa hosi.”
14 Kutani nsati wa yena Zerexi ni vanghanu va yena hinkwavu va mu byela leswi: “A ku dzimiwi mhandzi ya ku leha kolomuyani ka 22 wa mametru.* Se nimixo u ta byela hosi swaku Mordekayi a fanele a hayekiwa ka yona.+ Kutani u ta gama u tifambela u ya tikhorisa ka fexta ni hosi.” Mhaka leyi yi mu tsakisile Hamani, se a rhumisa swaku ku dzimiwa mhandzi.
Tinhlamunselu ta le hansi
^ Vona Ntlhamuselo.
^ Kumbe: “tihosana”.
^ Hi Xiheberu: “50 wa swisungunu.” Vona Xiyengetelo B14.
