Estere 6:1-14
-
Hosi yi khensa Mordekayi (1-14)
6 Ka wusiku lolelo, hosi yi heleliwe hi wurhongo. Se yi rhumisa swaku ku tisiwa buku ya matimu,+ kutani yi lerheliwa hosi.
2 Ka buku leyi, a ku tsaliwe mhaka leyi Mordekayi a nga mangalela Bigitani na Terexi, vatirheli va mfumu vambirhi va hosi lava a va li vagwardu va tinyanghwa, lava a va yendle maplanu ya ku dlaya Hosi Asuwerusi.+
3 Hosi yi vutisa yi ku: “Mordekayi a yendleliwe yini swaku a hloniphiwa ni ku tlangeliwa hi mhaka ya leswi ke?” Vatirhi va hosi va ku: “A nga yendleliwanga nchumu.”
4 Se hosi yi gama yi ku: “I mani lweyi a nga ka kintari?”* Phela i Hamani lweyi a a li ka kintari+ wa yindlo ya hosi swaku a ta byela hosi swaku yi hayeka Mordekayi ka mhandzi leyi a nga yi dzima.+
5 Vatirhi va hosi va ku: “I Hamani+ lweyi a nga nyima ka kintari.” Kutani hosi yi ku: “A a nghene.”
6 Nkama Hamani a nga nghena, hosi yi mu vutisa yi ku: “A nga yendleliwa yini munhu lweyi hosi yi lavaka ku mu tlangela?” Se Hamani a tibyela ka mbilu ya yena a ku: “I mani lweyi hosi yi nga lavaka ku mu tlangela handle ka mina?”+
7 Kutani Hamani a byela hosi a ku: “Loko ku ni munhu lweyi hosi yi lavaka ku mu khensa,
8 a a tiseliwe mpahla ya wuhosi+ leyi hosi yi yi yambalaka ni kavhalu leli hosi yi fambaka hi lona na li yambexiwe harhi* ya wuhosi ka nhloko.
9 Mpahla ni kavhalu a swi nyikiwe mun’wani wa tindota ta hosi leti hloniphekaka, se vatirhi va fanele va yambexa munhu lweyi hosi yi lavaka ku mu tlangela, a fambisiwa hi kavhalu a rhendzelekela xikarhi ka doropa. Vatirhi va fanele va huwelela phambheni ka yena va ku: ‘Leswi swi yendleliwa munhu lweyi hosi yi lavaka ku mu tlangela!’”+
10 Se hosi yi yo vhela yi byela Hamani yi ku: “Kahlula u ya teka mpahla ni kavhalu, u yendla hinkwaswu leswi u nga swi vula, u yendlela Mordekayi, Muyuda lweyi a nga tshama ka nyanghwa wa hosi. U nga siyi nchumu ka hinkwaswu leswi u nga swi vula.”
11 Kutani Hamani a teka mpahla ni kavhalu, a yambexa Mordekayi,+ a mu fambisa hi kavhalu xikarhi ka doropa, na a huwelela a ku: “Leswi swi yendleliwa munhu lweyi hosi yi lavaka ku mu tlangela!”
12 Se Mordekayi a tlhela a ya ka nyanghwa wa hosi, kambe Hamani a tsutsuma a ya kaya ka yena na a rila, a timbhonye nhloko.
13 Nkama Hamani a nga byela nsati wa yena Zerexi+ ni vanghanu va yena hinkwavu, hinkwaswu leswi swi nga mu humelela, vatsundzuxi va yena ni nsati wa yena Zerexi va te: “Loko Mordekayi lweyi se a nga sungula ku ku hlula a li wa lixaka la Vayuda, a wu nga ta humelela, a ta ku hlula.”
14 Na va ha vulavula na yena, vatirhi va hosi va fike va teka Hamani hi ku hantlisa, va mu yisa ka fexta leli nga hambiwa hi Estere.+
