Estere 8:1-17
8 Hi siku lolelo, Hosi Asuwerusi a nyike Nsati wa yena Estere yindlo ya Hamani+ lweyi a a li nala wa Vayuda;+ se Mordekayi a ta ka hosi, hikusa Estere a a yi byelile swaku i xaka la yena.+
2 Hosi yi teka aneli ya yona ya ku karimbara+ leyi yi nga yi tekela Hamani yi yi nyika Mordekayi. Estere a veka Mordekayi swaku a hlayisa yindlo ya Hamani.+
3 Estere a tlhele a khuluma ni hosi. A titxukumetela ka minenge ya yona na a rila, a yi kombela swaku yi helisa khombo leli nga vangiwa hi Hamani wa Muagagi ni planu la yena la ku helisa Vayuda.+
4 Hosi yi tlakusela Estere+ nhonga ya wuhosi ya woru, kutani Estere a sekeleka, a nyima phambheni ka hosi.
5 Estere a ku: “Loko u swi lava wena hosi funtshi ni ku tsakisa naswona u swi vona na swi li swinene, a ku tsaliwe nawu lowu nga ta helisa leswi nga tsaliwa hi xigevenga lexiyani Hamani+ n’wana wa Amedata wa Muagagi+ wa leswaku ku helisiwa Vayuda ka maprovhinsiya hinkwawu ya hosi.
6 Hikusa ni nga swi kotisa ku yini ku tiyisela ku vona khombo leli nga ta wela vanhu va tiko la mina, naswona ni nga swi kotisa ku yini ku tiyisela ku vona maxaka ya mina ma helisiwa?”
7 Hosi Asuwerusi a byela nsati wa yena Estere na Mordekayi wa Muyuda a ku: “Phela ni nyike Estere+ yindlo ya Hamani, kasi Hamani a hayekiwe ka mhandzi+ hi mhaka ya planu la yena la ku lava ku dlaya Vayuda.
8 Tsalani leswi mi swi vonaka na swi li swinene hi vito la hosi hi ta Vayuda, mi swi lema hi aneli ya hosi ya ku karimbara hi yona, hikusa nawu lowu tsaliwaka hi vito la hosi wu tlhela wu lemiwa hi aneli ya yona ya ku karimbara, a wu txintxiwi.”+
9 Se ku vitaniwa vasekretariyu* va hosi hi nkama wolowo hi diya 23 ka wheti ya wunharhu, ku nga wheti ya Sivhana,* kutani va tsala hinkwaswu leswi Mordekayi a nga swi rhuma Vayuda, varhangeli va vagovhernadori,+ vagovhernadori ni varhangeli va maprovhinsiya+ hinkwawu ya ku sukela Indiya anze aEtiyopiya, ku nga 127 wa maprovhinsiya. Provhinsiya ha lin’we li tsaleliwe karta hi lirimi ni matsalelo ya lona, ni Vayuda va tsaleliwe karta hi lirimi ni matsalelo ya vona.
10 Mordekayi a tsale makarta hi vito la Hosi Asuwerusi, a ma lema hi aneli ya hosi ya ku karimbara hi yona,+ a gama a rhumela makarta lawa hi ku tirhisa varhumiwa lava fambaka hi makavhalu; va fambe hi makavhalu ya ku tsutsuma hintamu lawa ma nga djondzisiwa ku yendla mintirho ya hosi, lawa ma tirhisiwaka loko ku rhumeliwa makarta.
11 Ka makarta lawa, hosi yi pfumelele Vayuda lava a va li ka madoropa hinkwawu swaku va hlengeletana swaku va ta tivhikela. Yi tlhele yi va pfumelela swaku va dlaya ni ku helisa vanhu kumbe provhinsiya lin’wani leli nga ta zama ku va hlasela, ku patsa ni vavasati ni vana, va tlhela va teketela swilo swa vona.+
12 Leswi, a swi ta yendleka hi siku lin’we ka maprovhinsiya hinkwawu ya Hosi Asuwerusi, hi diya 13 ka wheti ya wu 12, ku nga wheti ya Adara.*+
13 Marito lawa ma nga ka makarta a ma fanele ma rhumeliwa ka maprovhinsiya hinkwawu swaku ma va nawu. A ma ta tivisiwa vanhu hinkwavu, se Vayuda a va ta lunghekela siku lolelo swaku va ta tlhelisela ka valala va vona.+
14 Varhumiwa va hume hi ku kahlula na va tsutsuma swinene hi ku landza leswi va nga rhumiwa swona hi hosi; a va famba hi makavhalu lawa ma tirhisiwaka swaku ku rhumeliwa makarta lama taka hi ka hosi. Nawu lowu wu tivisiwe ni ka yindlo ya hosi aXuxani.*+
15 Nkama Mordekayi a nga suka ka hosi, a a yambale mpahla ya wuhosi ya azuli ni ya ku basa, harhi* yayikulu ya woru ni nkhantxu wa panu ya ku vevuka ya ku pshuka yi ku psuu.+ Kutani doropa la Xuxani* li ba minkulungwani hi ku tsaka.
16 Se Vayuda va te hefuu, va tsaka hintamu va tlhela va sungula ku hloniphiwa.
17 Vayuda va tsakile hintamu va tlhela va hamba mafexta, va tikhorisa ka maprovhinsiya hinkwawu ni ka madoropa hinkwawu, lomu nawu ni leswi hosi yi nga swi vula swi nga fika kona. Vanhu va vanyingi atikweni va sungule ku tivitana swaku i Vayuda,+ hikusa a va chava Vayuda.
Tinhlamunselu ta le hansi
^ Vona Xiyengetelo B15.
^ Kumbe: “vamatsalana; vamabalani”.
^ Vona Xiyengetelo B15.
^ Kumbe: “aSuza.”
^ Kumbe: “korowa”.
^ Kumbe: “Suza”.
