Estere 9:1-32
9 Hi diya 13 ka wheti ya wu 12, ku nga wheti ya Adara,*+ hi nkama lowu rito ni nawu wa hosi a swi fanele swi hetiseka hi wona,+ hi siku leli valala va Vayuda a va pimisa swaku va ta va hlula hi lona, ku yendleke swa ku hambana, Vayuda va hlule vanhu lava a va va nyenya.+
2 Vayuda va hlengeletanile ka madoropa ya vona, ka maprovhinsiya hinkwawu ya Hosi Asuwerusi+ leswaku va lwa ni valala va vona. A ku zanga ku va ni munhu lweyi a nga tiyela ku ya lwa na vona, hikusa vanhu hinkwavu a va va chava.+
3 Naswona varhangeli hinkwavu lava nga ka maprovhinsiya, varhangeli va vagovhernadori,+ vagovhernadori ni hinkwavu lava a va li vatirheli va mfumu a va seketela Vayuda, hikusa a va chava Mordekayi.
4 Mordekayi a a hlonipheka swinene+ ka yindlo ya hosi naswona ndhuma ya yena a yi tiveka ka maprovhinsiya hinkwawu, hikusa a a ya a va ni matimba.
5 Vayuda va hlule valala va vona hinkwavu, va va dlaya hi xipada va va helisa; va tiyendlele ku rhandza hi lava a va va nyenya.+
6 Ka yindlo ya wuhosi aXuxani,*+ Vayuda va dlaye ni ku helisa 500 wa vavanuna.
7 Va tlhele va dlaya Parixadata, Dalifoni, Axipata,
8 Porata, Adaliyu, Aridata,
9 Parimaxita, Arisayi, Aridayi na Vhayizata,
10 ku nga 10 wa vana va Hamani n’wana wa Amedata, nala wa Vayuda.+ Kambe loko se va va dlayile, a va zanga va teka nchumu xa vona.+
11 Hi siku lolelo hosi yi byeliwe numeru ya hinkwavu lava nga dlayiwa ka yindlo ya wuhosi aXuxani.*
12 Kutani hosi yi byela Nsati wa yona Estere yi ku: “Phela Vayuda va dlaye 500 wa vavanuna ni 10 wa vana va Hamani ka yindlo ya wuhosi aXuxani.* Leswo swi komba swaku va dlaye vanhu va vanyingi ka maprovhinsiya laman’wani hinkwawu ya hosi.+ Se u lava ni ku yendlela yini swoswi? Ni ta ku yendlela swona. Ka ha ni swin’wani leswi u swi lavaka? Swi ta yendliwa.”
13 Estere a ku: “Loko u swi lava wena hosi,+ Vayuda lava nga aXuxani* a va pfumeleliwe ku yendla swa ku fana ni mundzuku, va landzela nawu wa namuntlha;+ naswona 10 wa mintsumbu ya vana va Hamani a yi hayekiwe amhandzini.”+
14 Se hosi yi rhumisa swaku ku yendliwa swoleswo. Kutani ku humesiwa nawu aXuxani,* a 10 wa mintsumbu ya vana va Hamani yi hayekiwa.
15 Vayuda va le Xuxani* va tlhela va hlengeletana hi diya 14 ka wheti ya Adara,+ va dlaya 300 wa vavanuna aXuxani, kambe a va zanga va teka nchumu xa vona.
16 Vayuda lavan’wani hinkwavu ka maprovhinsiya ya hosi na vona va hlengeletanile, va lwela wutomi la vona.+ Va hlule va tlhela va dlaya 75.000 wa valala va vona;+ kambe a va zanga va teka nchumu xa vona.
17 Leswi swi yendleke hi diya 13 ka wheti ya Adara, kutani va humula hi diya 14, ku va siku la fexta ni ku tsaka.
18 Vayuda lava a va li Xuxani,* va hlengeletanile hi diya 13+ ni diya 14,+ se va gama va humula hi diya 15, va li yendla siku la fexta ni ku tsaka.
19 Hi leswo swi nga yendla swaku Vayuda lava tshamaka ka madixtritu lawa ma nga kule ni doropa, va yendla swaku diya 14 ka wheti ya Adara ku va siku la ku tsaka ni la fexta ni siku la ku tlangela,+ ni nkama wa ku nyikana swakudla.+
20 Mordekayi+ a game a tsala hinkwaswu leswi swi nga yendleka kutani a rhumela makarta ka Vayuda hinkwavu ka maprovhinsiya hinkwawu ya Hosi Asuwerusi ya le kusuhi ni ya le kule.
21 A va rhuma swaku va tlangela diya 14 ni diya 15 ka wheti ya Adara lembe ni lembe,
22 hikusa hi masiku wolawo, Vayuda va chunsiwile ka valala va vona naswona hi wheti yoleyo ku xukuvala ka vona ku txintxe ku va ku tsaka ni ku rila ka vona+ ku va siku la ku tlangela. A va fanele va ma tlangela ma va masiku ya fexta ni ya ku tsaka ni nkama wa ku nyikana swakudla ni ku nyika swisiwana tinyiko.
23 Kutani Vayuda va pfumela ku tama va tlangela masiku lawa ni ku yendla leswi Mordekayi a nga va tsalela swona.
24 Hikusa Hamani+ n’wana wa Amedata wa Muagagi,+ nala wa Vayuda hinkwavu, a a yendle maplanu ya ku va dlaya+ naswona a a tirhise Puru,*+ swaku a va chavisa ni ku va helisa.
25 Kambe nkama Estere a nga ya ka hosi, yona yi humese nawu wa ku tsaliwa+ lowu nge: “Maplanu ya yena ya ku biha lawa a nga ma yendlela Vayuda+ a ma djike hi yena”; se Hamani ni vana va yena va hayekiwa ka mhandzi.+
26 Hi leswo swi nga yendla swaku va chula masiku wolawo va ku i Purimi, ku nga vito li taka hi ka rito Puru.*+ Hi mhaka ya leswi nga tsaliwa ka makarta wolawo, ni leswi va nga kumana na swona,
27 Vayuda va tibohile swaku vona ni vana va vona ni hinkwavu lava a va va seketela,+ va ta tlangela masiku lawa mambirhi, lembe ni lembe hi nkama lowu nga vekiwa hi ku landza leswi nga tsaliwa.
28 Masiku lawa a ma fanele ma khumbukiwa ni ku tlangeliwa hi Vayuda ni hi vatukulu va vona hinkwavu lava nga ta landzela, mindjangu hinkwayu, maprovhinsiya hinkwawu ni madoropa hinkwawu; Vayuda a va fanele va tama va tlangela masiku lawa ya Purimi, ni vatukulu va vona a va fanele va yendla swoleswo.
29 Se Estere Nsati wa Hosi lweyi a a li n’wana wa Abiyayile, na Mordekayi wa Muyuda va tsala karta la wumbirhi leli a li tiyisekisa mhaka ya Purimi.
30 Kutani makarta ma rhumeliwa ka Vayuda hinkwavu lava a va li ka 127 wa maprovhinsiya+ ya mfumu wa Asuwerusi;+ makarta lawa a ma ni marito lawa a ma tivisa swaku ku va ni ku rhula ni ku tshembeka,
31 leswaku va tiyiseka swaku masiku ya Purimi ma tlangeliwa hi nkama lowu wu nga vekiwa hi ku landza leswi Mordekayi wa Muyuda na Estere Nsati wa Hosi va nga va rhuma swaku va swi yendla,+ ni hi ku landza leswi va nga tiboha swona swaku vona ni vana va vona, va ta tlangela masiku lawa,+ ku patsa ni ku titsona swakudla+ ni ku khongela.+
32 Leswi Estere a nga va rhuma swona swi tiyisekise timhaka leti ta Purimi,+ se ti tsaliwa ka buku.
Tinhlamunselu ta le hansi
^ Vona Xiyengetelo B15.
^ Kumbe: “aSuza”.
^ Kumbe: “aSuza.”
^ Kumbe: “aSuza.”
^ Kumbe: “aSuza”.
^ Kumbe: “aSuza”.
^ Kumbe: “Suza”.
^ Kumbe: “Suza”.
^ Ku nga tinhlolo.
^ A rito “Puru” li vula swaku “Tinhlolo.” A rito “Purimi” i vito leli nga chuliwa fexta la Vayuda leli a va li yendla hi wheti ya wu 12 ka kalendariyu la wukhongeli la vona. Vona Xiyengetelo B15.
