Ezekiyele 1:1-28
1 Hi siku la wu 5 la wheti ya wu 4 ka lembe la wu 30, matilo ma pfulekile na na ha li xikarhi ka vanhu lava nga yisiwa wukaraweni+ kusuhi ni nambu wa Kebari,+ se ni sungula ku vona leswi Xikwembu a xi ni komba swona hi ndlela ya singita.*
2 Hi siku la wu 5 la wheti, hi lembe la wu 5 la ku yisiwa ka Hosi Yoyakini+ awukaraweni,
3 Yehovha a vulavule na mina Ezekiyele,* n’wana wa Buzi lweyi a a li muprista, akusuhi ni nambu wa Kebari ka tiko la Vakalidiya.+ Na na ha li kolanu matimba ya Yehovha ma sungule ku tirha ka mina.*+
4 Loko na ha txuvuka, ni vone moya wa matimba+ lowu taka hi norte* naswona a ku ni rhefu lalikulu ni ku hatima+ leswi a swi rhendzeliwe hi ku vonakala kakukulu, naswona axikarhi ka ku hatima a ku ni nchumu lowu a wu tikomba na wu fana ni woru leli nga patsiwa ni prata.+
5 Axikarhi ka ku hatima a ku ni leswi a swi voneka na swi fana ni 4 wa tintsumi+ naswona ha yin’we a yi fana ni munhu.
6 Yin’wani ni yin’wani a yi ni 4 wa tinghohe* ni 4 wa timpapa.+
7 A ti ni minenge ya ku wololoka naswona minkondzo ya tona a yi fana ni ya xihon’wani, a yi phatima ku fana ni kobre leli nga phatimisiwa.+
8 A ti ni mavoko ya vanhu hansi ka timpapa ta tona ka matlhelo hinkwawu ya 4 naswona hinkwatu ta 4 a ti ni tinghohe ni timpapa.
9 Timpapa ta tona a ti khumbana. Tintsumi leti a ti nga ndzuluki loko ti famba; hinkwatu a ti ya phambheni.+
10 Tinghohe ta tona a ti tshamise xileswi: Hinkwatu ta 4 a ti ni nghohe ya munhu ni ya nghonyama+ ka tlhelo la xinene, ni nghohe ya homu+ ka tlhelo la ximatsi naswona hinkwatu a ti ni nghohe+ ya gama.*+
11 Tinghohe ta tona a ti tshamise swoleswo. A ti pfule timpapa ta tona ti ya henhla. Ntsumi yin’wani ni yin’wani a yi ni timpapa timbirhi leti a ti khumbanile ni timpapa timbirhi leti a ti mbhonye muzimbha wa tona.+
12 Hinkwatu a ti ya phambheni, a ti ya kun’wani ni kun’wani lomu moya wa ku kwetsima a wu ti kongomisa ku ya kona.+ A ti nga ndzuluki loko ti famba.
13 Tintsumi leti a ti voneka ku fana ni makhala lawa ma pfurhaka ndzilu naswona a ku ni nchumu wa ku fana ni swindzilwani leswi pfurhaka lowu a wu ya phambheni ni le ndzhaku xikarhi ka tintsumi naswona a ku huma ku hatima hi ka ndzilu.+
14 Loko tintsumi ti famba, ndlela leyi a ti famba* hi yona a yi fana ni ku voninga ka ku hatima.
15 Loko ni txuvuka tintsumi, ni vone roda lin’we amisaveni atlhelweni ka ntsumi yin’wani ni yin’wani leyi nga ni 4 wa tinghohe.+
16 Leswi maroda ya kona a ma tshamise xiswona a ma phatima ku fana ni ribye leli vitaniwaka krizolita naswona hinkwawu ya 4 a ma fana. Naswona a ma tshame ingaku roda lin’we li yo nghenisiwa phakati ka roda lin’wani.
17 Loko ma famba, a ma swi kota ku ya ka matlhelo hinkwawu ya 4 na ma nga djikanga.
18 Maroda a ma lehe hi ndlela ya ku hlamalisa naswona hinkwawu ya 4 a ma ni matihlo ka matlhelo hinkwawu.+
19 Loko tintsumi ti famba, maroda a ma famba na tona naswona loko ti tlakuka ahenhla ka misava, maroda na wona a ma tlakuka na tona.+
20 Tintsumi a ti ya lomu moya wa ku kwetsima wu ti kongomisaka ku ya kona, hinkwaku lomu moya wa ku kwetsima wu yaka kona. Maroda a ma tlakuka hi nkama wun’we ni tintsumi hikusa moya wa ku kwetsima lowu a wu tirha ka tona a wu tirha ni le ka wona.
21 Loko tintsumi ti famba, na wona a ma famba; loko ti nyima, na wona a ma nyima; loko ti tlakuka henhla ka misava, maroda na wona a ma tlakuka hi nkama wun’we ni tintsumi hikusa moya wa ku kwetsima lowu a wu tirha ka tona a wu tirha ni le ka wona.
22 Ahenhla ka tinhloko ta tintsumi a ku ni nchumu xaxikulu lexi a xi yandlalekile xa ku phatima ku fana ni jelu naswona a xi hlamalisa.+
23 Tintsumi a ti nyimise timpapa ta tona ti khumbana ahansi ka nchumu lexi xaxikulu xa ku phatima. Ntsumi yin’wani ni yin’wani a yi ni timpapa timbirhi leti nga mbhonya tlhelo lin’we la muzimbha ni timpapa timbirhi leti a ti mbhonye tlhelo lelin’wani la muzimbha wa tona.
24 Loko ni yingisela guwa la timpapa ta tona, a li fana ni la mati lama tsutsumaka, ku fana ni guwa la Lweyi Wa Matimba Hinkwawu.+ Loko ti famba, guwa la tona a li fana ni la masonchwa. Loko ti nyima, a ti pfala timpapa ta tona.
25 A ku twakala rito henhla ka nchumu xaxikulu xa ku phatima lexi a xi yandlaliwile henhla ka tinhloko ta tintsumi. (Loko ti nyima, a ti pfala timpapa ta tona.)
26 Ahenhla ka nchumu lexi xaxikulu xa ku phatima lexi a xi yandlalekile ahenhla ka tinhloko ta tintsumi a ku ni nchumu xin’wani xa ku fana ni ribye leli vitaniwaka safira,+ lexi a xi voneka na xi fana ni xitshamu xa wuhosi.+ Lweyi a a tshame ka xitshamu xolexo xa wuhosi a a tikomba na a fana ni munhu.+
27 Ni vone nchumu wa ku hatima wa ku fana ni woru leli nga patsiwa ni prata+ lowu a wu fana ni ndzilu, ni wu vone na wu huma hi ka nchumu xa ku fana ni masenge ya yena wu ya henhla; se ku sukela ka masenge ya yena ku ya hansi, ni vone nchumu xa ku fana ni ndzilu.+ Matlhelweni ka yena hinkwaku a ku phatima
28 ku fana ni kwangulatilo*+ ka marhefu hi siku leli ku naka mpfula. Leyo a ku li ndlela leyi ku phatima koloko a ku voneka hi yona. A ku fana ni ku phatima ka Yehovha.+ Nkama ni nga ku vona ni wile, nghohe ya mina yi txuvuka hansi, se ni gama ni sungula ku twa rito la mun’wani na a khuluma.
Tinhlamunselu ta le hansi
^ Hi Xiheberu: “xivono.”
^ Leswi vulaka “Xikwembu Xa Tiyisa”.
^ Hi Xiheberu: “voko la Xikwembu li ve henhla ka yena.”
^ Kumbe: “n’walungu”.
^ Kumbe: “makara”.
^ Ku nga muxaka wa xinyanyani.
^ Hi Xiheberu: “loko ti famba ni loko ti vuya”.
^ Kumbe: “arco-íris”.
