Ezekiyele 10:1-22
10 Nkama na na ha txuvuka, ahenhla ka nchumu xaxikulu xa ku phatima lexi a xi yandlalekile lexi a xi li henhla ka tinhloko ta makerubu, ni vone nchumu xa ku fana ni ribye leli vitaniwaka safira ahenhla ka xona naswona a xi voneka na xi fana ni xitshamu xa wuhosi.+
2 Se Xikwembu xi byela wanuna lweyi a a yambale mpahla ya ku yendliwa hi panu*+ xi ku: “Nghena xikarhi ka maroda lawa ma ndzulukelaka+ ahansi ka makerubu, u tata mavoko ya wena hi makhala lawa ma pfurhaka+ lama nga xikarhi ka makerubu u gama u ma hoxa ka doropa.”+ Se a nghena na ni mu txuvukile.
3 Makerubu a ma nyime ka tlhelo la xinene la yindlo nkama wanuna lweyi na a nghena naswona rhefu a li tate kintari* wa vaprista.
4 Kutani ku phatima ka Yehovha+ ku suka ka makerubu ku ya ka nyanghwa wa yindlo, se hi katsongokatsongo yindlo yi mbhonyiwa hi rhefu,+ kintari wu tala hi ku vonakala ka Yehovha loku phatimaka.
5 Guwa la timpapa ta makerubu a li twala ni ka kintari lowu a wu tirhisiwa hi vanhu hinkwavu, a li fana ni rito la Xikwembu xa Matimba Hinkwawu loko xi vulavula.+
6 Kutani Xikwembu xi byela wanuna lweyi a a yambale mpahla ya ku yendliwa hi panu xi ku: “Teka ndzilu xikarhi ka maroda lama ndzulukelaka ni le xikarhi ka makerubu,” se a nghena a nyima tlhelweni ka roda.
7 Kutani kerubu lin’wani li yisa voko la lona ka ndzilu lowu a wu li xikarhi ka makerubu.+ Li teka ndzilu wun’wani li wu veka ka mavoko ya wanuna lweyi a a yambale mpahla ya ku yendliwa hi panu,+ se a wu teka a gama a huma.
8 Makerubu a ma ni minchumu ya ku fana ni mavoko ya munhu ahansi ka timpapa ta wona.+
9 Nkama na ni txuvuka, ni vona 4 wa maroda atlhelweni ka makerubu, a ku ni roda tlhelweni ka kerubu lin’wani ni lin’wani naswona maroda a ma phatima ku fana ni ribye leli vitaniwaka krizolita.+
10 Hinkwawu ya 4 a ma fana, a ma tshame ingaku roda lin’we li yo nghenisiwa phakati ka roda lin’wani.
11 Loko ma li ku fambeni, a ma kota ku ya ka matlhelo hinkwawu ya 4 na ma nga zanga ma djika, hikusa a ma ya lomu nhloko yi nga txuvuka kona na ma nga zanga ma djika.
12 Muzimbha wa wona, minhlana ya wona, mavoko ya wona, timpapa ta wona ni maroda, ku nga maroda hinkwawu ya 4 wa makerubu a ma tale hi matihlo ka matlhelo hinkwawu.+
13 Se ni game ni twa rito na li byela maroda li ku: “Ndzulukelani!”
14 Kerubu lin’wani ni lin’wani a li ni 4 wa tinghohe.* Nghohe ya ku sungula a yi li ya kerubu, nghohe ya wumbirhi a yi li ya munhu, nghohe ya wunharhu a yi li ya nghonyama kasi nghohe ya wu 4 a yi li ya gama.*+
15 Makerubu a ma tlakuka, wona a ma li tintsumi leti ni nga ti vona ka nambu wa Kebari.+
16 Loko makerubu ma famba, maroda a ma famba tlhelweni ka wona; naswona loko makerubu ma tlakusa timpapa ta wona henhla ka misava, maroda a ma nga djiki kumbe ku suka tlhelweni ka makerubu.+
17 Loko makerubu ma nyima, maroda na wona a ma nyima; naswona loko ma tlakuka na wona a ma tlakuka, hikusa moya wa ku kwetsima lowu a wu tirha ka tintsumi a wu tirha ni ka maroda.
18 Se ku phatima ka Yehovha+ ku suka henhla ka nyanghwa wa yindlo ku ya nyima henhla ka makerubu.+
19 Makerubu ma tlakusa timpapa ta wona ma tlakuka henhla ka misava na ni ma txuvukile. Loko ma tlakuka, maroda na wona a ma li tlhelweni ka wona. Makerubu ma fike ma nyima ka nyanghwa wa le wuxeni wa yindlo ya Yehovha naswona ku phatima ka Xikwembu xa Israyele a ku li henhla ka wona.+
20 Leto a ku li tintsumi leti ni nga ti vona ahansi ka xitshamu xa wuhosi xa Xikwembu xa Israyele ka Nambu wa Kebari,+ se ni swi tiva swaku a ku li makerubu.
21 Kerubu lin’wani ni lin’wani ka lawa ya 4 a li ni 4 wa tinghohe, 4 wa timpapa ni minchumu leyi a yi fana ni mavoko ya munhu hansi ka timpapa ta lona.+
22 Tinghohe ta wona a ti fana ni tinghohe leti ni nga ti vona ka Nambu wa Kebari.+ Makerubu hinkwawu a ma ya phambheni.+
Tinhlamunselu ta le hansi
^ Kumbe: “panu ya linyu”.
^ Vona Ntlhamuselo.
^ Kumbe: “makara.”
^ Ku nga muxaka wa xinyanyani.
