Ezekiyele 11:1-25
11 Se matimba ya Xikwembu ma ni tlakula ma ni yisa ka nyanghwa wa le wuxeni wa yindlo ya Yehovha, ku nga nyanghwa lowu nga txuvukana ni wuxeni.+ Kolanu nyanghweni ni vone 25 wa vavanuna funtshi xikarhi ka vona a ku na Yazaniya n’wana wa Azuri na Pelatiya n’wana wa Benaya, lava va nga varhangeli va vanhu.+
2 Kutani a ni byela a ku: “N’wana wa munhu, lava i vanhu lava pimisaka ku yendla swa ku biha, lava byelaka vanhu ku yendla swilo swa ku biha ka doropa leli.
3 Va li: ‘Phela lowu i nkama wa leswaku hi yaka tiyindlo!+ Doropa leli i panela la ku swekela ka lona+ naswona hina hi nyama.’
4 “Kutani profeta u va laya. Profeta, n’wana wa munhu.”+
5 Se moya wa ku kwetsima wa Yehovha wu gama wu fika henhla ka mina,+ a ni byela a ku: “Vula u ku: ‘Yehovha a li: “Leswi mi nga swi vula i ntiyiso n’wina yindlo ya Israyele, naswona na swi tiva leswi mi swi pimisaka.
6 Mi yendle swaku vanhu va vanyingi va dlayiwa ka doropa leli funtshi mi tate switaratu swa lona hi mintsumbu.”’”+
7 “Kutani Yehovha Hosi Leyikulu a li: ‘Mintsumbu leyi mi nga yi hangalasela ka doropa i nyama naswona doropa i panela la ku swekela ka lona.+ Kambe n’wina mi ta humesiwa ka lona.’”
8 “‘Ma xi chava xipada+ kambe ni ta mi tisela xona,’ ku vula Yehovha Hosi Leyikulu.
9 ‘Ni ta mi humesa doropeni ni mi nyikela ka vanhu va matiko man’wani, ni mi yavanyisa.+
10 Mi ta dlayiwa hi xipada.+ Ni ta mi yavanyisa kusuhi ni lomu tiko la Israyele li tsemaka hi kona+ naswona mi ta swi tiva swaku hi mina Yehovha.+
11 Doropa a li nga ha ta va panela la ku swekela ka lona ka n’wina funtshi n’wina a mi nga ha ta va nyama ndzeni ka lona; ni ta mi yavanyisa kusuhi ni lomu tiko la Israyele li tsemaka hi kona.
12 Kutani mi ta swi tiva swaku hi mina Yehovha, hikusa a mi yi yingisanga minawu ya mina naswona a mi hanyanga hi ku landza ku yavanyisa ka mina,+ kambe mi tekelele matiko lawa mi nga kusuhi na wona.’”+
13 Nkama ni nga heta ku profeta, Pelatiya n’wana wa Benaya a fa, se ni khizama nghohe* ya mina yi txuvuka hansi, ni huwelela hi rito lalikulu ni ku: “Yehovha Hosi Leyikulu, u ta helisa Vayisrayele hinkwavu lava nga sala?”+
14 Yehovha a tlhela a vulavula na mina a ku:
15 “N’wana wa munhu, vamakwenu va wena, vamakwenu lava nga ni mfanelo ya ku tlhela va xava ndhawu ni Vayisrayele hinkwavu, va byeliwe leswi hi lava tshamaka aYerusalema: ‘Fambani mi ya kule na Yehovha. Tiko i la hina; li nyikiwe hina swaku li va tshomba la hina.’
16 Kutani hlaya u ku: ‘Yehovha Hosi Leyikulu a li: “Hambileswi ni nga va yisa kule swaku va ya tshama xikarhi ka matiko, ni leswi ni nga va hangalasela xikarhi ka wona,+ ni ta va ndhawu leyi kwetsimaka ka vona swa nkamanyana ka matiko lawa va nga ya ka wona.”’+
17 “Se hlaya u ku: ‘Yehovha Hosi Leyikulu a li: “Ni ta mi hlengeleta xikarhi ka vanhu, ni mi hlengeleta ka matiko lawa mi nga hangalaseliwa ka wona, ni ta mi nyika tiko la Israyele.+
18 Kutani va ta tlhelela ka lona, va fika va susa minchumu hinkwayu ya ku nyenyentsa ni mintirho ya ku nyenyentsa.+
19 Ni ta yendla leswaku va twanana*+ naswona ni ta va nyika matimba ya nyuwani+ swaku ma tirha ndzeni ka vona; ni ta susa mbilu ya ribye ka muzimbha wa vona+ kutani ni va nyika mbilu ya nyama,*+
20 leswaku va yingisa minawu ya mina, va hlayisa swiboho swa mina swa ku yavanyisa, va swi yingisa. Va ta va vanhu va mina, mina ni ta va Xikwembu xa vona.”’
21 “‘“Kambe lava timbilu ta vona ti nga tinyimisela ku yendla minchumu ya ku nyenyentsa ni mintirho ya ku nyenyentsa, ni ta va khoma hi ku ya hi leswi va nga swi yendla,” ku vula Yehovha Hosi Leyikulu.’”
22 Se makerubu ma nyimisa timpapa ta wona, maroda na ma li kusuhi na wona+ funtshi ku phatima ka Xikwembu xa Israyele na ku li henhla ka wona.+
23 Kutani ku phatima ka Yehovha+ ku suka ka doropa ku ya nyima henhla ka ntshava leyi nga ka tlhelo la le wuxeni la doropa.+
24 Se matimba ma ni tlakula, hi ku tirhisa leswi a ni kombiwa swona hi ndlela ya singita* hi moya wa ku kwetsima wa Xikwembu, ma ni yisa ka vanhu lava nga wukaraweni aKalidiya. Kutani leswi Xikwembu a xi ni komba swona swi gama swi nyamalala.
25 Se ni sungula ku byela vanhu lava nga wukaraweni swilo hinkwaswu leswi Yehovha a nga ni komba swona.
Tinhlamunselu ta le hansi
^ Kumbe: “kara la”.
^ Hi Xiheberu: “mbilu yin’we”.
^ Leswi vulaka mbilu leyi yingisaka nkongomiso wa Xikwembu.
^ Hi Xiheberu: “xivono”.
