Ezekiyele 13:1-23
13 Yehovha a tlhela a vulavula na mina a ku:
2 “N’wana wa munhu, profeta hi ta vaprofeta va le Israyele,+ u byela lava tisungulelaka wuprofeta la vona u ku:+ ‘Yingisani rito la Yehovha.
3 Yehovha Hosi Leyikulu a li: “Khombo ka vaprofeta va swiphunta, lava landzelaka mbilu ya vona hambiloko va nga vonanga nchumu!+
4 Wena Israyele, vaprofeta va wena va fana ni timbyana ta khwati* leti tshamaka ka tindhawu leti nga hohlokela.*
5 A mi nge yi ka tindhawu leti nga boxekela ka muru lowu nga yakiwa hi maribye swaku mi ya pfuxa muru wa yindlo ya Israyele,+ swaku Israyele a ta tshama na a tiyile anyimpini hi siku la Yehovha.”+
6 “Va vone minchumu ya mavunhwa va tlhela va profeta swa mavunhwa, vanhu lava nge: ‘Yehovha a li,’ kuve Yehovha a nga va rhumanga funtshi va nyimele leswaku leswi va swi vulaka swi yendleka.+
7 Indjhe a mi vonanga minchumu ya mavunhwa nkama mi nga profeta mi ku: ‘Yehovha a li,’ kuve mina a ni vulanga nchumu?”’
8 “‘Se Yehovha Hosi Leyikulu a li: “‘Leswi mi nga vulavula mavunhwa ni leswi minchumu leyi mi nga yi vona ku nga mavunhwa, ni lwa na n’wina,’ ku vula Yehovha Hosi Leyikulu.”+
9 Voko la mina li lwa ni vaprofeta lava vonaka* minchumu ya mavunhwa ni lava profetaka mavunhwa.+ A va nge vi kona xikarhi ka vanhu lava ni tirhisanaka na vona; funtshi a va nga ta tsaliwa ka lixta la vanhu va yindlo ya Israyele; a va nga ta tlhelela ka tiko la Israyele; kutani mi ta swi tiva swaku hi mina Yehovha Hosi Leyikulu.+
10 Leswo swi ta yendleka hi mhaka ya leswi va nga djikisa vanhu va mina va ku: “Ku ni ku rhula,” kasi a ku na ku rhula.+ Loko ku yakiwa khumbi la ku kala li nga tiyanga, vona va li penda hi pendi la ku basa la ku vevuka.’+
11 “Byela lava pendaka khumbi hi pendi la ku basa la ku vevuka swaku li ta wa. Ku ta na mpfula ya matimba ni marhalala se swidzedze swaswikulu swi ta li wisa.+
12 Se loko khumbi li ta wa va ta mi vutisa va ku: ‘Swi kwini leswi a mi pende hi swona?’+
13 “Kutani Yehovha Hosi Leyikulu a li: ‘Ni ta tisa swidzedze swaswikulu ni nisa ni mpfula ya matimba hi mhaka ya ku kwata ka mina. Ni ta nisa mpfula ya marhalala leyi nga ta wisa khumbi lolelo hi mhaka ya leswi ni nga kwata swinene.
14 Ni ta diliza khumbi leli mi nga li penda hi pendi la ku basa la ku vevuka, masungulo ya lona ma ta sala handle. Loko doropa li helisiwa na n’wina mi ta helisiwa na lona; kutani mi ta swi tiva swaku hi mina Yehovha.’
15 “‘Nkama ni nga ta chulula ku kwata ka mina ka khumbi lolelo ni ka lava nga li penda hi pendi la ku basa la ku vevuka, ni ta mi byela ni ku: “Khumbi a la ha li kona, ni lava a va li penda a va ha li kona.+
16 Vaprofeta va le Israyele a va ha li kona, lava a va profeta hi Yerusalema ni lava a va mu vonela* minchumu ya ku rhula, kuve a ku na ku rhula,”’+ ku vula Yehovha Hosi Leyikulu.
17 “Wena n’wana wa munhu, profeta minchumu leyi nga ta lwisana ni vana va tintombhi va vanhu va wena lava tisungulelaka wuprofeta la vona.
18 Va byeli u ku: ‘Yehovha Hosi Leyikulu a li: “Khombo ka vavasati lava rhungaka mabandhi ya ku boha ka mavoko* va tlhela va yendla tipanu ta ku vevuka ta ku mbhonya tinhloko ta mimpimu hinkwayu leswaku va rhiya vanhu! Mi rhiya vanhu va mina, mi gama mi zama ku ponisa wutomi la n’wina?
19 Ma ni chakisa xikarhi ka vanhu va mina swaku mi kuma maxalani* lama tataka mavoko ni swikhemu swa mapawu,+ mi dlaya vanhu lava kalaka va nga fanelanga va fa ni ku tshika vanhu lava faneleke va fa, mi yendla leswo hi ku hembela vanhu va mina lava yingisaka mavunhwa ya n’wina!”’+
20 “Se Yehovha Hosi Leyikulu a li: ‘N’wina vavasati, na ma nyenya mabandhi lawa mi ma tirhisaka swaku mi rhiya vanhu ingaku hi loko va li swinyanyani, ni ta ma tsemelela ka mavoko ya n’wina, ni chunsa vanhu lava mi va rhiyaka ku fana ni swinyanyani.
21 Ni ta handzula tipanu ta n’wina ta ku vevuka ta ku mbhonya tinhloko ni chunsa vanhu va mina ka mavoko ya n’wina, a mi nge he va rhiyi; kutani mi ta swi tiva swaku hi mina Yehovha.+
22 Hambileswi a ni nga swi lavi swaku lweyi wa ku lulama a xaniseka kambe n’wina mi mu hete matimba hi mavunhwa ya n’wina,+ mi tiyise mavoko ya lweyi a yendlaka swa ku biha+ leswaku a nga tshiki ndlela ya yena ya ku biha leswaku a tama a hanya.+
23 Kutani n’wina vavasati a mi nga ha ta vona swilo* swa mavunhwa naswona a mi nga ha ta hlahluva;+ ni ta ponisa vanhu va mina ka n’wina, kutani mi ta swi tiva swaku hi mina Yehovha.’”
Tinhlamunselu ta le hansi
^ Lani ku vulavuliwa hi timhungubye.
^ Kumbe: “marhumbi.”
^ Hi Xiheberu: “swivono”.
^ Hi Xiheberu: “swivono”.
^ Ku nga mabandhi ya masalamusi lawa a ma bohiwa ka mavoko.
^ Kumbe: “sevhada”.
^ Hi Xiheberu: “swivono”.
